Вы тут

За няякасныя паслугі ЖКГ спажыўцы заплацяць менш


Жыллёва-камунальныя паслугі (ЖКП), якасць якіх не адпавядае патрабаванням, нарматывам і параметрам, павінны аплачвацца адпаведна. Зменены парадак пераразліку платы за «некандыцыю», паслугі з грубымі парушэннямі ці ўвогуле невыкананыя абавязкі камунальнікаў адаб'юцца і на іх кішэнях. Новаўвядзенні, якія зробяць адказнасць за ЖКП больш жорсткай, замацаваны ў адпаведным дакуменце.


Вярнуць 30 % за ваду

Дакумент павінен падштурхнуць пастаўшчыкоў паслуг да больш якаснай работы, а ў жыхароў — выхаваць адчуванне ўласніка, лічыць Генадзь АКСЦІЛОВІЧ, прэс-сакратар Міністэрства ЖКГ:

— Добрасумленны спажывец, атрымліваючы «жыроўку», прывык спраўна плаціць па рахунках. І нават калі ён незадаволены якасцю абслугоўвання, стрымлівае эмоцыі. Часцей спажывец выплюхвае свае пачуцці ў зваротах і скаргах. То ў кватэры горача, то вада недагрэтая, то ў пад'ездзе брудна. Цяпер адносіны пастаўшчыкоў і спажыўцоў пяройдуць у эканамічную плоскасць.

Раней за няякасную ваду ў кране сям'я з трох чалавек, якая жыве ў двухпакаёвай кватэры, магла атрымаць назад крыху больш за рубель, бо памер пераразліку складаў 10 % ад кошту вады. Сёлета і ў наступным годзе, калі вада не адпавядае санітарным нормам, гэты памер застанецца на ранейшым узроўні ў 10 %, але далей будзе павышацца паэтапна: у 2021—2022 — на 15 %, у 2023-м — на 20, у 2024-м — на 25, у 2025-м — на 30 %.

— Стратэгія плаўнага павелічэння пакідае для водаканалаў магчымасць мадэрнізаваць вытворчасць. Збудаваць станцыі абезжалезвання, памяняць абсталяванне на свідравінах, рэканструяваць ачышчальныя збудаванні, — заўважыў прэс-сакратар. — Прадпрыемствы, якія не захочуць выкарыстаць гэты час для ўдасканалення сваёй працы, у прамым сэнсе разлічацца за гэта рублём.

Пераразлік за ваду можна зрабіць і тады, калі яна пастаўлялася з перапынкамі. Калі на працягу месяца ваду адключаць больш як двойчы на тэрмін, які перавышае час, адведзены на гэта нарматыўнымі дакументамі, можна патрабаваць памяншэння на 10 % аплаты за ўвесь месяц. Згодна з дакументам, разліковы час на ліквідацыю аварый — ад 8 да 24 гадзін.

Плаціць адно за 24 °С

Новы дакумент прадугледжвае норму, згодна з якой перанаграванне памяшканняў, калі жыхарам прыходзіцца не зачыняць форткі ледзьве не суткамі, бо ў кватэрах надта горача, стане праблемай не людзей, а пастаўшчыка паслугі. Цяпер уласнік можа плаціць толькі за цяпло, якое павінна даваць у кватэры +24 °С. Астатнія выдаткі за празмернае ацяпленне — калі тэмпература звыш 24 градусаў трымаецца больш як суткі, — клопат вытворцы цеплыні.

Магчымасць заплаціць менш за ацяпленне, калі ў кватэры, наадварот, холадна — больш за суткі тэмпература не падымаецца да +18 °С.

Смецце, уборка і газ

Недаплачваць за вываз смецця, як і раней, можна за столькі дзён, колькі адходы не забіралі. Аднак цяпер гэта рабіць можна адпаведна са схемамі абарачэння з адходамі на тэрыторыі пэўнага населенага пункта. А ўмовы вывазу смецця ва ўсіх розныя: штодня ці некалькі разоў на тыдзень, і зацвярджаюцца мясцовымі выканкамамі.

— Калі адходы, згодна са схемай, павінны былі вывезці, умоўна, шэсць разоў за месяц, а фактычна вывезлі пяць, то плата за вываз смецця паменшыцца на адзін раз, — растлумачыў Генадзь Аксціловіч. — З маршрутнымі графікамі абслугоўвання жылых дамоў можна азнаёміцца ў абслугоўваючай арганізацыі.

Такі ж прынцып дзейнічае і адносна ўборкі пад'ездаў і месцаў агульнага карыстання. Калі па графіку ўборка павінна была адбыцца, а на справе не мялі і не мылі, і хтосьці з жыхароў заявіў пра гэта, усе кватэры атрымаюць пераразлік.

Менш на 10 % заплацяць спажыўцы і ў выпадку, калі больш як на суткі зацягнуўся рамонт газавых ці электрычных сетак.

Ірына СІДАРОК

Выбар рэдакцыі

Грамадства

Карэспандэнт «Звязды» высвятляла, чаму так цёмна на асветленых вуліцах Магілёва

Карэспандэнт «Звязды» высвятляла, чаму так цёмна на асветленых вуліцах Магілёва

Вечарам прайсціся ўздоўж цэнтральнай вуліцы Першамайскай у Магілёве адно задавальненне.

Спорт

Баскетбаліст Бенджамін-Павел Дуду: У Гане мяне называлі белым

Баскетбаліст Бенджамін-Павел Дуду: У Гане мяне называлі белым

Мама Бена — беларуска, тата — ураджэнец Ганы.

Эканоміка

Куды звяртацца, калі грамадзяніну затрымліваюць зарплату?

Куды звяртацца, калі грамадзяніну затрымліваюць зарплату?

Адказ на гэта і іншыя пытанні — у гутарцы з Дзмітрыем Шаўчуком.