Вы тут

Больш за 60 тысяч чалавек наведалі Мінскую міжнародную кніжную выставу


ХХVІ Мінская міжнародная кніжная выстаўка-кірмаш (ММКВК), якая праходзіла пад дэвізам «Больш, чым кнігі», атрымалася не толькі заўважнай, але і надзвычай разнастайнай і шматбаковай падзеяй. Пяць дзён у рэжыме нон-стоп у межах форуму і літаратурнага сімпозіума «Пісьменнік і час» адбываліся прэзентацыі, сустрэчы і аўтограф-сесіі папулярных аўтараў, літаратурныя дыскусіі, круглыя сталы пісьменнікаў і выдаўцоў, творчыя майстар-класы і ўрокі замежнай мовы, флэшмобы, кінапаказы і тэатралізаваныя прадстаўленні, на якіх агулам пабывала больш як 61 тысяча гасцей.


Кожны мог выбраць тое, што яму больш даспадобы: ці праехацца ад Палаца спорту да выставачнага павільёна «БелЭкспа» на паэтычным аўтобусе пад вершы і бардаўскія песні як маладых, так і ўжо вядомых беларускіх аўтараў з Мінскага абласнога аддзялення Саюза пісьменнікаў Беларусі, ці сустрэцца і пагаварыць з любімым пісьменнікам непасрэдна на выстаўцы — так, сустрэча з лаўрэатам Нобелеўскай прэміі па літаратуры Святланай Алексіевіч выклікала сапраўдны аншлаг; ці ўзяць удзел у літаратурным квэсце або віктарыне па тым ці іншым творы; ці завітаць на шматлікія прэзентацыі кніжных навінак і, магчыма, адкрыць для сябе імёны новых цікавых літаратараў, ці, нарэшце, набыць — што немалаважна, па выдавецкім кошце, а ў апошні дзень работы выстаўкі і са зніжкамі — некалькі выданняў у дамашнюю бібліятэку.

Прычыніцца да Мінскай міжнароднай кніжнай выстаўкі-кірмашу сёлета было можна, нават не наведваючы выдавецкія экспазіцыі. Амаль паўтара дзясятка сталічных кавярняў, пабаў і рэстаранаў далучыліся да тэматычнага кніжнага гастрафэсту «Смак чытання», які быў зладжаны ўпершыню, і ўключылі ў меню стравы, згатаваныя сучаснымі кухарамі паводле літаратурных бестселераў розных краін. Асаблівай папулярнасцю ў наведвальнікаў карысталіся калдуны з мясам і грыбамі паводле Уладзіміра Караткевіча («Дзікае паляванне караля Стаха»), верашчака з блінамі, на якую кулінараў натхніла «Новая зямля» Якуба Коласа, апісаныя ў «Знесеных ветрам» Маргарэт Мітчэл грачаныя аладкі з кляновым сіропам, пірог «па-хобіцку» паводле Джона Рональда Руэла Толкіна і нават знойдзеная ў кнізе «Дракула» Брэма Стокера «папрыка Гендл». І калі да кошту гастранамічных вынаходак у гурманаў былі пытанні, то да смаку — ніякіх там «паскудства, брат, і не пытайся», адны кампліменты...

Не сумна было ў сталічных кнігарнях, дзе адна за адной праходзілі кніжныя прэзентацыі і сустрэчы з аўтарамі, у тым ліку зладжаныя Выдавецкім домам «Звязда». Так, у «Кнігах&кніжачках» чыталі твор Генадзя Аўласенкі «Снегавік і вясна», у «КнігаПолісе» абмяркоўвалі «Уцёну ў Францыі» Яны Явіч. А паралельна на розных пляцоўках у павільёне «БелЭкспа» нашы калегі правялі адмысловую экалагічную віктарыну, прадставілі кнігі Віктара Ляскоўскага «Антошкава шчаня», Дзмітрыя Юртаева «Ні секунды цішыні», маляўнічае выданне «Акварэльны сусвет Вячаслава Паўлаўца» і прысвечаны юбілею маладзёжнага руху выдавецкі праект «У рытме імклівых гадоў...». Часопіс «Маладосць» зладзіў для маладых літаратурных крытыкаў і тых, хто толькі марыць імі стаць, круглы стол з удзелам вопытных даследчыкаў літаратуры і майстар-клас са шкоднымі парадамі «Як не трэба пісаць рэцэнзіі», а таксама падвёў вынікі конкурсу «Слаўная кампанія: рэАNІMАцыя», прысвечанага пісьменнікам ХІХ стагоддзя...

— Мама, глядзі, вось такая самая кніжка, як ты нам абяцала! — звініць патрабавальны галасок каля стэнда з дзіцячай літаратурай. Мінчанка Яўгенія Капыцька, якая вывучае асартымент разам з двума сынамі, задавальняе просьбу маленькіх кнігалюбаў і расказвае, што ўжо гадоў пяць не прапускае ніводнай кніжнай выстаўкі і ніколі не сыходзіць з пустымі рукамі: «Вось і сёння амаль на сто рублёў накупілі: дзіцячыя энцыклапедыі, некалькі перакладных мастацкіх кніг, прыгожае выданне Караткевіча, вучэбныя дапаможнікі... Каб набыць тое самае ў крамах, давялося б патраціць больш часу і грошай, а на Мінскай кніжнай выстаўцы заўжды хапае цікавых навінак».

