Вы тут

42 ВНУ атрымаюць доступ да поўных тэкстаў часопісаў Elsevier


Адпаведнае пагадненне было заключана паміж Галоўным інфармацыйна-аналітычным цэнтрам (ГІАЦ) Мінадукацыі і кампаніяй Elsevier. Спонсарам праекта выступіў беларускі бізнесмен Леанід Лознер, вядомы сваімі шматлікімі валанцёрскімі праектамі і інвестыцыямі ў навуку і адукацыю.


У рамках пагаднення доступам да сусветнай навуковай інфармацыі на платформе ScienceDirect упершыню будуць забяспечаны 42 вышэйшыя навучальныя ўстановы нашай краіны.

— ScienceDirect — найбуйнейшая навуковая база, у якой акумулюецца сусветны вопыт даследаванняў у самых розных галінах. Маючы доступ да такой інфармацыі, беларускія даследчыкі змогуць аператыўна аналізаваць разнастайныя навуковыя новаўвядзенні і не адхіляцца ад сусветнага мэйнстрыму ў навуковых пошуках, — патлумачыў важнасць падзеі дырэктар ГІАЦ Мінадукацыі Павел ЛІС. —  Спадзяёмся, што гэта дазволіць ім зрабіць якасны скачок у сферы інавацыйнай вытворчасці і вывесці беларускую навуку на прынцыпова новы ўзровень. Дадзены праект з'яўляецца пілотным, але мы спадзяемся на ўстанаўленне надзейных доўгатэрміновых кантактаў, таму што супрацоўніцтва з “Elsevier” — гэта рэальны крок да інтэграцыі беларускай навукі ў сусветную інфармацыйную прастору і магчымасць заняць у ёй годнае месца.

“Сёння стартуе па-сапраўднаму беспрэцэдэнтны праект. ScienceDirect — самы цытуемы і запатрабаваны ў свеце інструмент. Для ВНУ сістэмны доступ да публікацый такога ўзроўню — гэта якасна новыя ўмовы навуковага пошуку, якія будуць спрыяць прыцягненню замежных студэнтаў і павышэнню экспарту адукацыйных паслуг, — адзначыў рэгіянальны дырэктар Elsevier у Рэспубліцы Беларусь Сяргей РАВЯКІН. — Дарожная карта, якую мы распрацавалі сумесна з ГІАЦ Мінадукацыі, прадугледжвае правядзенне розных семінараў і трэнінгаў, у рамках якіх мы дапаможам даследчыкам укараніць у практыку выкарыстанне апошніх сусветных інструментаў пошуку і аналізу інфармацыі, а аўтарам артыкулаў — падабраць міжнародны часопіс, які найбольш падыходзіць для публікацыі вынікаў іх навуковай працы. Акрамя таго, мы акажам кансультацыйную дапамогу беларускім навуковым выданням, якія хочуць стаць вядучымі ў свеце і маюць для гэтага патэнцыял. Мы рэалізуем сістэмны праект і спадзяемся, што вынікі не прымусяць сябе доўга чакаць!”

— Падтрымкай гэтага праекта я ў нейкім сэнсе вяртаю доўг навуковаму асяроддзю, якое сфарміравала маю асобу і мой светапогляд. І вельмі спадзяюся, што доступ да сусветнай навуковай інфармацыі дасць нашым маладым даследчыкам, акрамя ўсіх відавочных пераваг, яшчэ і пачуццё таго, што яны — неад'емная частка сусветнага навуковага асяроддзя. Мне здаецца, для маладога вучонага вельмі важна адчуваць сябе інтэграваным у сусветную навуковую супольнасць, — падзяліўся сваімі думкамі Леанід ЛОЗНЕР. —  Гэты праект — канкрэтны ўклад у пабудову сучаснай адукацыі і стварэнне ўніверсітэта новага ўзроўню. Я разглядаю ўдзел у ім як магчымасць зрабіць штосьці канкрэтнае і ўдзячны ўсім за тое, што праект адбыўся.

ScienceDirect — вядучая мультыдысцыплінарная інфармацыйная платформа рэцэнзаванай навуковай літаратуры Elsevier для навукоўцаў, якая ўтрымлівае больш за 15 мільёнаў публікацый з 3 800 навуковых часопісаў і 37 тысяч кніг Elsevier  і прэстыжных навуковых таварыстваў.

Elsevier — інфармацыйна-аналітычная кампанія, якая дапамагае навуковым арганізацыям і навукоўцам рабіць важныя адкрыцці. Кампанія прадастаўляе анлайн-рашэнні і інструменты, такія як ScienceDirect, Scopus, SciVal, ClinicalKey, Sherpath.

Elsevier выдае больш за 2500 навуковых часопісаў, уключаючы The Lancet і Cell , а таксама 38000 электронных кніг і шмат вядомых даведачных выданняў, у тым ліку Gray’s Anatomy.

Надзея НІКАЛАЕВА

Выбар рэдакцыі

Грамадства

Як у Беларусі трансплантуюць органы

Як у Беларусі трансплантуюць органы

І чаму да нас на аперацыі едуць замежнікі.

Грамадства

Карэспандэнты «Звязды» наведалі «Воўчыя норы»

Карэспандэнты «Звязды» наведалі «Воўчыя норы»

Там адбываюць пакаранне мужчыны, упершыню асуджаныя за незаконны абарот наркотыкаў.

Спорт

Аляксандра Герасіменя: У кожнага свой рэцэпт поспеху

Аляксандра Герасіменя: У кожнага свой рэцэпт поспеху

Аляксандра Герасіменя — сапраўдны баец, а яшчэ — клапатлівая маці і жонка. І проста працавіты чалавек, які не ведае перашкод.