Вы тут

Сёння адкрываецца выстава гравюраў Германа Штрука


31 студзеня 2019 года а 17-й гадзіне ў Нацыянальным мастацкім музеі Рэспублікі Беларусь адкрыецца выстава «Графіка Германа Штрука», на якой будуць прадстаўлены графічныя работы вядомага нямецкага мастака Германа Штрука (1876-1944) з прыватнай калекцыі Уладзіміра Багданава (Мінск).


Драўляная сінагога ў Гродне

Аснову экспазіцыі складаюць 50 работ, створаных на тэрыторыі Беларусі, Літвы і Латвіі ў час Першай сусветнай вайны, калі Штрук служыў у германскай арміі на Усходнім фронце.

Выдатны майстар нямецкай гравюры Герман Штрук нарадзіўся ў 1876 годзе ў Берліне ў артадаксальнай яўрэйскай сям’і. Скончыў Берлінскую акадэмію мастацтваў, хутка праславіўся як майстар літаграфіі і афорта, увайшоў у берлінскую мастацкую эліту, удзельнічаў у творчым аб’яднанні «Берлінскі Сецэсіён». Шмат падарожнічаў, пабываў у Даніі, Палестыне, Швейцарыі, Швецыі, Вялікабрытаніі, ЗША. У кожным падарожжы рабіў шмат замалёвак.

Від на Гродна

Штрук актыўна займаўся педагагічнай дзейнасцю, сярод яго вучняў – вядомыя нямецкія мастакі Ловіс Корынт (копія яго партрэта Штрука прадстаўлена на выставе), Уры Лесер, Макс Слефогт. У 1908 годзе Герман Штрук выпусціў кнігу «Мастацтва афорта», якая вытрымала некалькі выданняў і стала дапаможнікам для многіх пакаленняў мастакоў. Штрук унёс нямала новага ў мастацтва графікі, выпрацаваў уласную тэхніку, камбінуючы розныя прыёмы гравіравання, умеў гравіравать з натуры адразу на дошку, не робячы накідаў.

Сустрэча з Германам Штрукам адыграла значную ролю ў жыцці Марка Шагала. Яны пазнаёміліся ў 1922 годзе ў Берліне, куды Шагал прыехаў, канчаткова пакінуўшы радзіму. З дапамогай Штрука Шагал авалодаў тэхнікамі афорта і літаграфіі (да гэтага ён гравіраваннем не займаўся) і ўжо ў 1923 годзе стварыў серыю графічных ілюстрацый да сваёй аўтабіяграфіі «Маё жыццё». Партрэт Марка Шагала работы Штрука, створаны ў той перыяд, таксама прадстаўлены на выставе.

Гандлёвая плошча ў Лідзе

У гады Першай сусветнай вайны Штрук, будучы нямецкім афіцэрам і членам Яўрэйскага камітэта дапамогі Польшчы і Літве, аб’ездзіў занятыя нямецкімі войскамі тэрыторыі Польшчы, Літвы, Латвіі і Беларусі. Пры гэтым ён, як звычайна, рабіў замалёўкі ўсіх тых месцаў, што сустракаліся на яго шляху. Вынікам гэтай працы сталі графічныя альбомы «Замалёўкі Літвы, Беларусі і Курляндыі» (1916) і «Аблічча ўсходняга яўрэйства» (1920), выдадзеныя ў Берліне.

Аснову экспазіцыі гэтай выставы склалі гравюры, якія ўвайшлі ў альбом «Замалёўкі Літвы, Беларусі і Курляндыі». Гэта пейзажы гарадоў Беларусі, Літвы і Латвіі, бытавыя замалёўкі, партрэты мясцовых жыхароў розных прафесій і нацыянальнасцей.

Крама ў Гродне

Літоўскі дрывасек

Ловіс Корынт. Партрэт мастака Германа Штрука

Малітва старой літоўкі

Парадная плошча ў Коўна

Партрэт Марка Шагала

У францысканскага кляштара

Яўрэйская вулачка ў Вільне

Выстава будзе экспанавацца з 31 студзеня па 24 лютага 2019 года

Выбар рэдакцыі

Спорт

Аляксандра Герасіменя: У кожнага свой рэцэпт поспеху

Аляксандра Герасіменя: У кожнага свой рэцэпт поспеху

Аляксандра Герасіменя — сапраўдны баец, а яшчэ — клапатлівая маці і жонка. І проста працавіты чалавек, які не ведае перашкод.

Грамадства

Якія сацыяльныя ініцыятывы беларусаў атрымалі прызнанне на Sосіаl Wееkеnd

Якія сацыяльныя ініцыятывы беларусаў атрымалі прызнанне на Sосіаl Wееkеnd

Прыз сімпатый гледачоў заваявала ініцыятыва «Школа бацькоўства».

Грамадства

Гісторыя дзяўчыны, якая перамагла анарэксію

Гісторыя дзяўчыны, якая перамагла анарэксію

Здараецца, што ў пагоні за прыгожай фігурай некаторыя дзяўчаты зусім перастаюць есці.

Грамадства

Успаміны былой вязніцы пра Саласпілскі лагер смерці

Успаміны былой вязніцы пра Саласпілскі лагер смерці

Яна добра памятае той летні дзень. За акном сталі чутныя роў матацыклаў і нямецкая гаворка.