Вы тут

Міністэрства інфармацыі Рэспублікі Беларусь: працяг супрацоўніцтва з КНР


У Мінск для ўдзелу ў міжнароднай навукова-практычнай канферэнцыі “Моўная і гуманітарная адукацыя ў эпоху глабалістычных выклікаў” наведалася дэлегацыя Другога Пекінскага ўніверсітэта замежных моў.


Адна з сустрэч з кітайскімі навукоўцамі прайшла ў Міністэрстве інфармацыі Рэспублікі Беларусь. І гэта невыпадкова: менавіта гэты орган дзяржаўнага кіравання звяртае немалую ўвагу на развіццё беларуска-кітайскіх гуманітарных сувязяў. Да ўвагі гасцей з Паднябеснай была разгорнута выстаўка кніжных навінак у галіне кітаістыкі. А гэта – і аўтарскія анталогіі перакладаў кітайскай паэзіі на беларускую мову Міколы Мятліцкага “Пад крылом Дракона”, “Пялёскі лотаса і хрызантэмы”, і кнігі серыі “Светлыя знакі: Паэты Кітая”, у якой пабачылі зборнікі вершаў Ван Вэя, Лі Бо, Ду Фу, Ай Ціна і іншых класічных і сучасных аўтараў, пераўвасобленыя на мову Купалы, падручнікі па кітайскай мове, іншыя ўсходазнаўчыя выданні. 

  – Мы ўражаны, колькі вамі зроблена па прапагандзе кітайскай літаратуры, кітайскага асветніцтва ў Беларусі, – зазначыла падчас сустрэчы прарэктар універсітэта з Пекіна спадарыня Чжу Іэйфэнь. – Але і мы падрыхтавалі падарунак. Параўнальна нядаўна пабачыў свет часопіс “Захад” з публікацыямі твораў беларускіх пісьменнікаў у перакладзе на кітайскую мову. Ініцыятыва гэтага праекта належыць доктару філалагічных навук спадарыні Чжан Хуэйцінь, якая працуе ў нашым універсітэце. Спадзяёмся на рэалізацыю ў бліжэйшы час і іншых творчых праектаў, якія б спрыялі развіццю беларуска-кітайскіх гуманітарных, літаратурных сувязяў. У свой час некалькі артыкулаў і рэцэнзій на беларускую тэму з’явіліся ў пекінскім часопісе “Руская літаратура і мастацтва”, які рэдагуе доктар філалагічных навук Ся Чжунсянь.

Удзельнік сустрэчы дырэктар выдавецтва “Мастацкая літаратура” паэт і празаік Алесь Бадак унёс прапанову выдаць у Кітаі аповесць “Чорны замак Альшанскі” Уладзіміра Караткевіча у перакладзе на кітайскую мову. Госці з Другога Пекінскага універсітэта замежных моў паабяцалі разгледзець гэтую ініцыятыву.

Мікола БЕРЛЕЖ

Фота Андрэя САЗОНАВА

Выбар рэдакцыі

Эканоміка

Прыватны бізнес выбірае Смілавічы

Прыватны бізнес выбірае Смілавічы

У гэтым упэўнілася карэспандэнт, наведаўшы пасёлак.

Грамадства

Карэспандэнты «Звязды» наведалі «Воўчыя норы»

Карэспандэнты «Звязды» наведалі «Воўчыя норы»

Там адбываюць пакаранне мужчыны, упершыню асуджаныя за незаконны абарот наркотыкаў.

Спорт

Аляксандра Герасіменя: У кожнага свой рэцэпт поспеху

Аляксандра Герасіменя: У кожнага свой рэцэпт поспеху

Аляксандра Герасіменя — сапраўдны баец, а яшчэ — клапатлівая маці і жонка. І проста працавіты чалавек, які не ведае перашкод.