Вы тут

У фінале адбору на «Еўрабачанне» — артысты з Беларусі, Швецыі і Нігерыі


4 лютага ў сценах Белтэлерадыёкампаніі адбылося праслухоўванне прэтэндэнтаў на ўдзел у міжнародным конкурсе «Еўрабачанне-2019», што пройдзе сёлета ў Тэль-Авіве. Да вочнага этапу дабраліся, праўда, не ўсе 113 артыстаў і калектываў, якія адправілі заяўкі з 16 краін свету, — гэта найвялікшая колькасць удзельнікаў адбору за апошнія сем гадоў. Але ўсё адно фокус-групе экспертаў, у якую ўвайшлі музычныя прадзюсары, папулярныя выканаўцы, кіраўнікі музычных калектываў, тэлевядучыя і прадстаўнік Міністэрства культуры, давялося правесці каля пяці гадзін у рэжыме жывых спеваў. Па выніках праслухоўвання былі вызначаныя дзесяць удзельнікаў фінальнага гала-канцэрта, які пройдзе ў тэрмін да 8 сакавіка — і менавіта падчас яго стане вядомы прадстаўнік нашай краіны на песенным шоу.


Як ні крыўдна, гледачы ў гэтым годзе будуць толькі пасіўнымі назіральнікамі — выбар у прамым эфіры адкрытым галасаваннем зробіць журы, склад якога пакуль што не называецца. Але гэта не значыць, што нам з вамі не варта ведаць, сярод каго, уласна кажучы, профі выбіраюць музычнага дэлегата ад Беларусі: хто яны, удзельнікі фінальнай  дзясяткі, і пра што спяваюць. Расказваем крыху больш пра канкурсантаў — у тым парадку, у якім мы ўбачым іх на гала-канцэрце, паводле жараб'ёўкі.

1. Mіchael Soul — Humanіze

Ураджэнцу Брэста Міхаілу Сасунову 22 гады, большую частку якіх юнак займаецца музыкай і з пераменным поспехам удзельнічае ў самых розных эстрадных конкурсах. Летась, напрыклад, Міхаіл бліскуча выступіў ва ўкраінскім шоу «Голас краіны», хоць і не дайшоў да фіналу. А яшчэ ён ужо заяўляў аб сабе на нацыянальным адборы (у 2015 годзе ў складзе эпатажнага хлапчуковага дуэта The EM) і нават выступаў на «Еўрабачанні», праўда, у якасці бэк-вакаліста NavіBand. Конкурсную песню Міхаіл прадстаўляе як «сацыяльную баладу, што закранае праблемы сучаснага грамадства», — просьбу да кожнага слухача быць крыху больш міласэрным у наш няпросты час.

2. ЗЕНА — Lіke іt

Зіне Купрыяновіч 16 гадоў, і яна самая юная сярод фіналістаў, але ўжо загартаваная артыстка: за яе плячыма выступленні на «Славянскім базары» і «Новай хвалі», удзел у адборах дзіцячага «Еўрабачання», вучоба ў эстраднай акадэміі Ігара Крутога і супрацоўніцтва з Нацыянальнай музычнай карпарацыяй Віктара Дробыша. Уласна, менавіта цяперашні прадзюсар ажно да фіналу забараніў маладой спявачцы зносіны з прэсай.

3. Ева Коган — Run

Дзяўчыне сёлета споўніцца 19, яна вучыцца ў Мінскім дзяржаўным каледжы мастацтваў і менавіта з музыкай плануе звязаць сваю будучыню. На рахунку маладой спявачкі — 3-е месца ў рэспубліканскім конкурсе «Маладыя таленты Беларусі» і паспяховыя выступленні ў шэрагу іншых беларускіх і міжнародных конкурсаў. Патэнцыйны хіт для «Еўрабачання» ёй напісалі кампазітар Леанід Шырын і паэтка Наталля Тамбоўцава.

4. Эмануэль Імагбэ (Нігерыя) — Champіon

Сціплы студэнт Віцебскага медуніверсітэта, «містар ВДМУ — 2018» амаль усё праслухоўванне засяроджана прасядзеў у кутку і настройваўся, а напрыканцы выйшаў і прадэманстраваў усім астатнім, як трэба спяваць соўл, — каб выкананне прабірала да мурашоў на спіне. Наогул, 24-гадовы Эмануэль Імагасакуа Імагбэ — найменш «раскручаны» з усіх фіналістаў, але тым і цікавы: словы песні «Чэмпіён» ён напісаў сам за пару тыдняў, з музыкай дапамог сябар-электроншчык BLGN, а вынік такі, што многім варта пазайздросціць.

5. Sebastіan Roоs (Швецыя) — Never Gettіng Close

37-гадовы Себасцьян Карл Рос — асоба даволі вядомая не толькі ў роднай Швецыі, але наогул у Еўропе, дзе шмат гастралюе з кавер-гуртом Lіverpool і перапявае хіты The Beatles. І хоць сам музыкант сцвярджае, што захапляецца цяжкай музыкай, але на суд журы беларускага адбору ён вынес тыповую ванільную баладу шведска-іспанскага аўтарства — мы сотні разоў чулі падобныя ад шведскіх выканаўцаў і яшчэ столькі ж пачуем...

6. Алена Гарбачова — Can we dream

Яшчэ адна ўраджэнка Брэста, вядомая па працы з музычным калектывам VІP Jazz, якая не толькі шмат выступае ў якасці клубнай спявачкі, але таксама працуе педагогам па вакале ў прадзюсарскім цэнтры «Спамаш». Удзельнічала ў беларускім адборы на «Еўрабачанне» яшчэ ў 2012 годзе, але да фіналу дабралася толькі цяпер.

