Вы тут

У красавіку запланаваны візіт Аляксандра Лукашэнкі ў Турцыю


Аб гэтым стала вядома падчас сустрэчы Прэзідэнта з Надзвычайным і Паўнамоцным Паслом Турэцкай Рэспублікі ў Рэспубліцы Беларусь Кезбан Нілванай Дарамай.


Кіраўнік дзяржавы адзначыў, што прычына сустрэчы заключаецца не толькі ў яго глыбокай павазе да гэтай краіны і Пасла як добрага прадстаўніка Турцыі ў Беларусі. "Ёсць і практычны бок справы: у сярэдзіне красавіка, вы ведаеце, у нас — афіцыйны візіт Беларусі на вышэйшым узроўні ў Турцыю і сустрэча з вашым Прэзідэнтам, таму (ёсць — "Звязда") цэлы шэраг абставінаў, якія падштурхоўваюць нас да гэтай гутаркi", — адзначыў беларускі лідар.

Прэзідэнт выказаў надзею на тое, што бліжэйшыя пасяджэнні сумеснай міжурадавай камісіі Беларусі і Турцыі дадуць добрыя вынікі ў плане падрыхтоўкi перамоў з прэзідэнтам Рэджэпам Таіпам Эрдаганам.

"Але будзем лічыць, што наша з вамі сустрэча сёння — гэта першы крок да канкрэтнай падрыхтоўкi гэтага візіту. Таму, спадарыня Пасол, давайце абмяркуем нашы пытанні з пункту гледжання тых праблем, якія ў нас існуюць, таму што ўсё добрае — яно бачна, прыемна пра яго гаварыць, але, тым не менш, заўсёды ёсць жа і праблемы, якія трэба вырашаць, — сказаў Аляксандр Лукашэнка. — У адваротным выпадку, не трэба было б сустракацца, перамовы весці, калі ўсё добра. Мы павінны вырашаць праблемныя пытанні. Я хацеў , каб мы адкрыта абмеркавалі тыя праблемныя пытанні, якія вы лічыце трэба вырашыць сёння, заўтра і ў доўгатэрміновай перспектыве".

У адказ дыпламат падзякавала Прэзідэнту за прыём — для яе гэта гонар і магчымасць для правядзення падрыхтоўчай работы напярэдадні візіту кіраўніка беларускай дзяржавы ў Турцыю. Паводле яе слоў, сапраўды ёсць некалькі пытанняў, якія яна хацела б абмеркаваць.

"Перш за ўсё, хачу адзначыць, што мы не бачым праблем у адносінах паміж нашымі краінамі і лічым гэта нагодай для гонару", — адзначыла Кезбан Нілвана Дарама.

У тэму

Галоўнае аб гандлёва-эканамічным супрацоўніцтве Беларусі і Турцыі:

  • У 2018 годзе тавараабарот дасягнуў 984 млн долараў (104,4 % да 2017), экспарт — 183 млн долараў (136,2 %), імпарт — 801 млн долараў (99,2 %). Сальда адмоўнае ў памеры 618 млн долараў.
  • Без уліку нафты, нафтапрадуктаў і азотных угнаенняў тэмп росту экспарту склаў 140,8 %.
  • У студзені 2019 тавараабарот склаўся на ўзроўні 60,3 млн долараў (68,6 % да студзеня 2018), экспарт — 11,7 млн ​​ долараў (59,8 %), імпарт — 48,6 млн долараў (71,2 %) , сальда адмоўнае ў памеры 36,9 млн долараў.
  • Аснова беларускага экспарту ў Турцыю — калійныя ўгнаенні, злучэннi, якія ўтрымліваюць функцыянальную нітрыльную групу, жгут сінтэтычных нітак, ільняныя тканіны, полікарбонавыя кіслоты, сінтэтычныя нячэсаныя валокны, дрот з нелегіраванай сталі, паліўная драўніна, газетная папера.
  • У сваю чаргу, мы імпартуем сельгаспрадукцыю, трыкатажныя палотны і тканіны, сінтэтычныя ніткі, адзенне і абутак, часткі і прылады для аўтатрактарнай тэхнікі.
  • У 2018 годзе абарот паслуг склаў 54,5 млн долараў (117,6 % да 2017), экспарт — 37 млн ​​долараў (122,3 %), імпарт — 17,5 млн долараў (108,9 %). Сальда станоўчае ў памеры за 19,5 млн долараў.
  •  Па выніках 2018-га аб'ём турэцкіх інвестыцый у эканоміку Беларусі склаў 43,1 млн долараў (83,6 % да 2017), у тым ліку прамых — 41,5 млн долараў (96,5 %).

