Вы тут

Усе здарэнні — на неабсталяваных горках


За месяц у сталіцы 120 дзяцей атрымалі траўмы галавы падчас катання на цюбінгу.

З пачатку года ў РНПЦ неўралогіі і нейрахірургіі паступіла 1050 дзяцей з чэрапна-мазгавымі траўмамі. З іх 120 — з цюбінгавымі траўмамі. Для параўнання: тых, хто пацярпеў падчас катання на санках, лядзянцы ці на нагах, у шэсць разоў менш — каля 20 чалавек.


— Усе траўмы адбыліся на спантанна сфарміраваных горках. Там, дзе катацца на цюбінгу забаронена катэгарычна: каля школ, у дварах, дзе прыпаркаваны аўтамабілі. Часта дзеці, 9—12 гадоў, ходзяць на горкі без суправаджэння дарослых, — заўважае ўрач нейрахірургічнага аддзялення РНПЦ неўралогіі і нейрахірургіі Аляксандр КОРАНЬ.

Чаму колькасць такіх здарэнняў у гэтым сезоне значна вырасла? Урачы называюць дзве прычыны: цюбінгі сталі больш папулярнымі, а матэрыялы, з якіх яны робяцца, больш якаснымі, за кошт чаго павялічваецца хуткасць руху па снезе.

Забараняць «ватрушкі» ніхто не збіраецца, але дзяцей і бацькоў заклікаюць выконваць меры бяспекі.

— Галоўнае — катацца на абсталяваных трасах. Бо спецыяльны схіл для цюбінга — гэта, як правіла, жолаб, там мінімальная імавернасць вылецець з трасы. І вугал нахілу гары не павінен перавышаць 20 градусаў, інакш будзе занадта вялікі разгон, — кажа Намір АЛЬТАН, траўматолаг-артапед прыёмнага аддзялення траўматалогіі 6-й гарадской клінічнай бальніцы. — Таксама трэба выкарыстоўваць цюбінгі, падыходзячыя па памеры. У вялікім дзіця не зможа трымацца за ручкі. Нельга спускацца паравозікам. А калі ўжо ідзяце на неабсталяваную горку, то трэба хаця б спачатку прайсціся ўздоўж, паглядзець, ці ёсць там якія няроўнасці, бо гэта адразу змяняе траекторыю руху цюбінга.

У Мінску камунальшчыкі праводзілі маніторынг усіх схілаў і горак у жыллёвай забудове. Аказалася, што амаль траціна з іх выкарыстоўваецца для катання, хоць абсалютна для гэтага не прызначаныя. Такія горкі пасыпалі пяском, каб папярэдзіць слізганне, на дошках інфармавання павесілі аб'явы, што з'язджаць на цюбінгу тут небяспечна.

Абсталяваць схілы ў жылым сектары сталіцы немагчыма: высокая шчыльнасць забудовы. Але спецыяльныя горкі для цюбінгу ў Мінску ёсць — напрыклад, побач з «Чыжоўка-Арэнай», у Шабанах. Бясплатныя абсталяваныя горкі для гэтай забавы з'явяцца і ў парку Уга Чавеса. Плануецца, што іх будзе дзве: для дзяцей малодшага і старэйшага ўзросту (апошняя — з больш крутымі схіламі).

На адным з прадпрыемстваў, дзе вырабляюць спортінвентар (у тым ліку і цюбінгі), задумваюцца, як зрабіць гэту прыладу для катання больш бяспечнай.

— Мы падрыхтавалі невялікую доследную партыю бяскамерных цюбінгаў — такія не выстраляць, калі раптам матэрыял парвецца. Каб паўплываць на хуткасць, можна зрабіць цюбінг набіўным, — расказвае дырэктар прадпрыемства «Зубрава» Мікалай ШЫРОКІ. — Але наша прадукцыя — кропля ў моры. Ёсць яшчэ шмат кітайскіх, іншых беларускіх вытворцаў.

Ён адзначае, што продажы цюбінгаў крыху знізіліся. Але звязвае гэта не з траўмамі, а з канкурэнцыяй на рынку: людзі набываюць больш танныя «ватрушкі» іншых прадпрыемстваў.

Наталля ЛУБНЕЎСКАЯ

Выбар рэдакцыі

Грамадства

Як сучасныя палешукі рыхтуюцца да свята Уваскрэсення Хрыстовага

Як сучасныя палешукі рыхтуюцца да свята Уваскрэсення Хрыстовага

Аўтар «Звязды» расказвае на прыкладзе сваёй сям'і.

Культура

ЗЕНА: Ад сцэны не стамляюся!

ЗЕНА: Ад сцэны не стамляюся!

Графік у артысткі вельмі насычаны.

Грамадства

Звыклыя выключнасці. Ці можна зразумець «лічбавае племя»?

Звыклыя выключнасці. Ці можна зразумець «лічбавае племя»?

Даследаванне «Пакаленне «Z» у пытаннях і адказах» было прадстаўлена падчас навуковага стэндапа, арганізаванага для навучэнцаў профільных педагагічных класаў у БДПУ.

Грамадства

Ежа ці сімвал? Самы час зацікавіцца роспісам яек

Ежа ці сімвал? Самы час зацікавіцца роспісам яек

Карэспандэнт «Звязды» схадзіла на майстар-клас па стварэнні «пісанак».