Вы тут

Беларуска стала чэмпіёнкай свету па фрыстайле


Фрыстайлістка Аляксандра Раманоўская лёгка пераадолела кваліфікацыю, выйшла ў фінал, а потым і ў суперфінал, дзе сур'ёзна па балах апярэдзіла сваіх саперніц. Пасля прызямлення і погляду на табло са сваімі ацэнкамі Саша не змагла стрымаць слёз, Любоў Нікіціна, якая стала другой, і Ксю Ментаа, якая стала трэцяй, заключылі беларуску ў цёплыя абдымкі.


Пасля ўзнагароджвання Аляксандра скажа: «Я выйграла за сябе і за таго хлопца. Будзем лічыць, за нашых дзяўчат, за Аню і Алу». Сапраўды так, бо ў амерыканскі Дзір-Вэлі наша каманда адправілася ў няпоўным складзе. Алімпійская чэмпіёнка Ганна Гуськова яшчэ аднаўляецца пасля траўмы, але, вядома, Аня ўсё роўна глядзела трансляцыю з чэмпіянату і адразу пасля перамогі ў сацсетках павіншавала сваю сяброўку па камандзе.

Для Аляксандры Раманоўскай гэта «золата» стала першым на дарослым чэмпіянаце свету, раней беларуска двойчы перамагала на юніёрскім першынстве планеты.

Аляксандр Лукашэнка павіншаваў Аляксандру Раманоўскую з бліскучай перамогай на чэмпіянаце свету.

У актыве Сашы таксама першае месца на этапе Кубка свету ў студзені 2015 года ў Лэйк-Плэсідзе (ЗША). «Больш за ўсё рада за нашу каманду, якая даказала, што беларусы па-ранейшаму самыя моцныя на планеце, — адзначыла Аляксандра. — Так атрымалася, што з-за траўмаў дзяўчаты засталіся дома і мне прыйшлося ваяваць, па сутнасці, у адзіночку. Было трохі боязна, але гэта і надавала сіл. Хачу сказаць вялікі дзякуй нашым трэнерам і ўсёй камандзе — яны сябе яшчэ пакажуць у гэтым сезоне, можаце не сумнявацца! Таксама хачу падзякаваць балельшчыкам, я адчувала вашу падтрымку за тысячы кіламетраў. І вельмі рада, што наш сцяг сёння падняўся вышэй за ўсіх!» Асобнае паведамленне Саша адрасавала свайму тату і павіншавала яго з днём нараджэння. «Я вельмі старалася зрабіць табе падарунак. Ты — найлепшы», — сказала Саша.

Аляксандра Раманоўская нарадзілася ў Мінску, зараз дзяўчыне 22 гады. На лыжы Сашу паставіла мама, якая сама займаецца лыжным спортам. Раманоўская дэбютавала ў Кубку свету ў 2012 годзе, з тых часоў дзяўчына ўжо некалькі разоў падымалася на п'едэстал. У 2018 годзе Аляксандра выступіла на Алімпійскіх гульнях у Пхёнчхане, аднак абедзве яе спробы там былі няўдалымі. Сашына захапленне — татуіроўкі, на яе целе ўжо больш за пяць малюнкаў, і на гэтым дзяўчына не збіраецца спыняцца.

Адзначым таксама, што прадстаўнікам мужчынскай часткі каманды на п'едэстал чэмпіянату свету падняцца не ўдалося. Алімпійскі чэмпіён Сочы Антон Кушнір заняў у Дзір-Вэлі восьмае месца, Дзмітрый Мазуркевіч у выніковым пратаколе 16-ы, Максім Гусцік стаў толькі 20-м. Сёння ноччу на турніры прайшлі камандныя спаборніцтвы.

Дар'я ЛАБАЖЭВІЧ

Фота БелТА

Загаловак у газеце: «Залатая» наша Саша

Выбар рэдакцыі

Культура

Кіно, якога не чакалі — 3. Завяршаем падборку драйвовых беларускіх фільмаў

Кіно, якога не чакалі — 3. Завяршаем падборку драйвовых беларускіх фільмаў

Сфера культуры ярчэй за іншыя паказвае, што калі не працуюць традыцыйныя схемы, прыходзіцца шукаць чорны ўваход. Пошукі часам нараджаюць эксперыменты і выкруты, якія абыходзяць абмежаванні, патэрны і завядзёнку і становяцца найлепшымі знакамі свайго часу. 

Грамадства

Як біятэхналогіі паляпшаюць якасць жыцця і здароўя чалавека?

Як біятэхналогіі паляпшаюць якасць жыцця і здароўя чалавека?

Па прагнозах спецыялістаў, не менш як 20 працэнтаў ад аб'ёму тавараў у XXІ стагоддзі будзе за біятэхналогіямі.

Грамадства

Збіраем гардэроб школьніка разам са стылістам

Збіраем гардэроб школьніка разам са стылістам

Пошукі і набыццё «школьнай формы», як па старой звычцы кажуць мамы і таты, — тая яшчэ галаваломка! 

Грамадства

Медыцынскі агляд у віцебскіх газавікоў ажыццяўляе... робат

Медыцынскі агляд у віцебскіх газавікоў ажыццяўляе... робат

А наведвальнiкаў крамы кансультуе выява спецыялiста.