7. Гурт «PRAвакацыя» — Runnіng Away From The Sun

Дуэт студэнтаў Беларускага дзяржаўнага ўніверсітэта культуры і мастацтваў Арцёма Саладухі і Марка Вайтко быў створаны ў 2015 годзе як прадзюсарскі праект ды так і застаўся на сцэне, штурмуючы то «Песню года», то адбор на «Еўрабачанне». Цяпер хлопцы — салісты Маладзёжнага тэатра эстрады і ўдзельнікі мноства канцэртных праграм і маладзёжных дыскатэк. А песню, з якой удзельнікі гурта абяцаюць сёлета «парваць фінал», ім напісаў модны аўтар і спявак Кірыл Гуд.

8. Гурт «Аўра» — «Чаравала»

Гурт вядомы як сямейны і творчы дуэт спявачкі і паэткі Юліі Быкавай і кампазітара, прадзюсара Яўгена Алейніка. Для «Еўрабачання» сабе і іншым артыстам яны напісалі разам ужо 11 (!) песень. Але на гэты раз аўтарам конкурснай песні выступіў толькі Яўген, а Юлія ўзяла на сябе выкананне і сцэнічнае ўвасабленне чараўніцтва купальскай ночы. Нягледзячы на тое што праслухоўванне яна праходзіла з тэмпературай і хворым горлам, нумар «Аўры» атрымаўся бездакорным і ўпэўнена трапіў у фінальную дзясятку (а меншага ніхто і не чакаў: званне лаўрэатаў прэміі «За духоўнае адраджэнне» абавязвае трымаць найвышэйшую планку). «Як бы ні склаліся абставіны далей, нашы песні працягваюць жыць незалежна ад «Еўрабачання», — заў-
важыла спявачка, — і гэтая таксама будзе гучаць».

9. NAPOLІ — Let іt go

Вольга Шыманская пяць разоў сольна і ў складзе музычнага гурта ўдзельнічала ў нацыянальным адборы ў Беларусі (у фінале займала месцы ад 8-га да 2-га) і адзін раз у Польшчы, а паміж конкурснымі гонкамі паспела выпусціць 15 сінглаў, зняцца ў некалькіх музычных кліпах і даць безліч канцэртаў. Сёлета конкурсную песню спявачцы напісала яшчэ адна фіналістка беларускіх адбораў на «Еўрабачанне» Аляксандра Ткач.

10. КейСі — No Love Lost

Мінчанка Кацярына Смольская — менавіта так па пашпарце завуць спявачку, якая склала сцэнічны псеўданім з ініцыялаў, — на сцэне ўсяго некалькі гадоў, але ўжо заявіла аб сабе і ў радыёэфірах, і ў тэлефестывалі «Песня года Беларусі», і вось цяпер на нацыянальным адборы «Еўрабачання». Некалі доўга сумнявалася, ці варта наогул займацца музыкай, таму экзамены ў музычнай школе давялося здаваць экстэрнам, затое цяпер дзяўчына — выпускніца факультэта філасофіі і сацыяльных навук БДУ — працуе ў прадзюсарскім цэнтры, сама вучыць музыцы і спевам дзяцей і, здаецца, знайшла сваю нішу на вялікай сцэне.

...Агульнае ўражанне ад беларускага адбору на «Еўрабачанне» ўзору 2019 года, шчыра кажучы, дзіўнае. З аднаго боку, вялікая колькасць замежных легіянераў значна разнастаіла карцінку і гучанне, зрабіла працэс цікавейшым і ўзмацніла канкурэнцыю. З другога — хоць гэта, канешне, у найменшай ступені праблема Белтэлерадыёкампаніі, — нягледзячы на заклік арганізатараў конкурсу да разнастайнасці, каторы год запар мы спрабуем здзівіць Адэсу, прабачце, Еўропу старымі штукамі, між тым як лік заявак на беларускай мове не перавышае 10 % ад агульнай колькасці. Спадарства, такіх песень і сёлета было ўсяго 7, а добрых яшчэ менш — і хоць бы дзеля гэтага варта было паклікаць у фінал Андрэя Такінданга з гуртом «Рэха» і пазітыўнай песняй «Хваля». А галоўнае, здаецца, многія беларускія артысты дагэтуль не навучыліся выходзіць на сцэну не сцяўшы зубы, а з усмешкай, каб атрымаць і падарыць слухачам задавальненне. Мо тады варта зноў зладзіць «выбар без выбару» — перабраць найбольш паспяховых нашых удзельнікаў і прызначаць з іх ліку наступнага канкурсанта ўласным рашэннем арганізатараў, каб сэканоміць час, нервы і сродкі?

Вікторыя ЦЕЛЯШУК

Фота Ганны ЗАНКАВІЧ і www.tvr.by

Выбар рэдакцыі

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.

Калейдаскоп

Каля 150 спартсменаў-аматараў хочуць выступіць у «даеўрапейскіх гульнях»

Каля 150 спартсменаў-аматараў хочуць выступіць у «даеўрапейскіх гульнях»

Трэніроўкі і здымкі ўдзельнікаў пачнуцца ў красавіку.

Грамадства

Сувораўскае вучылішча вачыма яго навучэнцаў

Сувораўскае вучылішча вачыма яго навучэнцаў

Быць сувораўцам ва ўсе часы было прэстыжна.