Вы тут

«Хачу добрага мужчыну». І ўсё?


Даўно ўжо я не наведвала ўрачыстых пасяджэнняў з нагоды свят. Так даўно, што і не ўспомню, калі гэта было апошнім разам... І вось надарылася пабыць на ўрачыстай імпрэзе напярэдадні 8 Сакавіка. Жанчыны ўсіх узростаў, найбольш з іх было сталых, сабраліся ў грамадска-культурным цэнтры Брэста. Трэба сказаць, што цяперашнія «пасяджэнні» кардынальна адрозніваюцца ад мерапрыемстваў дваццацігадовай даўніны, не кажучы ўжо пра савецкі час. Цяпер яны пазбаўлены ўсялякага афіцыёзу, сумных прамоў і дзяжурных выступленняў. Гэта святочная праграма, у згаданым выпадку ў гонар жанчын, аснову якой складае канцэрт прафесійных і самадзейных артыстаў. Канцэрт, скажу адразу, атрымаўся добры, удалы.


Ну, а віншаванне ад мужчынскай грамадскасці агучыў галава горада. Выступіў віртуозна, як заўсёды. Не раз даводзілася быць сведкай, як, напрыклад, на адкрыцці тэатральнага фестывалю альбо фэсту класічнай музыкі ён умее сказаць і прыгожа, і да месца. Выступае, дарэчы, аднолькава добра як на першай, так і на другой дзяржаўнай.

Зразумела, на жаночае свята ад Аляксандра Сцяпанавіча кабеты чакалі нечага асаблівага, ды не падмануліся. Па-першае, ён агучыў статыстыку. Аказваецца, у нашым горадзе пражывае на 26 тысяч жанчын больш, чым мужчын. Не нагода для аптымізму, але ж праўда жыцця, куды ад яе дзенешся? Потым мэр падзяліўся ўражаннямі ад прыёму ў гарвыканкаме, на які былі запрошаны 25 паспяховых гараджанак. Пасля чаго выняў з кішэні загадзя падрыхтаваную выразку з газеты, паводле яго слоў, гарадской газеты, якая заўсёды піша праўду, і зацытаваў фрагмент апытання, якое праводзілі супрацоўнікі напярэдадні свята. Яны пыталіся ў гараджанак, што тыя хацелі б атрымаць у якасці падарунка ў жаночы дзень. Адна з апытаных, дзяўчына па імені Аксана, чэсна прызналася: «Хачу добрага мужчыну. І ўсё.» «І гэта праўда гарадскога выканаўчага камітэта», — пракаментаваў яго кіраўнік, падкрэсліўшы сваё адзінства з газетай.

...Зала ўзарвалася апладысментамі. Як ні кажы, старшыня гарвыканкама агучыў для многіх самае таемнае, запаветнае і вельмі асабістае. Я таксама была пад уражаннем. Нават доўга не магла заснуць потым. І прымроіўся мне цэлы райцэнтр (26 тысяч) — не, не адзінокіх, а шчаслівых брастаўчанак. Яны: самадастатковыя, пры добрай рабоце, некаторыя яшчэ ў чаканні свайго прынца, іншыя гадуюць дзяцей, а тыя, што на заслужаным адпачынку, падарожнічаюць, ходзяць у клубы, тэатры, на выстаўкі. З горада ну зусім зніклі мужчыны-п'яніцы. Вось такіх, як той, якога давялося назіраць у святочны вечар каля магазіна «Мікс», што няўстойлівай хадой ішоў у бок крамы і трымаў за руку малое дзіця, зусім няма... З'явіліся другія, са светлым позіркам, яснымі вачыма, бо ў ваколіцах горада адкрылі ці то гіганцкую аўтабазу, ці нават касмадром. А можа, нашы былыя галовы сямействаў цудоўным чынам перавыхаваліся? Жанчыны ў адказ усе як адна кінулі курыць. Яны не выбягаюць на ганкі офісаў і не збіваюцца ў курылках прадпрыемстваў. Бо як сказаў аднойчы дырэктар буйной швейнай фірмы, яго работніцы замест вытворчай гімнастыкі просяць усталёўваць перапынкі на перакуры. Перасталі прасіць, і ў цэхі вярнулася вытворчая гімнастыка.

А горад стаў зялёны. Кругом такія астравы з пасадак, прыкладна як паміж гарвыканкамам і аблвыканкамам. І няма гмаху на месцы прыватнага сектара з садамі і салаўямі. І зніклі гандлёвыя цэнтры, якія паглынулі апошнія лапікі зямлі ў многіх раёнах горада. На іх месцы вярнуліся бярозкі, алешыны. Нават бабулька з прыватнага сектара зноў там пасе казу. І запрасілі гэтую бабульку ў ліку 25 жанчын на прыём у гарвыканкам, прысвечаны жаночаму дню. Запрасілі не таму, што яна паспяховая бізнес-лэдзі, кіраўнік установы, прафесіянал, адзначаны ўрадавымі ўзнагародамі, а таму што яна адна з 26 тысяч адзінокіх брастаўчанак, якія ўсё жыццё працавалі у гэтым горадзе... Шкада ўсё ж, што гэта быў сон.

Святлана ЯСКЕВІЧ

Выбар рэдакцыі

Культура

Як  мастак Май Данцыг ствараў свае карціны

Як мастак Май Данцыг ствараў свае карціны

Наватар, «шасцідзясятнік», ваяўнічы аптыміст — гэта ўсё пра яго.

Грамадства

Як ператварыць звычайны ўрок беларускай літаратуры ў творчую майстэрню?

Як ператварыць звычайны ўрок беларускай літаратуры ў творчую майстэрню?

Настаўнікі ўпэўнены: ці будуць вучні чытаць, у многім залежыць ад іх саміх. 

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.