Вы тут

Выстава кніжнай графікі адкрылася ў Палацы мастацтваў


Ужо ў аўторак, у межах XXVI Мінскай міжнароднай кніжнай выставы, у Рэспубліканскай мастацкай галерэі Беларускага саюза мастакоў, што ў Палацы мастацтваў, адбылося ўрачыстае адкрыццё выставы кніжнай графікі. Тут былі прадэманстраваны найлепшыя ўзоры кніг, што паўдзельнічалі ў рэспубліканскім конкурсе “Мастацтва кнігі”, вынікі якога будуць падведзены ўжо зусім хутка – у гэту пятніцу.


Наведвальнікі выставы змаглі не толькі сузіраць цудоўныя карціны, але і сваімі рукамі пагартаць прыгожа аздобленыя кнігі – зборнікі вершаў, казак, апавяданняў, гістарычныя і навукова-папулярныя выданні. Натуральна, што прыгожа аздобленую кнігу хочацца прачытаць яшчэ больш – і займець яе ў прыватную калекцыю. Такі вось сінтэз слова і ўзору.

Пабачыўшы працы беларускіх мастакоў, адразу стала зразумела, што айчыннымі ілюстратарамі можна ганарыцца – і з лёгкасцю даверыць ім афармленне каштоўных, прыгожых думак.

Свае малюнкі ў галерэі прадставілі прызнаныя мэтры кніжнай графікі – Валерый Славук, Віктар Мікіта, Уладзімір Савіч. Не менш уражвалі і так званыя творцы 2000-х гадоў: Павел Татарнікаў, Юрый Якавенка, Генадзь Мацур, Ігар Гардзіёнка, Уладзімір Даўгяла, Маргарыта Цімохава, Тамара Шэлест. Своеасаблівым дадаткам да і без таго салодкага торту сталі працы на тэму кніжнай ілюстрацыі студэнтаў кафедры графікі Беларускай дзяржаўнай акадэміі мастацтваў. У іх праглядаліся і натхненне маладосці, і ўласнае бачанне, і рысы прафесійнай школы графікі.

Выстава кніжнай графікі будзе працаваць да канца кніжнага кірмашу – да 10 лютага ўключна.

Нагадваем, што сваю працу XXVI Мінская міжнародная кніжная выстава распачне ўжо заўтра, у сераду, у выставачным цэнтры “БелЭкспа”. Урачыстае адкрыццё адбудзецца ў 12 гадзін. Адразу пасля яго, у 12.40 можна будзе ўбачыць і паслухаць прэзентацыю кніг серыі «100 вершаў» выдавецтва “Мастацкая літаратура”. У яе межах свет пабачылі кнігі «Зямля бацькоў, зямля святая. Зборнік вершаў пра малую радзіму…», таксама зборнік Яўгеніі Янішчыц «Кахання сад і ластаўка вясны», Генадзя Бураўкіна «Ніці лёсу», Пімена Панчанка «Сэрца маё», Міхася Стральцова «Я зноўку тут”. Вершы з гэтых кніг прадэкламуюць запрошаныя артысты і чытальнікі-школьнікі.

У 15.40 у сераду адбудзецца ўрачыстае адкрыццё новай кнігарні пад назвай “Дружба”, якая размясцілася на праспекце Пераможцаў, 51/1. У 17 гадзін ахвотныя змогуць зазірнуць на літаратурна-мастацкі вечар “Малая радзіма твая і мая”, што адбудзецца ў Саюзе пісьменнікаў Беларусі – Фрунзэ, 5.

З больш падрабязнай праграмай выставы можна азнаёміцца на сайце Міністэрства інфармацыі. Аднак нават там змясціліся далёка не ўсе цікавыя мерапрыемствы – настолькі іх шмат. Не прапусціце – і ўбачыце ўсё на свае вочы!

Ніна ШЧАРБАЧЭВІЧ

Фота Андрэя САЗОНАВА

Выбар рэдакцыі

Грамадства

Асноўная задача — захаваць біялагічную сям'ю

Асноўная задача — захаваць біялагічную сям'ю

«Звязда» звярнулася па каментарыі аб рэалізацыі Дэкрэта Прэзідэнта № 18 да старшынь профільных камісій абедзвюх палат Нацыянальнага сходу Беларусі.

Грамадства

Аповед жанчыны, якая здолела вярнуць дачку з сацыяльнага прытулку

Аповед жанчыны, якая здолела вярнуць дачку з сацыяльнага прытулку

Жанчыну, якая здолела не толькі вярнуць дзіця з прытулку, але і далей выхоўвае яго, знайсці аказалася не проста. 

Грамадства

Чаму зараз варта далей трымацца ад вадаёмаў?

Чаму зараз варта далей трымацца ад вадаёмаў?

Люты больш нагадвае пазачарговы вясновы месяц.

Грамадства

Якую літаратуру здаюць у букіністычныя крамы?

Якую літаратуру здаюць у букіністычныя крамы?

Калі звычайныя кнігарні працуюць па формуле «кніга — чалавек», то букіністычныя трымаюцца на прынцыпе «людзі — кнігі — людзі».