Незвычайную статыстыку сабралі ў Гродзенскім абласным драматычным тэатры, каб даць сваім гледачам больш уяўлення пра закуліснае жыццё, умоўна кажучы, ад гардэроба да крэсла ў глядзельнай зале.
Напрыклад, тут падлічылі і прадэманстравалі ў карцінках не толькі колькасць месцаў у вялікай і малой зале (665 і 216 адпаведна), але таксама 776 кручкоў у гардэробе вялікай залы, 3976 лямпачак на ўвесь пяціпавярховы будынак тэатра і 5387 разнастайных сцэнічных убораў, якія захоўваюцца ў касцюмернай.
На сёння ў трупе Гродзенскага драмтэатра занятыя 42 акцёры, у тым ліку 10 сямейных пар, прычым цёплую кампанію беларусам складаюць выхадцы з Расіі, Украіны, Польшчы, Германіі і нават... Мадагаскара.
Квіткі на прадстаўленні тут каштуюць ад пяці рублёў на дзіцячы спектакль да 58 рублёў, калі гаворка ідзе пра самых-самых «зорных» гастралёраў. Дарэчы, на працягу мінулага года, 2018, у тэатры пабывала звыш 105 тысяч гледачоў — лічы, амаль трэцяя частка жыхароў абласнога цэнтра, і гэта на тысячу чалавек больш, чым пазалетась.
Самы стары спектакль у рэпертуары тэатра — «Камедыя пра нешчаслівага селяніна, яго жонку Маланку, жыда Давіда і чорта, які страціў сэнс існавання» па п'есе Уладзіміра Рудава, — галоўны рэжысёр Генадзь Мушперт паставіў яшчэ ў 1995 годзе, і з таго часу яго сыгралі ўжо 350 разоў на родных падмостках, а з улікам гастроляў у іншых гарадах — дык больш за 400 разоў. А самай дарагой з усіх, расказалі ў тэатры, стала пастаноўка 2016 года — перакладзеная на беларускую мову трагікамедыя «Клеменс» паводле літоўскага драматурга Казіса Саі, на падрыхтоўку якой спатрэбілася выдаткаваць суму, эквівалентную 5800 доларам ЗША.
Вікторыя ЗАХАРАВА
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.