Вы тут

Як будуць праходзіць «Гонка легендаў» і ЧЕ па біятлоне ў Раўбічах


Вялікі фестываль біятлона пачнецца пад Мінскам ужо ў панядзелак. У абед ён стартуе з афіцыйнага адкрыцця чэмпіянату Еўропы, таксама ў яго рамках пройдзе майстар-клас для юных біятланістаў — удзельнікаў рэспубліканскіх спаборніцтваў «Снежны снайпер». Працягне мерапрыемства аўтограф-сесія «зорак» біятлона, якія крыху пазней выйдуць на біятлонную трасу.


«Гонка легендаў — 2016» у Раўбічах. Фота: БЕЛТА

«Гонка легендаў» стартуе ў 17.00, былыя біятланісты паспаборнічаюць у дзвюх дысцыплінах — мас-старце і змешанай эстафеце. Свой удзел пацвердзіў 21 чалавек, сярод іх — украінец Андрэй Дзярызямля, нарвежцы Уле-Эйнар Б'ёрндален, Ларс Бергер, Фрудэ Андрэсен і Халвард Ханевальд, французы Фларанс Баверэль і Венсан Дэфран, італьянка Карын Аберхофер, расіяне Анна Багалій, Сяргей Чэпікаў, Уладзімір Драчоў і многія іншыя. Беларусь у «Гонцы легендаў» прадставяць Надзея Скардзіна, Сяргей Новікаў, Аляксандр Папоў, Алена Зубрылава і, вядома, Дар'я Домрачава.

— Сёлета ўпершыню праводзіцца зімовая «Гонка легендаў», гэта выдатна, — дзеліцца ўражаннямі адна з удзельніц Алена Зубрылава.Прыедуць спартсмены, якія заваёўвалі медалі на чэмпіянатах свету і Алімпійскіх гульнях. Думаю, гэта будзе хуткая гонка, нягледзячы на тое, што многія спартсмены скончылі сваю кар'еру больш за 10 гадоў таму, бо майстэрства нікуды не знікае. Будзе прыгожа, вытанчана і весела.

Расклад «Гонкі легендаў»

14.00 — 15.15 — Майстар-клас для фіналістаў спаборніцтваў «Снежны снайпер»
і Кубак Беларускай федэрацыі біятлона.

  • 15.30 — 16.30 — Аўтограф-сесія ўдзельнікаў біятлоннага фестывалю «Гонка легендаў».
  • 17.00 — 17.20 — Афіцыйная цырымонія адкрыцця адкрытага чэмпіянату Еўропы па біятлоне.
  • 17.50 — 18.10 — Мас-старт сярод жанчын.
  • 18.15 — 18.35 — Мас-старт сярод мужчын.
  • 18.45 — 19.15 — Змешаная эстафета.
  • 19.30 — Узнагароджванне пераможцаў і прызёраў біятлоннага фестывалю «Гонка легендаў», рэспубліканскіх спаборніцтваў «Снежны снайпер». Провады Дар'і Домрачавай і Надзеі Скардзіна з вялікага спорту.

Пасля заканчэння «Гонкі легендаў» адбудзецца не менш цікавая і кранальная падзея — провады з вялікага спорту Дар'і Домрачавай і Надзеі Скардзіна. Як будзе праходзіць гэтая цырымонія, пакуль трымаецца ў таямніцы.

А вось спаборніцкая частка чэмпіянату Еўропы пачнецца толькі ў сераду, 20 лютага. Заяўкі на ўдзел у аргкамітэт падалі 34 нацыянальныя федэрацыі біятлона, па папярэдніх даных, удзел у турніры прымуць 164 біятланісты і 153 біятланісткі, зараз гэта рэкордныя лічбы для чэмпіянатаў Еўропы. У Раўбічы прыедуць асноўныя склады зборных Украіны, Швецыі, Нарвегіі і Расіі, таму і ў гэтыя дні ў беларускіх балельшчыкаў будзе шанц паглядзець на дзеючых «зорак» біятлона.

Што да нашай зборнай, трэнерскі штаб не хавае турботы, лідары зборнай адчуваюць праблемы са здароўем. Па дарозе са збору ў Антхольцы ў самалёце спартсмены падхапілі вірус. Спачатку захварэла Ірына Крыўко, за ёй Дынара Алімбекава, а потым і Уладзімір Чапелін. Трэнеры зборнай адзначаюць, што медыцынскія работнікі і біяхімікі робяць усё, каб спартсмены як мага раней змаглі прыступіць да спаборніцтваў. Другая частка каманды выступае на Кубках свету ў Канадзе і ЗША і вернецца ў Беларусь толькі ўвечары 19 лютага. «Мы маем права заявіць на спаборніцтвы шэсць мужчын і шэсць жанчын, але тое, што ў першай гонцы гэта не атрымаецца, магу сказаць дакладна, — канстатуе галоўны трэнер нацыянальных камандаў Юрый Альберс.Плануецца, што ў жанчын на старт індывідуальнай гонкі ў сераду выйдуць Ірына Крыўко, Дынара Алімбекава і сёстры Кручынкіны. У мужчынскай гонцы, хутчэй за ўсё, будуць стартаваць Сяргей Бачарнікаў, Раман Ялётнаў, Антон Смольскі і Мікіта Лабастаў».

