Вы тут

Кніжная выстаўка стартуе ў сераду і ўпершыню пройдзе на розных пляцоўках


6 лютага стартуе адна з самых маштабных літаратурных падзей года — ХХVІ Мінская кніжная выстаўка-кірмаш — і будзе доўжыцца да 10 лютага ўключна. На выстаўцы ёсць што паглядзець, пачытаць і каго ўбачыць. Цікавосткай гэтага года з'яўляецца тое, што праходзіць кніжны кірмаш не толькі ў выставачным павільёне «Белэкспа» па адрасе Пераможцаў, 14. Сёлета мерапрыемства разгорнецца і на многіх іншых пляцоўках.


Мастацтва графікі

Свой арыгінальны падыход да жыцця кніжнага прапануе галерэя Саюза дызайнераў Беларусі (вул. Казлова, 3). Ужо напярэдадні ММКВК, 5 лютага ў 17 гадзін, адкрыецца выстаўка кніжнай графікі беларускіх мастакоў. Найлепшыя ўзоры кніжнай графікі можна будзе пабачыць цягам усіх дзён кніжнага кірмашу ў Палацы мастацтва.

У экспазіцыі, што пройдзе ў дзвюх залах Рэспубліканскай мастацкай галерэі і будзе ўключаць у сябе каля 90 работ, беларускія аўтары розных пакаленняў прадэманструюць найлепшыя прыклады сваёй творчасці, звязаныя з мастацтвам кнігі. Побач з працамі такіх прызнаных мэтраў кніжнай графікі, як Валерый Славук, Віктар Мікіта, Уладзімір Савіч, гледачам будзе прадстаўлена і творчасць мастакоў з пакалення 2000-х гадоў: Паўла Татарнікава, Юрыя Якавенкі, Генадзя Мацура, Ігара Гардзіёнка, Уладзіміра Даўгялы, Маргарыты Цімохавай, Тамары Шэлест. Таксама прадставяць свае работы студэнты кафедры графікі Беларускай дзяржаўнай акадэміі мастацтваў.

На прыкладах, якія ўключаюць у сябе не толькі традыцыйную ілюстрацыю, але і мастацтва шрыфту ці кніжнага знака — экслібрыса — гледачы ўбачаць, як мастакі кнігі, не губляючы сувязі з адметнымі формамі, характэрнымі для беларускай школы, з лёгкасцю працягваюць засвойваць і прагрэсіўныя набыткі сусветнай школы мастацтва кнігі. Трымаючы ў руках сапраўдную папяровую кнігу (новы томік любімых вершаў ці зборнік цудоўна аздобленых мастаком дзіцячых казак), госці выстаўкі змогуць паглыбіцца ў яе сусвет, адчуць і зразумець яе гісторыю, ацаніць велічэзную працу не толькі аўтара, але і мастакоў і ўсіх тых, хто падарыў кнізе жыццё.

І легенды, і паданні

Як расказаў дырэктар выдавецтва «Мастацкая літаратура» Алесь Бадак, іх кніжныя навінкі будуць прадстаўлены і на розных пляцоўках Мінскай міжнароднай кніжнай выстаўкі. Асаблівую папулярнасць, на яго думку, будзе мець серыя «Дзіцячы атлас Беларусі». 6 лютага ў 14 гадзін у краме «КнігаПоліс» (вул. Сурганава, 46) адбудзецца творчая сустрэча з удзелам аднаго са складальнікаў выдання Дзмітрыем Пятровічам. На выстаўцы прэзентуюць таксама выданне «Легенды і паданні Беларусі». Як аказалася, дзецям надзвычай цікавыя такія на першы погляд сур'ёзныя тэмы, як музыка, культура, традыцыі, таму сёлета запланаваны выхад яшчэ 5-6 такіх выданняў пра мастакоў, іншых культурных дзеячаў нашай краіны.

8 лютага ў 16 гадзін у «КнігаПолісе» можна будзе сустрэцца з Васілём Дранько-Майсюком і яго новым выданнем «Таямніца нашага садка». А бліжэй да канца выстаўкі, 9 лютага ў 13 гадзін, варта зазірнуць у кнігарню «Вянок» (Траецкая набярэжная, 4) на аўтограф-сесію Пятра Васючэнкі, каб набыць яго новую кнігу «Жаласлівая каралеўна». Абодва выданні пабачылі свет у «Мастацкай літаратуры».

Славянскія казкі і гісторыя князёў

Спецыяльна з Францыі ў Беларусь гэтымі днямі завітае апавядальніца, пісьменніца, педагог і тэрапеўт Ганна Лазоўскі. Свае сустрэчы з чытачамі яна распачне яшчэ 4 лютага ў Гродне, дзе ў 14 гадзін у абласной бібліятэцы (вул. Замкавая, 20) сустрэнецца з франкафонамі і іншымі зацікаўленымі. 5 лютага Ганна Лазоўскі адкажа на пытанні франкамоўных мінчан — у 15.30 у Французскай медыятэцы (вул. Гікалы, 4).

