Вы тут

Штотыднёвы спартыўны агляд «Звязды»


У традыцыйным спартыўным аглядзе «Звязды» расказваем пра першы этап прэстыжнага ралі-рэйду «Дакар-2019» і іншыя актуальныя падзеі выхадных.


1. Аляксандра Сасновіч паспяхова правяла стартавы матч на турніры ў аўстралійскім Сіднеі. У гульні 1/16 фіналу беларуска атрымала перамогу над расіянкай Дар'яй Касаткінай — 6:1, 6:4. У 1/8 фіналу Аляксандра згуляе з аўстралійскай тэнісісткай Прысцылай Хон.

Тым часам Арына Сабаленка пацярпела паражэнне на турніры ў аўстралійскім Сіднеі. У паядынку першага раўнда Арына, якая займае 11-е месца ў сусветным рэйтынгу, саступіла восьмай ракетцы планеты чэшцы Петры Квітавай у двух сэтах — 1:6, 5:7.

Ілья Івашка пераможна стартаваў на турніры ў аўстралійскай Канберы, у матчы 1/16 фіналу беларус перайграў аўстралійца Джэймса Фроўлі — 6:4, 1:6, 7:6. У барацьбе за выхад у чвэрцьфінал Ілья Івашка, які займае 94-е месца ў сусветным рэйтынгу, будзе сапернічаць з чылійцам Томасам Барыясам, які знаходзіцца на 333-й пазіцыі рэйтынга АТР.


2. Гоншчык беларускай каманды «МАЗ-СПОРТаўта» Аляксей Вішнеўскі ўвайшоў у дзясятку наймацнейшых першага этапу прэстыжнага ралі-рэйду «Дакар-2019». Стартавы этап у сталіцы Перу Ліме складаўся з 330-кіламетровага ўчастка да гарадка Піска. Працягласць спецадрэзка, які ішоў у залік гонкі, склала 84 км. У заліку грузавікоў першае месца заняў экіпаж КамАЗа Эдуарда Нікалаева. Найлепшым з беларусаў стаў Аляксей Вішнеўскі, які саступіў пераможцу 6 хв. 8 сек. і стаў дзявятым.

Сярэбраны прызёр мінулага года ў агульным заліку грузавікоў беларус Сяргей Вязовіч завяршыў выступленне 14-м з адставаннем у 10 хв. 27 сек. Трэці экіпаж «МАЗ-СПОРТаўта», Аляксандра Васілеўскага, заняў 17-ю пазіцыю ў выніковым пратаколе.

Марафон «Дакар-2019» праходзіць па тэрыторыі Перу. Ралі-рэйд зойме 11 дзён і завершыцца 17 студзеня ў Ліме. Гоншчыкам трэба будзе праехаць каля 5 тыс. км. Больш чым палова маршруту пралягае праз пясчаныя трасы з вялізнымі дзюнамі і іншымі перашкодамі.


3. Мужчынская зборная Беларусі па валейболе саступіла на выездзе камандзе Іспаніі з лікам 0:3 і пацярпела першае паражэнне ў кваліфікацыі да чэмпіянату Еўропы 2019 года. Нягледзячы на паражэнне, за кошт большай колькасці перамог (4-1) зборная Беларусі захавала першае месца ў турнірнай табліцы: Беларусь — 11 ачкоў (5 матчаў), Іспанія — 11 (5), Нарвегія — 8 (5), Грузія — 0 (5).

Заключны тур адбудзецца 9 студзеня, наша каманда ў Осла згуляе з Нарвегіяй, а іспанцы ў Тбілісі сустрэнуцца з Грузіяй.


4. Валейбалісткі «Мінчанкі» пацярпелі паражэнне ад «Зарэчча-Адзінцова» ў гасцявым матчы з лікам 1:3 у чэмпіянаце Расіі ў суперлізе. Беларуская і падмаскоўная каманды ўжо сустракаліся ў гэтым сезоне на папярэдняй стадыі Кубка Расіі, і падапечныя Віктара Ганчарова таксама двойчы пацярпелі паражэнне.

Наступны матч расійскай суперлігі валейбалісткі «Мінчанкі» згуляюць на сваёй пляцоўцы ва «Уруччы» 9 студзеня з лідарам чэмпіянату — калінінградскім «Лакаматывам».


5. Беларускія атлеты 18 студзеня правядуць матчавую сустрэчу па боксе, прымеркаваную да 90-годдзя айчыннай школы бокса, супраць сапернікаў з Францыі і Чэхіі. Турнір пройдзе ў цэнтральным атрыуме гандлёвага цэнтра «Сталіца». Для беларускіх спартсменаў гэты турнір стане адным з вырашальных этапаў падрыхтоўкі да ІІ Еўрапейскіх гульняў, а таксама ліцэнзійнага чэмпіянату свету па боксе, які пройдзе ў верасні 2019 года ў Екацярынбургу.

Усяго за ўзнагароды турніру пазмагаюцца 29 атлетаў.


6. Хакеісты мінскага і рыжскага «Дынама» правядуць матч чэмпіянату КХЛ на адкрытым паветры 15 лютага. Гульня адбудзецца ў Рызе, білеты паступяць у продаж 9 студзеня. Нагадаем, годам раней мінчане атрымалі ў сталіцы Латвіі перамогу з лікам 3:2.

Дар'я ЛАБАЖЭВІЧ

Выбар рэдакцыі

Культура

Як  мастак Май Данцыг ствараў свае карціны

Як мастак Май Данцыг ствараў свае карціны

Наватар, «шасцідзясятнік», ваяўнічы аптыміст — гэта ўсё пра яго.

Грамадства

Як ператварыць звычайны ўрок беларускай літаратуры у творчую майстэрню?

Як ператварыць звычайны ўрок беларускай літаратуры у творчую майстэрню?

Настаўнікі ўпэўнены: ці будуць вучні чытаць, у многім залежыць ад іх саміх. 

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.