Біятлоннае свята ў «Раўбічах» працягваецца. Нагадаем, у адкрытым чэмпіянаце Еўропы пад Мінскам бяруць удзел спартсмены з больш чым 30-ці краін свету. Геаграфія выходзіць далёка за рамкі еўрапейскага кантынента. Напрыклад, на трасе ў «Раўбічах» можна назіраць прадстаўнікоў Паўночнай Амерыкі і нават Бразіліі.
Учорашні дзень адзначыўся складанымі ўмовамі надвор'я, аднак, беларускія арганізатары не атрымалі нараканняў ад прадстаўнікоў Міжнароднага саюза біятланістаў, здолеўшы захаваць трасу. Сёння надвор'е ў «Раўбічах» нашмат прыемней і для спартсменаў і для балельшчыкаў - сонца, лёгкі мароз, аднак захоўваецца парывісты вецер.
Пасля першага спаборніцкага дня, за які былі разыграны два камплекты ўзнагарод, табліцу медальнага заліку ўзначальваюць зборныя Швецыі і Балгарыі, у скарбонцы якіх па адной залатой узнагародзе. Далей размясціліся каманды Нарвегіі, Украіны і Беларусі.
Сёння спаборніцкая праграма чэмпіянату Еўропы працягваецца змешанымі эстафетамі.
У адзіночнай змешанай эстафеце зборную Беларусі прадставілі Алена Кручынкіна і Уладзімір Чапелін. Гэта гонка, дзе фаварытамі традыцыйна з'яўляюцца снайперы, наша ж пара не справілася са стральбой і замкнула дзесятку наймацнейшых.
- Сёння дыстанцыя была значна карацейшая, у гэтым плане было лягчэй, але на дыстанцыі была нейкая мітусня, - дзяліцца ўражаннямі Алена Кручынкіна. - Як і ўчора, сёння даводзілася спраўляцца з ветрам, зараз гэта ўдалося мне лепш. Пасля індывідуальнай гонкі было мала часу на аднаўленне, нягледзячы на гэта, адчуваю сябе нядрэнна.
Перамогу ў гонцы атрымалі расіяне ў складзе Яўгеніі Паўлавай і Дзмітрыя Малышкі, сярэбранымі прызёрамі сталі шведы, замкнулі тройку наймацнейшых французы.
Дар’я Лабажэвіч
Фота Ганны Занкавіч
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.