Вы тут

Новы комплекс метэаралагічных і аэралагічных назіранняў адкрыўся ў Мінску


Нядаўна ў беларускай сталіцы адбылося адкрыццё новага комплексу метэаралагічных і аэралагічных назіранняў «Мінск». Урачыстае мерапрыемства прайшло з удзелам намесніка прэм'ер-міністра Міхаіла Русага і міністра прыродных рэсурсаў і аховы навакольнага асяроддзя Андрэя Худыка.

— Кіраўніком дзяржавы было жорстка пастаўлена пытанне аб тым, што метэаралагічны сектар павінен быць мадэрнізаваны ў самыя кароткія тэрміны. Была складзена дарожная карта да 2020 года, — сказаў Міхаіл Русы падчас адкрыцця комплексу. Ён дадаў, што дзякуючы такой мадэрнізацыі пашырыцца супрацоўніцтва з інтэрнэт-рэсурсамі (дакладная метэаралагічная інфармацыя павінна быць ва ўсеагульным доступе) і з Міністэрствам па надзвычайных сітуацыях (для своечасовага папярэджання насельніцтва падчас аранжавага ці чырвонага ўзроўню небяспекі).

Будаўніцтва новага пункта метэаралагічных і аэралагічных назіранняў у Мінску пачалося ў красавіку мінулага года, а ўжо 5 лістапада быў уведзены ў строй першы пускавы комплекс. Сучасны комплекс у Мінску будзе перадаваць інфармацыю ў анлайн-рэжыме восем разоў на суткі па 12 параметрах.

— Тое, што неабходна палепшыць прагназаванне надвор'я, у нашым грамадстве абмяркоўваецца даўно. Ад кіраўніка дзяржавы паступіла даручэнне палепшыць работу Белгідрамета. Былі выдзелены сродкі на гэтыя мэты. Многае ўжо зроблена ў плане тэхнічнай мадэрнізацыі, прагнозы сталі больш дакладнымі. Мы дасягнулі па абласцях дакладнасці прагнозаў 97—98 %, па абласных цэнтрах — 93—95 %. З кожным годам, укладваючы інвестыцыі, прыцягваючы новыя тэхналогіі, навучаючы спецыялістаў, мы будзем набліжацца да найлепшых паказчыкаў. Наша работа накіравана на максімальны вынік, — падкрэсліў Андрэй Худык.

Увод у эксплуатацыю метэаралагічнага комплексу ў сталіцы дазволіць забяспечыць поўны цыкл гідраметэаралагічных назіранняў (прыземных метэаралагічных, аэралагічных, актынаметрычных, гідралагічных, радыяметрычных) з дапамогай сучаснага высокапрадукцыйнага абсталявання.

Унікальнасць новага комплексу заключаецца ў тым, што тут упершыню ўкаранёны інтэграваны падыход функцыянавання розных сетак назіранняў. Для ажыццяўлення ўсіх відаў назіранняў закуплены і ўстаноўлены самыя сучасныя прыборы і абсталяванне.

Прыземныя (раней было неабходна будаваць вышкі, зараз усю інфармацыю можна атрымліваць з ніжняга пункта) метэаралагічныя назіранні праводзяцца кругласутачна з дапамогай аўтаматызаванай інфармацыйнай вымяральнай сістэмы вытворчасці беларускай кампаніі ААТ «Пеленг», у склад якой уваходзіць 25 датчыкаў, і ўключаюць назіранні за станам, змяненнем і развіццём атмасферных працэсаў, у тым ліку за неспрыяльнымі і небяспечнымі гідраметэаралагічнымі з'явамі, вымярэнне параметраў і вызначэнне метэаралагічных характарыстык (74 параметры і характарыстыкі).

На тэрыторыі комплексу ўведзены ў эксплуатацыю адзіны ў Беларусі тэмпературна-ветравы прафілямер у мабільнай версіі. Выкарыстанне такога роду абсталявання дазволіць у рэжыме рэальнага часу ажыццяўляць бесперапынны маніторынг параметраў ветру і тэмпературы ў ніжніх пластах атмасферы для прагназавання небяспечных метэаралагічных з'яў, правядзення радыяцыйна-экалагічнага маніторынгу ў Мінску і на тэрыторыі Беларускай АЭС для разліку распаўсюджвання забруджвання, калі раптам узнікне няштатная сітуацыя.

На сённяшні дзень у Белгідрамета ёсць у распараджэнні тры радыёлакатары: у Мінску, Гомелі і Брэсце. Плануецца забяспечыць адпаведным абсталяваннем Віцебск і Гродна, а таксама замяніць радыёлакатар у Брэсце. Работы па мантажу радыёлакатара ў Віцебску будуць скончаныя ў снежні 2018 года, у Гродне праводзяцца работы па выбары зямельнага ўчастка для размяшчэння радыёлакатара.

Сетка стацыянарных пунктаў назіранняў Белгідрамета не цалкам пакрывае тэрыторыю краіны, асабліва ў частцы назіранняў за ападкамі. У цяперашні час у Беларусі метэаралагічная сетка складаецца з 51 пункта назіранняў, на 38 з іх устаноўлены аўтаматызаваныя метэаралагічныя сістэмы. Да 2020 года плануецца павелічэнне сеткі метэаралагічных назіранняў да 60 пунктаў.

Вольга ПРАЛЮК

Фота аўтара

Выбар рэдакцыі

Культура

На каго палюе русалка?

На каго палюе русалка?

«Прыйшло лета, спякота, і мы ўсё часцей і часцей ідзём на рэчку».

Грамадства

Першая зімоўка на Паўднёвым полюсе можа адбыцца ў 2020 годзе

Першая зімоўка на Паўднёвым полюсе можа адбыцца ў 2020 годзе

«Знаходжанне беларускіх палярнікаў у Антарктыдзе — гэта не вандроўка натуралістаў і не туры для экстрэмалаў, а сур'ёзная і карпатлівая штод

Спорт

Апублікаваны даведнік «Мінск» — карысны для турыстаў і падарожнікаў

Апублікаваны даведнік «Мінск» — карысны для турыстаў і падарожнікаў

Ён быў падрыхтаваны адмыслова напярэдадні II Еўрапейскіх гульняў.

Грамадства

У Полацку ўпершыню знойдзена пахаванне князя

У Полацку ўпершыню знойдзена пахаванне князя

Сярод знаходак — нямала сенсацый.