Вы тут

Мільёны на плячах. Самыя дарагія футры ў свеце


Нарэшце зіма патроху ўспамінае пра тое, што яна зіма, і ўсё часцей радуе нас тым, што ў гэтай пары года павінна быць абавязкова, а менавіта маразамі. Пры тэмпературы ніжэй 15—20 ºС у справу ўступае жаночае футра — асаблівы прадмет гардэробу. Не ўсім, вядома, даступная гэтая прыгажосць, а што датычыцца найлепшых яе экзэмпляраў, то яны па кішэні толькі вельмі заможным грамадзянам. Як нішто іншае, футра паказвае густ і статус сваёй гаспадыні, таму модныя дамы і зоркі шоу-бізнесу, спорту і «звычайныя» багацеі нязменна спаборнічаюць паміж сабой, імкнучыся стварыць або набыць футра, якое будзе здзіўляць як сваёй прыгажосцю, так і коштам.


Прадстаўляем вам пяць самых дарагіх і незвычайных футраў у свеце. Вядома, гэта далёка не поўная падборка дарагіх і стыльных вырабаў такога кшталту. Амаль у кожнай знакамітасці — галівудскай, еўрапейскай, нашай — ёсць свой футра-гардэроб, а яго кошт часта перавышае ўсе разумныя (для звычайных людзей) межы.

На першым месцы — шуба ад Карла Лагерфельда, дызайнера Сhаnеl і Fеndі. Гэты імпазантны 85-гадовы мадэльер заўсёды славіўся ашаламляльнымі калекцыямі. Нават у сваім шаноўным узросце Карл не страчвае натхнення. Адно з яго дзіўных тварэнняў — шуба за 1 мільён еўра, прадэманстраваная на паказе Fеndі. Гэта, без сумневу, самая дарагая шуба ў свеце.

Для таго каб увасобіць у жыццё гэты цуд дызайнерскай думкі, спатрэбілася 60 скурак собаля — аднаго з самых каштоўных і дарагіх футраў. Баргузінскі собаль — эксклюзіўны, футра ў яго насычана-цёмнае, з ноткай сівізны і трохі блакітнаватым адценнем. Менавіта яго і выбраў Лагерфельд для сваёй задумкі. Шуба, і праўда, выглядае цудоўна. Футра апрацавалі адмысловым спосабам, каб здавалася, быццам яго асвятляе святло месяца. Боская прыгажосць і недасяжны кошт — у гэтым увесь Лагерфельд.

На другім месцы — італьянскі дом моды Lоrо Ріаnа са сваімі вырабамі з футра вікуньі. Вікунья — жывёла з пароды лам, якая водзіцца толькі ў Перу. Гэта прадмет нацыянальнага гонару краіны, таму іх адлоў строга рэгламентаваны і абмежаваны. Знайсці паўнавартаснае футра з вікуньі ўжо амаль немагчыма, італьянцы ў асноўным робяць паліто і жакеты з воўны гэтай жывёлы. Lоrо Ріаnа — адна з нешматлікіх кампаній, якая мае легальны дазвол на вытворчасць менавіта шуб з вікуньі.

Мех у гэтай сваячкі ламы густы, мяккі і прыгожы, але на дзіва тонкі. У старажытныя часы насіць адзенне з такога футра і воўны маглі толькі прывілеяваныя інкі, людзі з «чыстай крывёй Сонца». Усе астатнія не смелі дакранацца да вікуньі пад страхам смерці.

Сёння, каб купіць кажушок з гэтага футра, ужо не патрэбныя доказы высакароднага паходжання. Хіба што фінансавага становішча. Задавальненне гэта нятаннае, адзін метр тканіны з вікуньі можа каштаваць больш за 5 тысяч еўра, а цана гатовага жакета з воўны ад Lоrо Ріаnа пачынаецца ад 15 тысяч еўра. Калі ж вам пашчасціць знайсці шубу з суцэльнага футра вікуньі (іх у свеце зусім мала), то яе кошт дакладна будзе казачным — каля 300 тысяч еўра.

На трэцім месцы актрыса Шэран Стоўн, якая любіць натуральныя шубы і кожны раз паказваецца на публіцы ў новым уборы. Нават на Канскім кінафестывалі, у спякоту, Шэран абавязкова з'яўляецца ў паўшубку з каштоўнага футра. Але асабліва кіназорка здзівіла сваіх прыхільнікаў уборам з футра лісіцы. Гэта шыкоўная доўгая накідка, у якой Шэран з'явілася на адным з дабрачынных мерапрыемстваў супраць СНІДу ў Рыме. Для таго каб пашыць такі выраб, спатрэбілася 40 лісіных скурак. На думку спецыялістаў, доўгая футравая накідка абышлася ўладальніцы прыкладна ў 200 тысяч долараў.

На чацвёртым месцы самых дарагіх шуб расійская спявачка Алсу са сваім кажушком, кошт якога, па чутках, складае 100 тысяч долараў. Шыкоўную абноўку з футра шыншылы вядомая спявачка атрымала ад мужа Яна Абрамава на чарговы дзень нараджэння.

Шыншыла цэніцца за цікавую расфарбоўку. Прырода падарыла ёй дзіўнае футра, яно вельмі лёгкае і пераліваецца некалькімі адценнямі адначасова. З адной валасяной цыбуліны расце да 80 найтанчэйшых валасінак футра, таму яно выглядае такім пухнатым. Асабліва прыгожа шубы з шыншылы глядзяцца на выгібах, дзе футра блішчыць і пераліваецца. Алсу любіць рэдкія футры, і ў сваёй дарагой абноўцы таксама выглядае раскошна.

Завяршае нашу падборку на пятым месцы Мэрылін Манро, вядомы знаток футраў. У гардэробе гэтай актрысы і спявачкі было мноства шуб і паўкажушкоў з пясца, норкі, куніцы, лісы. Але асаблівым хітом стаў паланцін з гарнастая, які яна надзявала перад візітам на дзень нараджэння Джона Кенэдзі. Гарнастай — адзін з найкаштоўнейшых і рэдкіх футраў, здаўна ім падбівалі каралеўскія мантыі. Яго мяккае і трывалае футра з ідэальнай белізной упрыгожвала ўборы самых заможных людзей. Футра гарнастая сімвалізуе высакароднасць і чысціню намераў. Беласнежны паланцін Манро, дарэчы, стаў сапраўдным хітом моды таго часу, і яшчэ некалькі гадоў яго спрабавалі капіраваць. Шмат гадоў паланцін Манро ляжаў без справы і зусім нядаўна быў прададзены з аўкцыёну за 69 тысяч долараў.

Выбар рэдакцыі

Грамадства

На Гомельшчыне актыўна развіваюць валанцёрскі рух

На Гомельшчыне актыўна развіваюць валанцёрскі рух

Форма сацыяльнай актыўнасці падлеткаў.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».