Вы тут

Сувораўскае вучылішча вачыма яго навучэнцаў


Сакавік для школьнікаў — той час, калі трэба вызначацца з выбарам будучай альма-матар. Хтосьці вырашае звязаць сваё жыццё з войскам яшчэ падлеткам і спрабуе паступіць у Мінскае Сувораўскае ваеннае вучылішча. Іншыя выбіраюць у ваенныя ВНУ або адпаведныя факультэты ў грамадзянскіх універсітэтах.


Быць сувораўцам ва ўсе часы было прэстыжна. Конкурсны адбор у вучылішча істотны. Але і вучыцца там больш складана, чым у звычайнай школе — жорсткі рэгламент часу, спецыфіка вайсковых прадметаў і вялікая ўвага да фізічнай падрыхтоўкі. Паколькі большасць сувораўцаў звязвае сваю дзейнасць з сілавымі структурамі, то мяркуецца, што яны павінны быць усебакова развітыя. У тым ліку — і ў творчым складніку.

...Яўген Давыдоўскі родам са Стоўбцаў. Ён вучыцца ў сувораўскім другі год. Сёлета перамог у патрыятычным творчым конкурсе, які праводзіўся ў вучылішчы. Пісаў сачыненне па-беларуску.

— Мой дзед быў вайскоўцам, і гэта натхніла мяне на тое, каб самому стаць у армейскія шэрагі. Вось толькі паступіць сюды было вельмі няпроста. Спярша мы праходзілі медыцынскі агляд, пасля здавалі псіхалагічны тэст. А паколькі я вучыўся ў школе нядрэнна, то здаць іспыты па матэматыцы і мове было зусім няцяжка. Самае галоўнае, чаму я навучыўся за гэты час, — самастойнасці асабістага жыцця. Праўда, доўга ўцягваўся ў распарадак дня. Пад'ём — абавязкова а сёмай раніцы, нягледзячы ні на што. Пасля — зарадка, умыванне, прыбіранне ложка, сняданак — і ўрокі.

Сябе Яўген бачыць пасля вучылішча лётчыкам. Для гэтага ўжо цяпер на паглыбленым узроўні вучыць фізіку і матэматыку. Добрыя адзнакі заахвочваюцца — за поспехі ў вучобе хлопцаў узнагароджваюць звальненнем на выхадныя.

— Звычайна мы ходзім у звальненні раз на два тыдні. Крайні тэрмін для вяртання — пяць гадзін вечара ў нядзелю. Вядома, прыязджаюць і бацькі да мяне, але ўсё-такі часцей я сам езджу ў Стоўбцы. І часам лаўлю позіркі на сабе, калі іду ў форме дадому з вакзала. Але нават калі звальнення няма, то для нас створана шырокая культурная праграма. Кожны раз мы абавязкова кудысьці ходзім — у музеі, паркі, на выстаўкі...

З Вячаславам Дзергачовым, які таксама вучыцца на другім курсе сувораўскага, мы гутарым па-беларуску. Хлопец раней вучыўся ў беларускамоўнай гімназіі ў Чэрвені, падцягваў свае веды самастойна.

— Аднойчы ўвечары я сёрфіў па інтэрнэце. І вось убачыў недзе аб'яву, што прыкладна праз месяц у сувораўскім вучылішчы будзе дзень адкрытых дзвярэй. Адразу пачаў распытваць дзядулю і бабулю, ці былі ў маёй сям'і ваенныя. Даведаўся, што толькі мой прадзед ваяваў падчас Вялікай Айчыннай. І так я вырашыў, што буду першым ваенным у сям'і. З розных крыніц здабываў інфармацыю аб тым, як туды паступаць і як там вучацца. Давялося падцягваць фізічную падрыхтоўку. Напрыклад, раней у мяне былі цяжкасці з падцягваннямі. Цяпер жа для мяне падцягнуцца адзінаццаць разоў — проста. Бацькі паставіліся да майго выбару станоўча, але папрасілі сур'ёзна ўзважыць усе «за» і «супраць».

Да нас перыядычна прыходзяць з вышэйшых ваенных навучальных устаноў і расказваюць пра вучобу ў іх. Больш за ўсё мяне вабяць проціпаветраная абарона і сілы спецыяльных аперацый. На гэта паўплывалі многія фільмы. Але я разумею, што там вучыцца вельмі няпроста. Мы пастаянна займаемся баявой падрыхтоўкай. Напрыклад, акрамя страявой, мы ходзім у цір, страляем з аўтаматаў або пісталетаў. На гадзіну практыкі прыпадаюць дзве тэорыі.

Міхаіл Печуроў, які паступіў у вучылішча летась, — суворавец у трэцім пакаленні. Тут вучыліся яго дзед і бацька. Пазней яны сталі мотастралкамі. У гэтай спецыяльнасці бачыць сябе і Міхаіл.

— Я ведаю тактыка-тэхнічныя характарыстыкі аўтамата Калашнікава, пісталета Макарава. Навучыўся збіраць і разбіраць іх. Ды і прадметы выкладаюцца на зусім іншым узроўні, чым у школе. Таму патрабаванні больш жорсткія. А яшчэ дзейнічае сістэма залікаў! На самастойную падрыхтоўку нам адводзіцца тры гадзіны. Калі не падрыхтуешся — то атрымаеш дрэнную адзнаку і аўтаматычнае пазбаўленне звальнення.

Напрыклад, у звычайнай школе нам ставілі адзнакі па фізкультуры за тое, што мы гулялі ў футбол. Тут жа — поўны комплекс. Залік па фізкультуры мы здаём кожныя два тыдні. У яго ўваходзяць падцягванне, скачок у даўжыню, адцісканне,  вольныя практыкаванні...

Наступны дзень адкрытых дзвярэй у Сувораўскім вучылішчы пройдзе 23 сакавіка.

Валяр'ян ШКЛЕННІК

Фота Андрэя САЗОНАВА

Загаловак у газеце: Суворавец — гучыць з гонарам

Выбар рэдакцыі

Культура

Як  мастак Май Данцыг ствараў свае карціны

Як мастак Май Данцыг ствараў свае карціны

Наватар, «шасцідзясятнік», ваяўнічы аптыміст — гэта ўсё пра яго.

Грамадства

Як ператварыць звычайны ўрок беларускай літаратуры ў творчую майстэрню?

Як ператварыць звычайны ўрок беларускай літаратуры ў творчую майстэрню?

Настаўнікі ўпэўнены: ці будуць вучні чытаць, у многім залежыць ад іх саміх. 

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.