Вы тут

Лукашэнка: Прырост насельніцтва — пытанне нацыянальнай бяспекі


На нарадзе ў Прэзідэнта абмяркоўвалі дэмаграфічную сітуацыю і ўдасканаленне мер дзяржаўнай падтрымкі сем'яў, якія выхоўваюць дзяцей.


Паводле яго слоў, ні адна краіна ў свеце не падтрымлівае так сем'і з дзецьмі, у Беларусі больш за 10 дапамог. Беларускі лідар звярнуў увагу, што ў Германіі вельмі моцныя выплаты ў гэтай сферы, аднак узровень нараджальнасці практычна як у Беларусі. Аляксандр Лукашэнка прапанаваў разабрацца ў сістэме падтрымкі сем'яў з дзецьмі і паглядзець, “можа, нам дзесьці ўзмацніць падтрымку, а дзесьці нейкую дробязь наогул прыбраць, якая не працуе".

Калі, напрыклад, будзе прынята прыстойнае рашэнне па забеспячэнні шматдзетных сем'яў жыллём, то гэта безумоўны стымул.  "Жыллё для сям'і — гэта ўсё", — упэўнены Прэзідэнт. Аднак, да прыкладу, адпраўляць на санаторна-курортнае лячэнне з мінімальнымі выплатамі, то гэта, па сутнасці, распыленне грашовых сродкаў.

Кіраўнік дзяржавы звярнуў увагу, што ў сферы дэмаграфічнай бяспекі наша краіна сутыкаецца з такімі ж праблемамі, як і большасць дзяржаў свету. Гэта зніжэнне ўзроўню нараджальнасці і павелічэнне натуральнага змяншэння насельніцтва. Калі не прымаць папераджальных мераў, то, па прагнозах спецыялістаў, тэндэнцыі да зніжэння колькасці насельніцтва і яго старэння будуць толькі ўзмацняцца аж да 2040 года.

"Для падтрымкі сем'яў з дзецьмі ў Беларусі прыняты, я ўжо сказаў, выключныя меры, якіх няма ў іншых краінах. Сярод іх — адпачынак па доглядзе за дзіцем да трох гадоў, які аплачваецца, льготнае крэдытаванне для шматдзетных і праграма сямейнага капіталу, а таксама іншыя меры", — сказаў Аляксандр Лукашэнка.

На яго думку, гэтыя асноўныя меры з'яўляюцца сапраўды істотнымі — і яны працуюць. Таму неабходна падумаць: калі ўжо ўзмацняць, то меры, якія даюць вынік, а непрацуючыя — прыбіраць.

Кіраўнік дзяржавы заклікаў удзельнікаў нарады адказаць на наступныя пытанні.

Па-першае, наколькі прынятыя меры эфектыўныя? Ці спрыяюць яны павышэнню нараджальнасці?

"Прырост насельніцтва, павышэнне працоўнага патэнцыялу — пытанне нацыянальнай бяспекі, і для нас  яно гучыць таксама востра, як для іншых развітых краін", — падкрэсліў ён.

Па-другое, згодна з інфармацыяй беларускага лідара, да гэтага часу існуюць недапрацоўкі з забеспячэннем шматдзетных сем'яў жыллём. "Мы пра гэта дамовіліся. 2021 год — мяжа, за якую непажадана выходзіць пры забеспячэнні шматдзетных сем'яў жыллём", — адзначыў Прэзідэнт.

Па-трэцяе, была прынята Праграма "Здароўе народа". Як яна выконваецца?  Лукашэнка звярнуў увагу, што пакуль вядзецца вельмі шмат размоў пра здаровы лад жыцця, тады як дзеянняў у гэтай сферы не хапае. Прэзідэнт папярэдзіў прысутных: калі хоць адно яго даручэнне не будзе выканана, варта сабрацца і сыходзіць.

"Я таксама патрабаваў ад міністра аховы здароўя прыняць комплексныя меры па зніжэнні смяротнасці. Хацелася б пачуць, што ў гэтым напрамку робіцца", — сказаў кіраўнік дзяржавы.

На думку беларускага лідара, задача — у бліжэйшыя гады распрацаваць і рэалізаваць дзейсныя меры, накіраваныя на павелічэнне нараджальнасці насельніцтва Беларусі. Важна надаць увагу фарміраванню ў грамадстве пазітыўнага і паважлівага стаўлення да мацярынства і сямейных каштоўнасцяў.

Таксама ён заклікаў удзельнікаў нарады актыўна абмяркоўваць і выказваць канкрэтныя прапановы па паляпшэнні дэмаграфічнай сітуацыі ў краіне.

"Яшчэ раз падкрэсліваю: ніякіх самасправаздач і разглагольстванняў. Трэба было разглядаць ва ўрадзе гэтыя пытанні перш, чым прыходзіць да Прэзідэнта. Да мяне трэба прыходзіць з канкрэтнымі прапановамі — што будзем рабіць і ў якім аб'ёме", — дадаў Аляксандр Лукашэнка.

Пасля гэтага ён перадаў слова міністру працы і сацыяльнай абароны Ірыне Касцевіч.

Яна адзначыла, што з 1993 года наша краіна ўступіла ў этап дэпапуляцыі — смяротнасць перавышае нараджальнасць. Дзяржава не ўзнаўляе сваё насельніцтва з 1978 года, калі каэфіцыент простага ўзнаўлення ўпаў ніжэй парогавага значэння 2,15. 2018 год — сумарны каэфіцыент складае 1,414.

"Прынятыя на дзяржаўным узроўні меры дазволілі дамагчыся, пачынаючы з 2010 года, адноснай стабілізацыі дэмаграфічнай сітуацыі, аднак дадзеная тэндэнцыя не набыла ўстойлівы характар, пра што сведчаць вынікі апошніх двух гадоў. Нараджальнасць зніжаецца. У 2018 годзе нарадзілася менш за 5 тысяч дзяцей, што на 8 % менш, чым у 2017. Узровень смяротнасці застаецца досыць высокім. Памерла амаль 200 тысяч чалавек, што на 600 чалавек больш, чым у 2017. У выніку натуральнае змяншэнне склала больш за 25 тысяч чалавек, павялічыўшыся на 9 тысяч. Вынікі 2018 года: колькасць насельніцтва паменшылася і склала амаль 9 млн 476 тысяч чалавек ", — заявіла Ірына Касцевіч.

Уладзіслаў ЛУКАШЭВІЧ

Фота БЕЛТА

Выбар рэдакцыі

Грамадства

Пераможца «Жанчыны года-2018»: З трыма дзецьмі можа справіцца кожная пара

Пераможца «Жанчыны года-2018»: З трыма дзецьмі можа справіцца кожная пара

Тры гады таму прозвішча Трыкоза ўжо было на слыху.

Грамадства

Мэр Брэста Аляксандр Рагачук: Дзеці ў пясочніцах на касцях гуляць не будуць

Мэр Брэста Аляксандр Рагачук: Дзеці ў пясочніцах на касцях гуляць не будуць

Кіраўнік Брэсцкага гарвыканкама адмеркаваў рэзанансную тэму раскопак на тэрыторыі гета.

Культура

Як  мастак Май Данцыг ствараў свае карціны

Як мастак Май Данцыг ствараў свае карціны

Наватар, «шасцідзясятнік», ваяўнічы аптыміст — гэта ўсё пра яго.