"Цешчыны зборы" правядуць у Полацкім раёне

Вясновыя "Цешчыны зборы" пройдуць сёння ў Полацкім раёне, паведамляе БЕЛТА.

Народную вечарыну ў мясцовых абрадавых традыцыях правядзе старэйшае пакаленне жыхароў вёскі Палата і госці з усіх куткоў раёна. Святочны настрой дапаможа стварыць народны вакальны ансамбль песні "Млын" Ветрынскага Дома культуры.

Галоўнымі героямі мерапрыемства стануць цешчы і зяці. На пачатку свята апошнія ўласнаручна правязуць дарагіх цешч па крузе гонару на возе. Пасля дэманстрацыі моцу волатаўскага пачнецца экспрэс-курс "цешчына стажыроўка". Пад строгім наглядам пільных радзіцельніц зяцям трэба будзе прадэманстраваць навыкі паводзінаў з жонкай у побыце ў наступных "дысцыплінах": падбіць абцасікі, пераматаць клубкі нітак, аддзяліць фасолю ад грэчкі, зляпіць пельмешкі з бульбяным начыннем, паставіць чыгунок у печ. Завершыць гэты марафон блінны забег "цешчын спакус".

Разам з тым і цешчам трэба будзе даказаць прафпрыдатнасць. Іх чакае зяцева рэвізія "У цешчы ў засеках" і частушачны батл "Ой, ты мой зяцёк". Жартоўныя спаборніцтвы завершацца прымірыцельнымі этна-скокамі "Цешча і зяць ідуць танцаваць". Фіналам стане пачастунак кашай на мёду "зяцева вернасць", каб зяць заставаўся верным сваім блізкім ўсё жыццё. Акрамя таго, правядуць распальванне вогнішча "Полатаўскі касцёр", каб вясна была цёплай.