Пазней падрабязнасцямі сустрэчы з кіраўніком беларускай дзяржавы дыпламат падзялілася з журналістамі

"Безумоўна, гаворка ішла пра тэмы, якія звязаны з падрыхтоўчымі пытаннямі перад візітам спадара Прэзідэнта ў Турэцкую Рэспубліку. Мы абмяняліся думкамі па актуальных пытаннях, якія стаяць на парадку, — адзначыла яна. — Справа ў тым, што два гады таму нам была пастаўлена мэта — працаваць над павелічэннем (паказчыкаў — "Звязда") гандлёва-эканамічных адносін, а таксама пашыраць супрацоўніцтва па шэрагу пытанняў, сярод якіх — супрацоўніцтва ў сферы адукацыі, навукі і тэхналогій".

Яна патлумачыла, што мае на ўвазе афіцыйны візіт прэзідэнта Турцыі ў Рэспубліку Беларусь у лістападзе 2016 года. Паводле яе слоў, на сустрэчы з Аляксандрам Лукашэнкам абмеркавалі тыя поспехі, якія былі дасягнуты з моманту пастаноўкі мэты два гады таму, таксама казалі пра тое, што бакам неабходна ставіць больш амбіцыйныя мэты на наступны перыяд.

"Справа ў тым, што адносіны паміж краінамі грунтуюцца на глыбокім узаемным даверы, а таксама на дружбе. І мы валодаем вельмі моцным фундаментам для развіцця адносінаў, тым больш, што якіх-небудзь пытанняў, якога-небудзь праблемнага парадку паміж нашымі краінамі не існуе", — падкрэсліла Кезбан Нілвана Дарама.

Яшчэ на сустрэчы абмяркоўваліся магчымасці пашырэння спектру пытанняў, па якіх вядзецца двухбаковае супрацоўніцтва, — гэта і павелічэнне рэйсаў паміж дзвюма дзяржавамі, і развіццё гандлёва-эканамічных адносін у больш збалансаваным разуменні, і рэалізацыя мер падтрымкі для прыцягнення большай колькасці турэцкіх інвестараў у беларускую эканоміку, і развіццё адносін у сферы турызму.

Дарэчы, у рамках візіту будзе дапоўнена дагаворна-прававая база.

Магчыма, напярэдадні або падчас візіту Прэзідэнта ў Турцыю будуць адкрыты сумесныя прадпрыемствы, рэалізаваны праекты? "Цяпер гаворка ідзе пра тры праекты, якія атрымаюць рэалізацыю ў рамках візіту. Я пакуль не хацела б агучваць іх, пакуль што гэта будзе занадта заўчасна", — адзначыла яна.

Аднак дыпламат распавяла, што ў рамках візіту запланаваны форум, на якім дзелавыя колы змогуць абмеркаваць новыя напрамкі дзейнасці. Кезбан Нілвана Дарама выказала надзею, што на гэтым мерапрыемстве новыя праекты будуць створаны і, разам з навінамі аб візіце Прэзідэнта ў Турцыю, аб іх стане вядома ў СМІ.

Уладзіслаў ЛУКАШЭВІЧ

Фота БЕЛТА

Выбар рэдакцыі

Культура

Больш за 100 літаратараў з усіх рэгіёнаў краіны возьмуць удзел у мерапрыемствах Дня беларускага пісьменства

Больш за 100 літаратараў з усіх рэгіёнаў краіны возьмуць удзел у мерапрыемствах Дня беларускага пісьменства

Свята, якое ўжо традыцыйна ладзіцца ў першую нядзелю верасня, сёлета прымае Слонім.

Грамадства

Як працуюць сядзелкі

Як працуюць сядзелкі

Попыт на сядзелак ці медсясцёр, якія могуць даглядаць цяжка хворых людзей на даму, пастаянна расце.

Культура

Алесь Родзім: Рабілі «афармілаўку» для калгасаў, вярталіся ў свае падвалы і працягвалі маляваць

Алесь Родзім: Рабілі «афармілаўку» для калгасаў, вярталіся ў свае падвалы і працягвалі маляваць

Беларускаму складніку Тахелеса прысвечаны арт-фестываль «Міфалагема тысячагоддзя», што адкрыўся ў прасторы Ок16 15 жніўня.