Зараз у Раўбічах акрамя нашай каманды ўжо трэніруецца зборная Казахстана, заўтра ў спарткомплекс пачнуць заязджаць і іншыя зборныя.

Юрый Альберс адзначыў, што падрыхтоўка «Раўбіч» да турніру ідзе ўжо даўно, цяпер дапрацоўваюцца апошнія нюансы. «Усё кажа аб тым, што мы ў поўным узбраенні падыдзем да гэтага мерапрыемства, адзінае, надвор'е нас не моцна радуе, — адзначае Юрый Юр'евіч. — Па доўгатэрміновых прагнозах цяпер павінна была быць мінусавая тэмпература, але мы бачым плюсавую. Утрымаць трасу будзе складана, але снегу ў нас нарыхтавана шмат, будзем старацца гэта рабіць».

Для таго каб забяспечыць добрую трасу для біятланістаў, было закуплена больш за тры тоны салетры, якая «цэментуе» снег. У «Раўбічах» працуюць спецыялісты, якія перад кожнай гонкай будуць прымаць рашэнні, што трэба рабіць з трасай.

Дырэктар Рэспубліканскага цэнтра алімпійскай падрыхтоўкі «Раўбічы» Аляксандр Гагіеў адзначыў, што чэмпіянат Еўропы — вельмі важная падзея для краіны, бо апошні настолькі маштабны турнір па біятлоне Беларусь праводзіла толькі ў 2004 годзе. «Для нас гэта знакавая падзея яшчэ і таму, што сёлета спартыўнаму комплексу «Раўбічы» спаўняецца 45 гадоў. У далёкім 1974 годзе, таксама ў лютым, тут быў праведзены першы чэмпіянат свету па біятлоне на тэрыторыі СССР», — расказаў Аляксандр Славіевіч.

Спарткомплекс рыхтуецца сустрэць не толькі спартсменаў, але і гледачоў, для іх у «Раўбічах» ужо ўсталяваны дзве дадатковыя трыбуны на паўтары тысячы месцаў, будуць арганізаваны глядацкія месцы і на трасах. Немалаважную ролю ў такіх мерапрыемствах іграюць і аўтастаянкі, гэта пытанне ўрэгулявана, асноўная частка машын зможа размясціцца ўздоўж дзеючай трасы, дадатковыя стаянкі таксама будуць арганізаваны каля гасцініцы № 3 і тэнісных кортаў. Таксама ў «Раўбічах» на ніжняй і верхняй пляцоўках размесцяцца гандлёвыя пункты і сувенірныя крамы. На верхняй пляцоўцы будзе ўсталявана сцэна, дзе пройдзе культурная праграма.

Дар'я ЛАБАЖЭВІЧ

Расклад чэмпіянату Еўропы

  • 20 лютага
  • 16.00 Індывідуальная гонка. Мужчыны.
  • 19.30 Індывідуальная гонка. Жанчыны.
  • 21 лютага
  • 16.00 Змешаная эстафета (супермікст).
  • 19.00 Змешаная эстафета.
  • 23 лютага
  • 11.00 Спрынт. Мужчыны.
  • 14.00 Спрынт. Жанчыны.
  • 24 лютага
  • 11.00 Гонка пераследу. Мужчыны.
  • 13.00 Гонка пераследу. Жанчыны.

Загаловак у газеце: Свята побач з «зоркамі»

Выбар рэдакцыі

Калейдаскоп

Каля 150 спартсменаў-аматараў хочуць выступіць у «даеўрапейскіх гульнях»

Каля 150 спартсменаў-аматараў хочуць выступіць у «даеўрапейскіх гульнях»

Трэніроўкі і здымкі ўдзельнікаў пачнуцца ў красавіку.

Грамадства

Сувораўскае вучылішча вачыма яго навучэнцаў

Сувораўскае вучылішча вачыма яго навучэнцаў

Быць сувораўцам ва ўсе часы было прэстыжна. 

Культура

Харвацкі кінафестываль ZаgrеbDох даследуе рэгіён вялікім экранам

Харвацкі кінафестываль ZаgrеbDох даследуе рэгіён вялікім экранам

Балканскія краіны паўсталі перад гледачом з іх надзённым.