Вы тут

Трактар-квэст прайшоў у Шчучыне


Незвычайны конкурс прайшоў упершыню ў Шчучыне (ды і ў краіне таксама) — спаборніцтва трактарыстаў-машыністаў, прысвечанае 75-годдзю вызвалення Беларусі ад нямецка-фашысцкіх захопнікаў. Гэта гульня з удзелам маладых механізатараў уключала ў сябе элементы арыентавання, выкананне заданняў на эрудыцыю, кемлівасць і логіку.


— Ідэю правядзення «Трактар-квэсту 2019» выказаў дырэктар раённага кінатэатра «Беларусь» Ігар Мікалаевіч Будзько — вялікі аматар тэхнікі і трактароў у прыватнасці. Ён звярнуўся з прапановай да кіраўніцтва райвыканкама, да праекта далучыўся наш Саюз моладзі, іншыя зацікаўленыя бакі, — расказала першы сакратар Шчучынскага райкама БРСМ Анастасія Цынгалёва.

На старт выйшлі дзесяць механізатараў ва ўзросце ад 25 да 35 гадоў — восем ад сельскагаспадарчых прадпрыемстваў раёна, двое — ад ЖКГ. Кожны выступаў на сваёй тэхніцы.

Напачатку ўдзельнікі квэсту праявілі свае веды ў тэорыі (конкурснае заданне «Веды — сіла! Няведанне — штраф і пазбаўленне правоў!»), а пасля прэзентавалі сваіх «жалезных коней» у самым відовішчным этапе — парадзе трактароў па вуліцы Леніна. Пасля арганізаваная калона канкурсантаў пераехала на колішні ваенны аэрадром, дзе прайшла асноўная частка практычных спаборніцтваў.

Падчас аднаго з іх — «Майстэрства не пральеш!» («Васьмёрка задам», «Здымі вядро», «Пералі максімальную колькасць вады», «Вярні вядро назад») — удзельнікі пералівалі (на трактарах!) ваду з аднаго вядра ў другое. Далей было квэст-арыентаванне «Ведаю мэту — не бачу перашкод!», падчас якога канкурсантаў чакала траса ў 15 кіламетраў і арыентаванне па навігатары ў лесе. Тут удзельнікам спаборніцтваў давялося праяўляць кемлівасць і веданне гісторыі роднага краю.

Пераможцаў квэсту чакалі каштоўныя падарункі — ноўтбук, навігатар, відэарэгістратар і, канешне ж, дыпломы. Найлепшым механізатарам па выніках конкурсу быў прызнаны прадстаўнік ААТ «Шчучынаграпрадукт» Аляксандр Варона. Другое месца заваяваў механізатар з КСУП «Саўгас Вялікае Мажэйкава» Сяргей Раманаў. На трэцім месцы — работнік Шчучынскай ЖКГ Віталій Орлік. Дарэчы, арганізатары падумалі і пра балельшчыкаў. Для іх была асобная намінацыя — «Найлепшая група падтрымкі». Ёй былі прызнаны актывісты ААТ «Васілішкі».

«Трактар-квэст 2019» праходзіў ад ранку да самага вечара, сабраўшы шмат гледачоў, якія атрымалі незабыўныя эмоцыі. Дык ці будзе працяг?

— Мы ўжо думаем над гэтым, — прыадкрыла сакрэт Анастасія Цынгалёва. — У наступным годзе, магчыма, правядзём ужо не раённыя спаборніцтвы, а трактарны квэст паміж суседнімі раёнамі.

Сяргей РАСОЛЬКА

Фота БЕЛТА

Загаловак у газеце: Квэст на... трактарах

Выбар рэдакцыі

Грамадства

Як сучасныя палешукі рыхтуюцца да свята Уваскрэсення Хрыстовага

Як сучасныя палешукі рыхтуюцца да свята Уваскрэсення Хрыстовага

Аўтар «Звязды» расказвае на прыкладзе сваёй сям'і.

Культура

ЗЕНА: Ад сцэны не стамляюся!

ЗЕНА: Ад сцэны не стамляюся!

Графік у артысткі вельмі насычаны.

Грамадства

Звыклыя выключнасці. Ці можна зразумець «лічбавае племя»?

Звыклыя выключнасці. Ці можна зразумець «лічбавае племя»?

Даследаванне «Пакаленне «Z» у пытаннях і адказах» было прадстаўлена падчас навуковага стэндапа, арганізаванага для навучэнцаў профільных педагагічных класаў у БДПУ.

Грамадства

Ежа ці сімвал? Самы час зацікавіцца роспісам яек

Ежа ці сімвал? Самы час зацікавіцца роспісам яек

Карэспандэнт «Звязды» схадзіла на майстар-клас па стварэнні «пісанак».