Пісьменніца з'яўляецца аўтарам дзвюх анталогій аб культурнай спадчыне і выдуманых светах: «Казкі славянскіх мудрацоў» і «Казкі скандынаўскіх мудрацоў», якія выйшлі ў Францыі. У кастрычніку 2018 года ў яе выйшла кніга «Вакол Балтыкі», якая аб'ядноўвае тры казкі — славянскую, скандынаўскую і дацкую. А ў сакавіку 2019 года выйдзе яе кніга «Казкі мудрацоў — захавальнікаў мораў», у якой аўтар звяртаецца з паэтычным заклікам ахоўваць і засцерагаць акіяны.

У Прэзідэнцкай бібліятэцы Беларусі гэтымі днямі пагавораць пра гісторыю Мірскага замка. Тут адбудзецца прэзентацыя міжнароднага культурнага праекта, які ў 2019—2020 гадах будзе рэалізоўвацца «Замкавым комплексам «Мір» сумесна з Дырэкцыяй рэгіянальных паркаў Павільна і Верка ў Літве. Акрамя таго, 7 лютага ў Прэзідэнцкай бібліятэцы будзе прадстаўлена калектыўная манаграфія «Князі Вітгенштэйны і іх уладанні ў Расійскай Імперыі ў ХІХ стагоддзі» (і Мір, і Веркаўскі палацы ў ХІХ стагоддзі належалі князям Вітгенштэйнам).

Згаданая манаграфія прысвечана гісторыі роду князёў Вітгенштэйнаў, якія ў ХІХ стагоддзі мелі вялізныя ўладанні на тэрыторыі сучасных Літвы, Беларусі, Расіі і Малдовы. У кнізе адлюстраваны падзеі, якія дагэтуль мала асвятляліся ў беларускай гістарыяграфіі, а аснову яе склалі даклады міжнароднай навуковай канферэнцыі «Князі Вітгенштэйны і іх уладанні ў ХІХ стагоддзі», якая адбылася ў музеі «Замкавы комплекс «Мір» у 2015 годзе.

Акварэль і... мёд

Натуральна, шмат самых разнастайных мерапрыемстваў пройдзе ў самім выставачным цэнтры «БелЭкспа». Адным з экспанентаў будзе Выдавецкі дом «Звязда».

7 лютага ў 15 гадзін на стэндзе выдавецтва разгорнецца надзвычай цікавае дзейства — прэзентацыя рубрыкі «Клуб пчаляроў» часопіса «Родная прырода». Сюды завітаюць найлепшыя пчаляры нашай краіны, якія падзеляцца сакрэтамі пчалярскай справы. Тут жа адбудзецца і дэгустацыя мёду!

А 8 лютага ў 18 гадзін на стэндзе «Звязды» адбудзецца аўтограф-сесія Людмілы Рублеўскай. Чытачы змогуць пазнаёміцца не толькі з самой пісьменніцай, але і з яе новай, пятай, кнігай серыі «Авантуры Пранціша Вырвіча» — «Авантуры Вырвіча з банды Чорнага Доктара». Гэтыя «раманы прыгодніцкія і фантасмагарычныя» — так акрэслівае жанр твораў сама пісьменніца — знаёмяць чытачоў з захапляльнымі прыгодамі шляхціца Пранціша Вырвіча і яго вернага спадарожніка доктара Баўтрамея Лёдніка. Падзеі ў творах адбываюцца ў ХVІІІ стагоддзі — у эпоху авантурыстаў і алхімікаў, рыцараў і чароўных дам, палацавых інтрыг і крывавых войнаў...

9 лютага ў 15.30 «Звязда» прэзентуе альбом «Акварэльны сусвет Вячаслава Паўлаўца». Можна будзе ўбачыць і выстаўку акварэляў мастака. Плануецца музычнае выступленне струннага квартэта выкладчыкаў музычнай школы № 15.

Пасля праграмы на галоўнай сцэне на стэндзе выдавецкага дома Вячаслаў Паўлавец правядзе майстар-клас па акварэлі. Тут жа адбудзецца бяспройгрышная латарэя твораў мастака.

* * *

Натуральна, што гэта толькі некаторыя мерапрыемствы насычанай праграмы ХХVІ Мінскай міжнароднай кніжнай выстаўкі-кірмашу. Завітвайце самі — усё астатняе пабачыце на свае вочы.

Ніна ШЧАРБАЧЭВІЧ

Загаловак у газеце: Найвялікшы набытак — кніга

Выбар рэдакцыі

Грамадства

Як жывуць апошнія жыхары вёскі Вясневічы

Як жывуць апошнія жыхары вёскі Вясневічы

Галоўная славутасць Вясневічаў, яе жывая гісторыя — 96-гадовы Аляксей Юркевіч.

Культура

Наталля Батракова: Чытачы пішуць, што мае героі нібыта працуюць у суседнім офісе

Наталля Батракова: Чытачы пішуць, што мае героі нібыта працуюць у суседнім офісе

З Наталляй Батраковай мы сустрэліся на адкрыцці абноўленай кнігарні «Светач», што на сталічным праспекце Пераможцаў, 11. 

Калейдаскоп

Вясёлыя гісторыі чытачоў

Вясёлыя гісторыі чытачоў

Чакаем смешных гісторый і ад вас!