Пенсіянерка Галіна Трафімава гаворыць, што прыйшла мэтанакіравана «на Рэзніка», які прадстаўляў сваю новую дзіцячую кнігу «Цяпа не хоча быць клоўнам», але пасля сустрэчы з любімым паэтам-песеннікам зацікавілася наступнай прэзентацыяй, паслухала яшчэ музычную праграму ад дэлегацыі Казахстана, абышла стэнды выдавецтваў з розных краін — і не пашкадавала: «Набыла сабе кнігу пра айца Іаана Крэсцьянкіна, нават не ўтрымалася, колькі старонак «праглынула» тут жа, седзячы за столікам, а ўнучцы купіла дапаможнік па ментальнай арыфметыцы, ведаю, што дзеці даўно такі шукалі».

Пагаджаюцца з тым, што хапае на што паглядзець і што пачытаць, і самі ўдзельнікі выстаўкі. Так, прадстаўнікі расійскага выдавецтва «Маладая гвардыя», якое пасля заключэння прамога дагавора з «Белкнігай» атрымала магчымасць рэалізаваць у нашай краіне свае выданні наўпрост (а значыць, зрабіць іх больш даступнымі для чытачоў), не толькі адзначылі высокую цікавасць беларусаў да сваіх кніг і аўтараў, але, у сваю чаргу, былі прыемна ўражаныя некаторымі беларускімі выдавецкімі праектамі і нагледзелі для сябе новых патэнцыйных беларускіх аўтараў. Наогул жа на стэндзе Расійскай Федэрацыі, якая стала цэнтральным экспанентам выстаўкі, урад Масквы прадставіў больш як 500 найменняў кніг і новыя творчыя праекты.

«Сёлета выстаўка стала рэкорднай як па колькасці праведзеных у межах форуму мерапрыемстваў, так і па колькасці наведвальнікаў — больш чым 61 тысяча чалавек, і прадстаўнікоў краін-удзельніц, іх 37, прычым упершыню прадставілі свае асобныя стэнды Азербайджан, Украіна, Казахстан, Ізраіль, Польшча, Грэцыя і Кітай. У рабоце ММКВК узяў удзел 441 экспанент, з іх 164 замежныя», — рэзюмаваў старшыня Савета кніжных выставак і кірмашоў, што ладзяцца ў дзяржавах — удзельніцах СНД, генеральны дырэктар выдавецкага і кнігагандлёвага ТАА «Макбел» Дзмітрый Макараў. Дыпломы арганізатараў атрымалі, дарэчы, выдавецтва «Аверсэв» — за найлепшую тэматычную экспазіцыю, а таксама Паліграфічны камбінат імя Якуба Коласа.

Намеснік міністра інфармацыі Беларусі Ігар Бузоўскі адзначыў, што межы выставачнага павільёна ўжо відавочна сталі цесныя для такога маштабнага форуму, а таму цалкам правільна, што ён праходзіў сёлета на розных пляцоўках: «Усе гэтыя творчыя сустрэчы, насычаныя і цікавыя дыскусіі, я спадзяюся, паслужаць таму, каб наша наступная выстаўка была яшчэ больш маштабнай і напоўненай разнастайнымі мерапрыемствамі».

ХХVІ Мінская міжнародная кніжная выстаўка-кірмаш стала часткай гісторыі, але мы чакаем старых і новых удзельнікаў праз год, і незалежна ад таго, хто прыедзе першы, а хто дваццаць сёмы раз, у Мінску гасцям заўжды рады і з задавальненнем прымуць новых аўтараў, выдаўцоў і новыя добрыя кнігі.

Вікторыя ЦЕЛЯШУК

Фота Андрэя САЗОНАВА і Таццяны ТКАЧОВАЙ

Выбар рэдакцыі

Грамадства

Так цёпла, як у першым паўгоддзі, бывае адзін раз у 30 год

Так цёпла, як у першым паўгоддзі, бывае адзін раз у 30 год

За апошнія 30 гадоў у нас у краіне ў параўнанні з нормай 1961—1990 гадоў, якая ўжываецца як апорная пры ацэнцы значэнняў змены клімату, пацяплела на 1,3 градуса.

Грамадства

Ці прапаноўвае прыдарожны сэрвіс беларускую кухню?

Ці прапаноўвае прыдарожны сэрвіс беларускую кухню?

Міністэрства транспарту і камунікацый цяпер распрацоўвае генеральную схему развіцця прыдарожнага сэрвісу да 2025 года.

Грамадства

Гісторыя пра тое, як партызаны пайшлі па соль, а выратавалі дзевяць чалавек

Гісторыя пра тое, як партызаны пайшлі па соль, а выратавалі дзевяць чалавек

Гэты аповед даслаў нам у рэдакцыю наш даўні чытач з Вялікай Бераставіцы Міхаіл Маскальчук.

Грамадства

Што паглядзець у Хоцімску?

Што паглядзець у Хоцімску?

У Хоцімску нават ёсць кола агляду.