Яшчэ адзін твор ураджэнца Смілавічаў Хаіма Суціна цяпер вярнуўся ў Беларусь: палатно «Якая заснула з кнігай. Мадлен Кастэн» набыў у карпаратыўную калекцыю Белгазпрамбанк. Твор прадстаўлены ў праекце «Суцін. Жыццё пасля смерці», што працуе ў галерэі «Арт-Беларусь». Праект прымеркаваны да 125-годдзя творцы, якое адзначаецца сёлета ў студзені.
Мастак парыжскай школы Хаім Суцін быў у пэўны перыяд у сяброўскіх адносінах з мужам і жонкай Кастэн. Ён гасцяваў у маёнтку Марселена і Мадлен, яны апекавалі мастака, спрыялі ў продажах яго твораў і самі сталі яго калекцыянерамі. Карціна «Якая заснула з кнігай. Мадлен Кастэн» створана ў 1937 годзе. Прыглядзелі яе на адным з аўкцыёнаў Вялікабрытаніі, набылі за больш чым 300 тысяч долараў. Пасля ранейшых набыткаў работ «Вялікія лугі ў Шартры, ля віядука» і партрэта «Ева» гэта трэці твор мастака Парыжскай школы Хаіма Суціна, які знаходзіцца ў карпаратыўнай калекцыі Белгазпрамбанка.
Але падарункам для прыхільнікаў творчасці мастака стаў яшчэ адзін новы твор у калекцыі — бронзавы бюст Леона Індэнбаўмана «Партрэт Хаіма Суціна». Творца, чый экспрэсіўны погляд на свет уражвае і ў ХХІ стагоддзі, становіцца больш зразумелым для нас. Яго спадчына належыць свету, а творы знаходзяцца ў музеях і калекцыях у розных краінах. Каб ведаць яе лепш, ёсць задума стварыць сусветную інтэрактыўную карту творчасці Суціна: кожны можа падзяліцца інфармацыяй, у якіх музейных зборах сёння захоўваюцца творы мастака.
Марыя АСІПЕНКА
Канцэрт для дзяцей і моладзі, пластычны спектакль Ягора Дружыніна і «Рок-панарама».