Вы тут

Для акунання на Вадохрышча падрыхтавана 90 месцаў


Чакаецца, што сёлета каля 160 тысяч беларусаў акунецца ў ваду на праваслаўнае свята Вадохрышча. У сталіцы і Мінскім раёне гэта можна зрабіць у васьмі спецыяльна абсталяваных месцах — на выратавальных станцыях на вадасховішчах Крыніца, Мінскае мора (станцыі Заслаўе-1 і Заслаўе-2), Вяча, Пціч, Дразды, Камсамольскае возера, Цнянскае. Як і летась, сёлета з 19 да 20 студзеня пройдзе чэмпіянат па спартыўным зімовым плаванні, паназіраць за ўдзельнікамі якога можна з 11 да 17 гадзін.


Купанне без стрэсу

Па ўсёй краіне падрыхтавана 90 бяспечных для акунання месцаў — на 54 выратавальных станцыях і 36 выратавальных пастах. Там будуць дзяжурыць ратавальнікі Беларускага рэспубліканскага таварыства выратавання на водах (па краіне 18 і 19 студзеня іх будзе задзейнічана больш за 400), медыкі і супрацоўнікі міліцыі. Там жа будуць абсталяваны і цёплыя памяшканні, дзе можна пераапрануцца і сагрэцца.

— Ужо ўвечары 18 студзеня звычайна прыходзяць першыя ахвотныя акунуцца. Выратавальнікі кантралююць уваход і выхад з вады, які адбываецца па чарзе. Калі чалавек пачне страчваць прытомнасць, мы акажам дапамогу. У сярэднім у ваду чалавек заходзіць на 15—20 секундаў, — расказаў старшыня Беларускага рэспубліканскага таварыства выратавання на водах Анвар Ігамбердыеў.

Правілы падрыхтоўкі

Дзякуючы мерам бяспекі, якія прымаюцца, у апошнія пяць гадоў не было выпадкаў гібелі ці сур'ёзных траўмаў. Тым не менш медыкі папярэджваюць, што нават у абсалютна здаровага чалавека з-за спазмы каранарных артэрый сэрца можа адбыцца яго спыненне. Таму для акунання ў ледзяную ваду арганізм важна падрыхтаваць.

— Папярэдняя падрыхтоўка — гэта загартоўванне, абліванне халоднай вадой. За некалькі тыдняў да акунання важна адмовіцца ад алкаголю. Ён дрэнна ўплывае на сасуды, якія найперш пакутуюць пры знаходжанні ў халоднай вадзе, — кажа галоўны пазаштатны камбусціёлаг Міністэрства аховы здароўя Аляксей Часнойць. — За некалькі гадзін да працэдуры варта добра паесці. Перад акунаннем важна размяцца, выканаць некалькі фізічных практыкаванняў. Апускацца ў ваду варта па шыю, бо пры акунанні з галавой можа адбыцца спазма сасудаў галаўнога мозга. Выходзіць з вады трэба акуратна, каб не паслізнуцца і не атрымаць траўму. Пасля хуценька выцерціся сухім ручніком, цёпла апрануцца і папіць гарачай гарбаты.

Ні ў якім разе перад акунаннем нельга ўжываць алкаголь. Ён стварае ілюзію ўяўнага цяпла, прычым на непрацяглы час, а затым адчуванне холаду толькі ўзмацняецца.

Акунанне ў палонку — працэдура для здаровых людзей. Яна не падыходзіць для тых, хто мае цяжкія хранічныя хваробы, асабліва ў стадыі абвастрэння. Не варта прымушаць рабіць яе родных і блізкіх, асабліва дзяцей і пажылых людзей: яны больш схільныя да пераахалоджвання. І памятайце, што акунацца лепш у падрыхтаваных для гэтага месцах, дзе ёсць ратавальнікі і медыкі. Ці хоць бы ў кампаніі, дзе ёсць магчымасць аказаць вам першую дапамогу.

Даведка

Гэтай зімой у Беларусі патанула 18 чалавек (падчас рыбалкі, хаджэння па лёдзе і інш.). Ратавальнікі папярэджваюць, што ў многіх месцах лёд нетрывалы. Калі на большасці вадасховішчаў Віцебскай вобласці ён складае 7 см і больш, што з'яўляецца бяспечным для выхаду, то ў астатніх рэгіёнах ён ненадзейны. У прыватнасці, у Брэсце на рацэ Мухавец, у Гомельскай вобласці на Дняпры і Прыпяці, на Камсамольскім возеры ў сталіцы лёд з прамыінамі, што вельмі небяспечна.

Алена КРАВЕЦ

Фота Анатоля КЛЕШЧУКА      

Загаловак у газеце: Палонка — не забава

Выбар рэдакцыі

Грамадства

Аповед жанчыны, якая здолела вярнуць дачку з сацыяльнага прытулку

Аповед жанчыны, якая здолела вярнуць дачку з сацыяльнага прытулку

Жанчыну, якая здолела не толькі вярнуць дзіця з прытулку, але і далей выхоўвае яго, знайсці аказалася не проста. 

Грамадства

Чаму зараз варта далей трымацца ад вадаёмаў?

Чаму зараз варта далей трымацца ад вадаёмаў?

Люты больш нагадвае пазачарговы вясновы месяц.

Грамадства

Капыльскі раён. Мінулы год можна назваць стабільным

Капыльскі раён. Мінулы год можна назваць стабільным

Чым Капыльскі раён жыве сёння і якія планы на перспектыву?

Грамадства

Якую літаратуру здаюць у букіністычныя крамы?

Якую літаратуру здаюць у букіністычныя крамы?

Калі звычайныя кнігарні працуюць па формуле «кніга — чалавек», то букіністычныя трымаюцца на прынцыпе «людзі — кнігі — людзі».