Вы тут

«Студзеньскія музычныя вечары» распачынаюць святкаванне 1000-годдзя Брэста


Першага студзеня 2019 года ўжо назвалі сімвалічным пачаткам тысячагоддзя Брэста. Бо 1019 год, які лічыцца годам заснавання старажытнага Берасця, даволі ўмоўная дата, не кажучы ўжо пра месяц і дзень. Таму ўяўляецца лагічным і зразумелым пачынаць святкаваць тысячагадовы юбілей горада ўжо зараз. Што і робіць прагрэсіўная музычная брэсцкая грамадскасць разам з усімі прыхільнікамі класічнай музыкі пачынаючы з 9 студзеня. Менавіта ў гэты дзень адкрываецца міжнародны фестываль «Студзеньскія музычныя вечары», ХХХІ па ліку.


Прафесар Антоніа Амендуні

На гэты раз у Брэст прыедзе больш за 200 музыкантаў і выканаўцаў з дзесяці краін свету. І што цікава, большасць з іх стануць удзельнікамі «Вечароў» упершыню. Таму фэст атрымаўся вельмі новым — так яго сутнасць вызначыла нязменны арганізатар, заслужаны дзеяч мастацтваў Рэспублікі Беларусь, ганаровы грамадзянін Брэста Лілія БАТЫРАВА. Але «новы» ў дадзеным кантэксце не азначае, што яго ўдзельнікі — малавядомыя пачаткоўцы. Многія з іх ужо лічацца сусветнымі знакамітасцямі. Напрыклад, скрыпачка Ганна Саўкіна выступала ледзь не з усімі знакавымі аркестрамі свету. Ды і іншыя музыканты заявілі аб сабе на самых лепшых сцэнах розных кантынентаў.

Адкрыецца фестываль гала-канцэртам салістаў італьянскага опернага тэатра Lа Skаlа Джані Манджардзіна і Альда Капута. Запрасіць іх у Брэст дапамог даўні сябар фэсту «Студзеньскія музычныя вечары», улюбёнец брэсцкай публікі, чароўная флейта міланскай оперы — Антоніа Амендуні. Сам флейтыст выступаў на «Вечарах» сем разоў, гэтым разам ён не едзе на фестываль, але парэкамендаваў таленавітых салістаў — падзялілася сакрэтамі фестывальнай кухні Лілія Батырава. І паведаміла, што ў першы вечар на сцэну Брэсцкага тэатра драмы таксама выйдуць салісты опернай праграмы Вялікага тэатра Расіі Тамуна Гочашвілі, Вікторыя Каркачава, Алуда Тодуа. Оперныя зоркі будуць спяваць у суправаджэнні Нацыянальнага акадэмічнага сімфанічнага аркестра Белтэлерадыёкампаніі пад кіраўніцтвам Аляксандра Сасноўскага.

Яшчэ адной цікавінкай сёлетняга фестывалю стане прыезд Тома Сінатры, пляменніка легендарнага амерыканскага спевака, акцёра, кінарэжысёра і шоўмена Фрэнка Сінатры. Том — ураджэнец Сіцыліі, па папулярнасці не саступае знакамітаму дзядзьку, уваходзіць у пяцёрку найлепшых гітарыстаў свету.

— Некалі я планавала запрасіць на наш фэст Фрэнка Сінатру — расказвае Лілія Батырава. — Але не атрымалася. Не паспела. І вось нечаканасць: са мной звязалася па тэлефоне менеджар Тома, ураджэнка Беларусі, якая ведае наш фестываль. Тады я сказала, што, калі б нават ён не іграў і не спяваў, з-за аднаго імені я запрасіла б яго ў Брэст хаця б у якасці гледача. А нам прапанавалі віртуознага музыканта, які выконвае хіты Фрэнка Сінатры. Гэта для нас, безумоўна, знаходка.

І такіх знаходак ды адкрыццяў Лілія Рыгораўна абяцае шмат на сёлетніх «Вечарах». Чаго варты лірычнае сапрана Яанны Наўрот з Польшчы і бас-саліста Марыінскага тэатра Вадзіма Краўца!

Том Сінатра будзе выступаць у другім аддзяленні другога вечара 10 студзеня. А першае аддзяленне адкрые вядомы расійскі піяніст, дацэнт Маскоўскай кансерваторыі Міхаіл Лідскі. На трэцім музычным вечары выступяць піяніст-віртуоз, выпускнік парыжскай кансерваторыі Джонатан Бенішу з Манака, а таксама вядомы кларнетыст, выкладчык Акадэміі музыкі ў Гданьску Анджэй Вайцэхоўскі, выпускнік Музычнай акадэміі пры тэатры Lа Skаlа Чжан Цзын Вэй з Кітая.

Арганізатары падкрэслілі, што кошт білетаў на «Вечары» не мяняецца ўжо тры гады, але для тых, каму і гэтая цана ўяўляецца значнай, прадугледжаны бясплатныя альбо зусім бюджэтныя канцэрты. Адзін з іх пройдзе 10 студзеня ў музычным каледжы. А ў царкве па вуліцы Машэнскага выступіць сімфанічна-духавы аркестр Харальда Хепнера з горада-пабраціма Брэста Равенсбурга. Выступіць бясплатна для публікі дзякуючы спонсару — брэсцкаму прадпрыемству «Компа».

А вось з маладымі брэсцкімі музыкантамі і спевакамі будуць сустракацца ўдзельнікі кіеўскага маладзёжнага камернага хору «Сафія». У іх вельмі насычаны графік на гэтыя калядныя дні, але маладыя, лёгкія на пад'ём спевакі згадзіліся прыехаць менш чым на суткі. Яны выступаюць і з'язджаюць у той жа дзень. І ўпрыгожаць сабой апошні вечар фэсту — перакананая яго арганізатар.

На прэс-канферэнцыі з нагоды адкрыцця «Студзеньскіх музычных вечароў» начальнік упраўлення культуры Брэсцкага аблвыканкама Сяргей ПАНАСЮК падкрэсліў, што фестываль стане яркім пачаткам святкавання тысячагадовага юбілею Брэста.

Святлана ЯСКЕВІЧ

Загаловак у газеце: Салісты Lа Skаlа і пляменнік Фрэнка Сінатры

Выбар рэдакцыі

Спорт

Як жывуць спартсмены, якія выступяць на Еўрапейскіх гульнях?

Як жывуць спартсмены, якія выступяць на Еўрапейскіх гульнях?

Карэспандэнты «Звязды» пабывалі ў Вёсцы атлетаў.

Культура

Адэльск: турыстычная Мекка на прыграніччы

Адэльск: турыстычная Мекка на прыграніччы

Адэльск — унікальнае месца. Ціхая вёска на самым ускрайку заходняй мяжы становіцца з кожным годам усё больш знакамітай.

Грамадства

Як хутка людзі змогуць стаць менш агрэсіўнымі?

Як хутка людзі змогуць стаць менш агрэсіўнымі?

 Псіхолаг Раман Кручкоў упэўнены, што на самай справе агрэсія ўласціва ўсім людзям.  

Грамадства

Археалагічны комплекс «Бярэсце» стане першай пляцоўкай святкавання тысячагоддзя

Археалагічны комплекс «Бярэсце» стане першай пляцоўкай святкавання тысячагоддзя

Археалагічны музей «Бярэсце» і навакольная тэрыторыя перажываюць вялікае абнаўленне.