Вы тут

«Здаровы воўк звычайна не нападае на людзей»


На Стаўбцоўшчыне хворы на шаленства воўк напаў на людзей. Пацярпелі чатыры чалавекі.


Першыя звесткі аб нападзе дзікага звера, верагодна ваўка, паступілі ў міліцыю 26 студзеня ў 22.55. Як расказаў “Звяздзе” намеснік начальніка Стаўбцоўскага РАУС па ідэалагічнай рабоце і кадравым забеспячэнні, маёр міліцыі Уладзімір Кудрэвіч, у вёсцы Слабада, што знаходзіцца недалёка ад Стоўбцаў, драпежнік параніў мужчыну, а затым яго аднасяльчанку. Дзякуючы мясцовым жыхарам, ваўка атрымалася адагнаць віламі. Каб разабрацца ў сітуацыі, на месца выехаў нарад міліцыі.

Але на гэтым падарожжа драпежніка не скончылася. Праз некаторы час зноў паступіла інфармацыя: каля прыпынку “Акінчыцы” воўк напаў на маладую пару, а затым рушыў у напрамку Стоўбцаў. У райцэнтры агрэсіўнага драпежніка, які кідаўся на аўтамабіль, заўважыў мясцовы жыхар і паведаміў пра гэта ў міліцыю. Для яго абясшкоджвання на вуліцу 17-га верасня выехаў нарад Дэпартамента аховы і два экіпажы ДАІ.

Ваўка заўважылі на ўскраіне горада. Міліцыянеры некалькі разоў стрэлілі па ім, але толькі паранілі. Звер выбег на поле, а потым схаваўся ў лясным масіве непадалёку. Там міліцэйскія нарады заблакавалі яго, а потым з дапамогай паляўнічага з цеплавізарам ён быў забіты. Пагоня за драпежнікам працягвалася да чатырох гадзін раніцы.

Пацярпелыя – дзве жанчыны і два мужчыны – былі накіраваныя ў Стаўбцоўскую цэнтральную раённую бальніцу. Высветлілася, што на іх напала ваўчыца, якой каля трох гадоў. Спецыялісты Стаўбцоўскай раённай ветэрынарнай станцыі правялі аналізы і высветлілі, што драпежніца была хворая на шаленства. Дыягназ пацвердзілі і ў Мінскай абласной ветэрынарнай лабараторыі.

Вядучы ветэрынарны ўрач Стаўбцоўскай раённай ветэрынарнай станцыі Марыя Каспяровіч расказала, што выпадкі шаленства сярод ваўкоў у рэгіёне не рэгістраваліся ўжо каля дваццаці гадоў:

– Каб прадухіліць магчымае захворванне людзей і хатніх жывёл, на два населеных пункты – Слабаду і Стаўбцы – накладзены двухмесячны каранцін. Праводзіцца падваровы абыход і растлумачальная работа з насельніцтвам, выяўляюцца і адлоўліваюцца падазроныя і бадзяжныя жывёлы. На ўсіх актыўна наведваемых жыхарамі месцах размешчаны памяткі пра небяспеку, якую нясе шаленства, і правілы паводзін у такіх сітуацыях.

Акрамя таго, спецыялісты заклікаюць жыхароў райцэнтра і Слабады вакцынаваць сваіх катоў і сабак. Каб людзі змаглі хутка гэта зрабіць, быў нават падоўжаны час працы гарадской ветклінікі.

Як адзначыў навуковы супрацоўнік лабараторыі папуляцыйнай экалогіі наземных пазваночных і кіравання біярэсурсамі НПЦ НАН Беларусі па біярэсурсах Павел Велігураў, здаровы воўк звычайна не нападае на людзей. Выключэнне могуць складаць сітуацыі, калі звер ахоўвае вывадак. Але пры гэтым ён баіцца чалавека і не заходзіць у населеныя пункты. Пры захворванні ж на шаленства гэта боязь знікае. Таму калі воўк усё ж напаў – значыць, з вялікай доляй верагоднасці, ён хворы.

Напасці на чалавека могуць таксама і гібрыды ваўка і сабакі – так званыя ваўкасобы – але звычайна яны так агрэсіўна сябе не паводзяць.

Вераніка КОЛАСАВА

Загаловак у газеце: Звер у горадзе

Выбар рэдакцыі

Калейдаскоп

Каля 150 спартсменаў-аматараў хочуць выступіць у «даеўрапейскіх гульнях»

Каля 150 спартсменаў-аматараў хочуць выступіць у «даеўрапейскіх гульнях»

Трэніроўкі і здымкі ўдзельнікаў пачнуцца ў красавіку.

Грамадства

Сувораўскае вучылішча вачыма яго навучэнцаў

Сувораўскае вучылішча вачыма яго навучэнцаў

Быць сувораўцам ва ўсе часы было прэстыжна. 

Культура

Харвацкі кінафестываль ZаgrеbDох даследуе рэгіён вялікім экранам

Харвацкі кінафестываль ZаgrеbDох даследуе рэгіён вялікім экранам

Балканскія краіны паўсталі перад гледачом з іх надзённым.