Вы тут

Як 89-гадовая бабуля з Быхава садзіцца на шпагат


Штодзённая прабежка раніцай і комплексныя фізічныя практыкаванні, халодны душ і бег па снезе басанож — гэта распарадак дня не адчайнага экстрэмала, а звычайнай жанчыны з горада Быхава. І ўсё б нічога, прыгожая палова чалавецтва сёння і не на такое здатная, але нашай гераіні амаль дзевяноста гадоў.


— Навошта пра мяне пісаць, падумаеш, зорку знайшлі, — сціпла кажа Феадосія Нічыпараўна Дудзенка, сустрэўшы нас каля пад'езда.

Але ўсё ж запрашае ў госці. Хутка, нібы і няма амаль векавога цяжару гадоў за плячыма, наша знаёмая падымаецца па лесвічных пралётах. Толькі паспяваем следам. Убачыўшы наша здзіўленне, Феадосія Нічыпараўна толькі ўсміхаецца.

— Што, не чакалі такога спрыту ад бабулі? Я і не тое магу, вось толькі ў кватэру зойдзем — самі пабачыце.

У аднапакаёвай кватэры, дзе жыве Феадосія Нічыпараўна, — ідэальны парадак, прыемна глянуць.

На самым бачным месцы красуюцца фотаздымкі родных, тут жа на трыльяжы можна пабачыць і граматы за добрасумленную працу, за ўдзел у творчых выступленнях.

Не чакаючы, пакуль дапытлівы карэспандэнт усё разгледзіць, Феадосія Нічыпараўна выконвае абяцанне і працягвае здзіўляць: ужо праз хвіліну мая суразмоўніца глядзела знізу ўверх на мой спалоханы твар, элегантна седзячы на шпагаце.

Нельга сказаць, што я не ведаў, куды ішоў, вядома, чакаў пабачыць «спартыўную бабулю». Але каб вось так у 89 гадоў — ды на шпагат! Пакуль я збянтэжана назіраў за акрабатычным трукам «гімнасткі», яна гэтак жа проста і без дапамогі ўзнялася на ногі.

— Сесці на шпагат — гэта справа не аднаго дня, — кажа Феадосія Нічыпараўна. — Трэба кожны дзень расцяжку рабіць і іншыя практыкаванні на гнуткасць цела, толькі тады толк будзе.

З добрай зайздрасцю назіраючы за суразмоўніцай, не мог не запытаць, як у такім паважаным узросце ёй удаецца весці актыўны лад жыцця. І ці ёсць у Феадосіі Нічыпараўны свой сакрэт даўгалецця? Бабуля запэўніла ў адказ, што не мае ніякіх сакрэтаў, акрамя спартыўных практыкаванняў і загартоўвання. А пра гэтыя «сакрэты» яна можа кожнаму расказаць.

— Раніцу пачынаю з зарадкі, — дзеліцца Феадосія Нічыпараўна. Яшчэ лежачы ў ложку, сорак разоў прыпадымаю ногі, затым раблю «нажніцы» і «кручу ровар». Потым устаю і раблю практыкаванні на гнуткасць. Пасля зарадкі выпіваю шклянку вады і з'ядаю ківі. Ну а затым ужо і час халодны душ прымаць. Раніцай бегаю. Зараз, калі выпаў снег, абавязкова — басанож. Ну а ўвечары павольна шпацырую па вуліцы.

Як яна кажа, такія халадовыя ванны дапамагаюць ёй не хварэць круглы год і падтрымліваць бадзёрасць увесь дзень.

У ядзе Феадосія Нічыпараўна прытрымліваецца поўнай свабоды.

— Усё без разбору, што Бог паслаў. Гэтая звычка яшчэ з дзетдома засталася. Калі бацькі памерлі, нас, чатырох дзяцей, адправілі ў дзетдом, там мы і сустрэлі вайну. Чаго толькі не нацярпеліся! Бывала, што і на сметніцах прыходзілася ежу шукаць, — дзеліцца горкімі ўспамінамі суразмоўніца.

...Не ўсім зразумела такое захапленне здаровым ладам жыцця з боку жанчыны. Бо сваім прыкладам Феадосія Нічыпараўна руйнуе ўсе стэрэатыпы аб беларускіх бабулях.

— Першы час здзіўляліся, калі бачылі сляды босых ног на снезе. Пыталіся: як гэта ты так, Феня? Каб было менш пытанняў, стараюся бегаць у час, калі мала хто мяне бачыць.

Занятак фізкультурай — не адзінае хобі Феадосіі Нічыпараўны Дудзенкі. Яшчэ раней, у гады маладосці, яна захапілася спевамі, і гэты творчы запал пранесла праз усё жыццё.

— Працуючы стрэлачніцай на чыгунцы, я заўжды знаходзіла час, каб схадзіць на гурток самадзейнасці ў Дом культуры. Любоў да спеваў жыве ўва мне і сёння. Разам з сябрамі я выступаю ў народным ансамблі «Гаспадыня», мы ўдзельнічаем у святочным жыцці нашага горада і раёна. Таксама, як валанцёр Чырвонага Крыжа, наведваю розныя мерапрыемствы, якія праводзіць гэтая арганізацыя.

Вось такое яскравае жыццё ў нашай гераіні. Няма ёй часу скардзіцца на лёс і цяжкую долю: страціўшы блізкіх, прайшоўшы праз жахі вайны, яна застаецца добрым і спагадлівым чалавекам.

Андрэй САЗОНАЎ

Фота аўтара

Загаловак у газеце: У 89 — на шпагат

Выбар рэдакцыі

Грамадства

Асноўная задача — захаваць біялагічную сям'ю

Асноўная задача — захаваць біялагічную сям'ю

«Звязда» звярнулася па каментарыі аб рэалізацыі Дэкрэта Прэзідэнта № 18 да старшынь профільных камісій абедзвюх палат Нацыянальнага сходу Беларусі.

Грамадства

Аповед жанчыны, якая здолела вярнуць дачку з сацыяльнага прытулку

Аповед жанчыны, якая здолела вярнуць дачку з сацыяльнага прытулку

Жанчыну, якая здолела не толькі вярнуць дзіця з прытулку, але і далей выхоўвае яго, знайсці аказалася не проста. 

Грамадства

Чаму зараз варта далей трымацца ад вадаёмаў?

Чаму зараз варта далей трымацца ад вадаёмаў?

Люты больш нагадвае пазачарговы вясновы месяц.

Грамадства

Якую літаратуру здаюць у букіністычныя крамы?

Якую літаратуру здаюць у букіністычныя крамы?

Калі звычайныя кнігарні працуюць па формуле «кніга — чалавек», то букіністычныя трымаюцца на прынцыпе «людзі — кнігі — людзі».