Першая палова гульні на полі «Барысаў-Арэны» прайшла з перавагай гасцей, але перад самым перапынкам Станіслаў Драгун здолеў адкрыць лік, паразіўшы вароты легендарнага Петра Чэха.
У другім тайме барысаўчанам прыйшлося адбіваць мноства атак саперніка, і палявыя гульцы, і варатар Дзяніс Шчарбіцкі справіліся са сваёй задачай на выдатна і ўтрымалі мінімальны лік — 1:0.
— Цяжкая гульня з доляй шанцавання і футбольнага фарту, ну і, вядома, цярпення і майстэрства хлопцаў, з дапамогай гэтага мы атрымалі гістарычную перамогу, — адзначыў галоўны трэнер БАТЭ Аляксей Бага. — Мы былі гатовыя менавіта да гэтай расстаноўкі саперніка. Адрэналін, балельшчыкі і забіты «ў раздзявальню» мяч надалі нам сіл, перш за ўсё псіхалагічных, а гэта вялікая справа.
Галоўны трэнер лонданскага «Арсенала» Унаі Эмеры адзначыў, што яго камандзе няма чаму радавацца. У першым тайме ў яе было шмат момантаў, але БАТЭ гуляў выдатна ў абароне. «У нас былі шанцы і пасля перапынку, аднак зноў БАТЭ выдатна паказаў сябе ў абароне — тым больш ён забіў. Спадзяёмся, што праз тыдзень гульня будзе зусім іншай. Я аптыміст і веру ў сваю каманду». Эмеры адзначыў, што ён упэўнены: яго каманда здольная пераламаць ход супрацьстаяння, каб прайсці далей.
Экс-гулец «Арсенала» (2005—2008 гг.), а цяпер паўабаронца БАТЭ Аляксандр Глеб адзначыў, што БАТЭ згуляў годна супраць знакамітага саперніка, і расказаў, якія рашэнні прымаліся па ходзе сустрэчы. «Спачатку паспрабавалі прэсінгаваць, але хутка зразумелі, што гэта можа абярнуцца вялікімі праблемамі. Зразумелі, што праціўнікі ў два-тры пасы разразаюць нашу абарону. Вырашылі чакаць, сесці трохі ніжэй і пачаць абараняцца «нізкім блокам». Гэта рашэнне было правільным», — пракаментаваў Аляксандр.
У пятніцу БАТЭ адправіўся ў Англію, дзе будзе рыхтавацца да матча ў адказ з «Арсеналам», гульня намечана на 21 лютага. «Зразумела, што ў Лондане нам будзе няпроста. Мы зрабілі толькі маленькі крок для выхаду ў наступны раўнд. Чакаем цяжкую гульню, рыхтуемся да чэмпіянату, да наступнага матча. У галаве трымаем шмат момантаў. А па выніках матча ў Лондане зробім пэўныя высновы», — адзначыў Аляксей Бага.
Дар'я ЛАБАЖЭВІЧ
Фота БЕЛТА
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.