Вы тут

Як засцерагчы сябе і хатняга гадаванца ад шаленства


Штогод у краіне рэгіструецца да 600 выпадкаў шаленства, прычым хварэюць як дзікія, так і хатнія жывёлы. Гэтая асабліва небяспечная інфекцыя перадаецца і чалавеку, а калі своечасова не прыняць мер, вядзе да смерці. Як абараніць сябе і сваіх хатніх гадаванцаў, што рабіць, калі вас пакусаў чужы сабака, і як могуць заразіцца хатнія жывёлы? Пра шаленства мы распыталі ўрача-эпідэміёлага Цэнтра гігіены, эпідэміялогіі і грамадскага здароўя Кастрычніцкага раёна Мінска Тамару КОВЕЛЬ.


— Ад каго можна заразіцца шаленствам?

— Успрымальнасць да шаленства ўсеагульная, захварэць можа кожны, нягледзячы на ўзрост і сацыяльны статус. Крыніцай інфекцыі з'яўляюцца хворыя хатнія, сельскагаспадарчыя і дзікія жывёлы — сабакі, каты, лісіцы, грызуны і іншыя. У пераважнай большасці выпадкаў перадача віруса людзям адбываецца ад хатніх сабак і катоў. А яны ў сваю чаргу заражаюцца пры кантакце з хворымі бадзяжнымі або дзікімі жывёламі, грызунамі.

— Як адбываецца перадача віруса?

— Ён перадаецца ад інфіцыраванай жывёлы чалавеку праз укусы, драпіны і асліненні. Прычым, здаровая на першы погляд жывёла можа быць ужо заразнай, паколькі вірус шаленства з'яўляецца ў сліне за 10—12 дзён да выражаных клінічных праяў. Інкубацыйны перыяд у чалавека можа доўжыцца ад 10 дзён да некалькіх месяцаў, у некаторых выпадках нават да года. І калі наступае клінічная стадыя, смерць непазбежная.

— І што рабіць, калі падрапаў вулічны кот?

— Калі адбыўся кантакт з бадзяжнай жывёлай або з хатняй, якая не мае даных аб вакцынацыі, варта неадкладна звярнуцца ў найбліжэйшую медыцынскую ўстанову. Там вас накіруюць да спецыяліста, які правядзе некалькі этапаў прафілактыкі. Па-першае, рану старанна прамываюць вадой з мылам, яе краі апрацоўваюць ёднай настойкай і накладваюць стэрыльную павязку. Затым прызначаецца курс прафілактычных прышчэпак, ён складаецца з шасці ін'екцый. Калі жывёла, з якой адбыўся кантакт, мае гаспадара, за ёй устанаўліваюць ветэрынарнае назіранне. Калі праз 10 дзён яна застаецца здаровай, курс прафілактычных прышчэпак пасля трох ін'екцый прыпыняецца. Калі жывёла бадзяжная і за ёй немагчыма ўстанавіць назіранне, то прышчэпкі робяцца ў поўным аб'ёме.

— Як можна засцерагчы ад небяспекі сваіх гадаванцаў?

— Усе сабакі і каты, незалежна ад пароды і прыналежнасці, павінны штогод прышчапляцца ад шаленства. Хатняга сабаку на вуліцы варта трымаць на кароткім павадку і не дапускаць яго кантактавання з бадзяжнымі сародзічамі. Пры першых прыкметах неўласцівых паводзін жывёлу варта паказаць ветэрынарнаму ўрачу. Пра ўсіх дзікіх жывёл, якія зайшлі ў населеныя пункты, трэба тэрмінова паведамляць у ветэрынарную службу. Пры знаходжанні трупаў жывёл не трэба знімаць з іх скуру. Калі кантакт з падазронай жывёлай усё ж адбыўся, неадкладна звяртайцеся па медыцынскую дапамогу.

Алена КРАВЕЦ

Загаловак у газеце: На вострых іклах і кіпцюрах

Выбар рэдакцыі

Грамадства

Аповед жанчыны, якая здолела вярнуць дачку з сацыяльнага прытулку

Аповед жанчыны, якая здолела вярнуць дачку з сацыяльнага прытулку

Жанчыну, якая здолела не толькі вярнуць дзіця з прытулку, але і далей выхоўвае яго, знайсці аказалася не проста. 

Грамадства

Чаму зараз варта далей трымацца ад вадаёмаў?

Чаму зараз варта далей трымацца ад вадаёмаў?

Люты больш нагадвае пазачарговы вясновы месяц.

Грамадства

Капыльскі раён. Мінулы год можна назваць стабільным

Капыльскі раён. Мінулы год можна назваць стабільным

Чым Капыльскі раён жыве сёння і якія планы на перспектыву?

Грамадства

Якую літаратуру здаюць у букіністычныя крамы?

Якую літаратуру здаюць у букіністычныя крамы?

Калі звычайныя кнігарні працуюць па формуле «кніга — чалавек», то букіністычныя трымаюцца на прынцыпе «людзі — кнігі — людзі».