Вы тут

У Баранавічах урачыста адкрылі будынак каледжа лёгкай прамысловасці


Баранавіцкі дзяржаўны каледж лёгкай прамысловасці імя В. Я. Чарнышова налета адзначыць 60 гадоў. Фактычна ўвесь гэты час навучальная ўстанова працавала ў будынку па вуліцы Савецкай. З ростам колькасці навучэнцаў і пашырэннем вучэбнай базы ў каледжа з'явіўся другі вучэбны корпус, які патрабаваў рэканструкцыі і рамонту. І гэты рамонт быў распачаты ў лютым 2013 года.


На мінулым тыдні поўнасцю абноўлены корпус урачыста адкрылі. Памяшканне як звонку, так і знутры набыло стыльны і прывабны выгляд. Аўдыторыі, класы, майстэрні адпавядаюць самым сучасным патрабаванням навучальнага працэсу. З рэспубліканскага бюджэту на гэты аб'ект затрачана каля 5,4 мільёна рублёў. Павіншаваць навучэнцаў і выкладчыкаў з наваселлем прыехаў старшыня Савета Рэспублікі Нацыянальнага сходу Міхаіл МЯСНІКОВІЧ.

Яшчэ да цырымоніі адкрыцця спікер верхняй палаты парламента разам са старшынёй Брэсцкага аблвыканкама Анатолем ЛІСАМ, старшынёй абл-
савета Юрыем НАРКЕВІЧАМ, старшынёй Беларускага дзяржаўнага канцэрна па вытворчасці і рэалізацыі тавараў лёгкай прамысловасці Мікалаем ЯФІМЧЫКАМ
паразмаўлялі са студэнтамі і іх настаўнікамі, пазнаёміліся з вучэбнай базай.

Зараз каледж рыхтуе спецыялістаў па шэрагу напрамкаў лёгкай прамысловасці. З яго сцен выходзяць тэхнікі-тэхнолагі трыкатажных і тканых вырабаў, мадэльеры і тэхнолагі швейных вырабаў, механікі машын і апаратаў, спецыялісты па эканоміцы і арганізацыі вытворчасці, тэхнікі-праграмісты.

Сваю новую аўдыторыю паказала выкладчык тэхналогіі швейнай справы Алена Яфімчык. Алена Мікалаеўна 20 гадоў працуе ў каледжы. Старшыня Савета Рэспублікі папрасіў выкладчыцу назваць некалькі вучняў, якія дасягнулі поспехаў у швейнай справе. Сярод іншых Алена Мікалаеўна згадала Хрысціну Нічыпарук, начальніка цэха дзяржынскага прадпрыемства па вырабе мужчынскіх кашуль «Эліз». Дарэчы, нядаўна Алена Яфімчык праводзіла там выязныя заняткі са сваімі навучэнцамі. І яе былая вучаніца выступала ўжо ў якасці выкладчыка. Заняткі, паводле ацэнкі педагога, атрымаліся плённыя.

Пазней Алена Мікалаеўна расказала карэспандэнту МС, як сучаснае інфармацыйнае грамадства ўплывае на падрыхтоўку спецыялістаў швейнай справы. Цяперашнія дзеці, а ў каледж прыходзіць частка навучэнцаў пасля 9 класа, менш здольныя ствараць нешта рукамі. Яны прывучаныя працаваць з гаджэтамі, а вось з іголкай... Гэтаму пакаленню неабходна больш часу, каб навучыцца простым маніпуляцыям, чым патрабавалася, скажам, іх папярэднікам. «Але ж на другі, трэці год навучання многія раскрываюцца, дэманструюць здольнасці, а то і талент да нашай справы. І мы, вядома, радуемся, калі гэтыя задаткі супадаюць з жаданнем маладога чалавека стаць сапраўдным спецыялістам», — кажа выкладчыца.

Міхаіл Мясніковіч пажадаў Алене Яфімчык вырасціць свайго Славу Зайцава ў Баранавіцкім каледжы. І гэта не проста арыенцір, але і цалкам рэальная справа, — упэўніліся ўсе прысутныя на наваселлі. Навучэнцы прадэманстравалі гасцям калекцыю адзення, вырабленага ўдзельнікамі тэатра моды «Модэс». Некаторыя ўзоры выглядалі даволі авангардна, так што іх аўтары могуць яшчэ заявіць пра сябе ў свеце высокай моды. Але ж галоўная задача гэтай навучальнай установы, якая некалі стваралася канкрэтна пад патрэбы вытворчага баваўнянага аб'яднання, — рыхтаваць кадры сярэдняга звяна для прадпрыемстваў лёгкай прамысловасці краіны.

Такіх спецыялістаў, дарэчы, за ўсе гады выйшла адсюль 25 тысяч. Зараз у каледжы прафесію атрымліваюць больш за 800 юнакоў і дзяўчат. Іх навучаюць больш за 60 выкладчыкаў. У новым будынку акрамя вучэбных кабінетаў ёсць прасторная актавая зала, чытальня, сталоўка. Спартыўная база складаецца са спартзалы, пляцовак для міні-футбола, валейбола, баскетбола, вулічных трэнажораў. Карацей, у новым корпусе ёсць усё для паспяховай вучобы, адпачынку, самаразвіцця.

Падчас адкрыцця Міхаіл Мясніковіч падкрэсліў, што грошы, укладзеныя ў рэканструкцыю будынка навучальнай установы, дзяржава разглядае як інвестыцыі ў будучыню эканомікі. Тут рыхтуюцца запатрабаваныя народнай гаспадаркай спецыялісты. «Я задаваў шмат пытанняў навучэнцам, цікавіўся меркаваннем іх бацькоў, — сказаў Міхаіл Уладзіміравіч журналістам. — Упэўніўся, што яны задаволеныя вучобай, іх бацькі таксама не шкадуюць, што дзяцей накіравалі менавіта ў гэтую навучальную ўстанову. Тут рыхтуюцца кадры для прадпрыемстваў усёй лёгкай прамысловасці рэспублікі. З гэтых сцен выйшлі многія спецыялісты, якія займаюць кіруючыя пасады і на дзяржаўных, і на прыватных прадпрыемствах. Прадукцыя, якую яны выпускаюць, карыстаецца попытам на ўнутраным і замежным рынках».

Святлана ЯСКЕВІЧ

Загаловак у газеце: Інвестыцыі ў адукацыю

Выбар рэдакцыі

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.

Калейдаскоп

Каля 150 спартсменаў-аматараў хочуць выступіць у «даеўрапейскіх гульнях»

Каля 150 спартсменаў-аматараў хочуць выступіць у «даеўрапейскіх гульнях»

Трэніроўкі і здымкі ўдзельнікаў пачнуцца ў красавіку.

Грамадства

Сувораўскае вучылішча вачыма яго навучэнцаў

Сувораўскае вучылішча вачыма яго навучэнцаў

Быць сувораўцам ва ўсе часы было прэстыжна.