Вы тут

Прэм'ера забаўляльна-інтэлектуальнага шоу «На вылет!» пройдзе 31 сакавіка


Белтэлерадыёкампанія рыхтуе да запуску новы забаўляльна-інтэлектуальны праект — шоу «На вылет!», галоўны прыз якога складае 2000 беларускіх рублёў. Першыя чатыры выпускі інтэлектуальнай гульні ўжо запісаныя, а прэм'ера праекта, цэнтральнай дзеючай асобай якога стаў радыёвядучы і праграмны дырэктар станцыі «Unіstаr» Аляксандр Найдзёнаў, адбудзецца на «Беларусь 1» на наступным тыдні — 31 сакавіка.


Гульня, удзельнікаў якой ва ўзросце 18+ набіраюць па папярэднім запісе, складаецца з пяці раўндаў. У кожным з іх ігракі павінны правільна адказаць на пытанні вядучага — спачатку простыя, а потым усё больш мудрагелістыя, далёка па-за школьнай праграмай. Пры гэтым той, хто памыляецца альбо папросту не ведае адказу, сыходзіць «на вылет», і колькасць удзельнікаў няўхільна скарачаецца: спачатку іх 32, потым 16, 8, 4, 2... І як апетыт прыходзіць падчас яды, у гэтым выпадку азарт нараджаецца ў працэсе гульні, людзі ўсё больш уцягваюцца ў інтэлектуальнае спаборніцтва, і праявіць сябе можа абсалютна кожны. На ўсіх этапах ёсць свае спецыяльныя прызы, і каманда ў любы момант можа задаволіцца імі і пакінуць гульню — тады шанц паказаць сваю эрудыцыю атрымлівае каманда, якая раней прайграла. Пераможцу ж прапануюць узяць удзел у супергульні, і, калі ўдасца адказаць хоць бы на адно з трох зададзеных пытанняў, галоўны прыз у яго ў кішэні. Зрэшты, магчымыя і іншыя расклады і сюрпрызы, а таксама вяртанне ў барацьбу тых, хто выбыў з яе першы, — шанц выйграць ёсць практычна ў кожнага, і гэта робіць праект дынамічным і захапляльным. Асаблівае ж хараство і каштоўнасць новага шоу ў тым, што гэта не запазычаны з іншых каналаў і краін папулярны фармат, а ўласная, цалкам арыгінальная прыдумка.

«Мне спадабаўся атрыманы вынік, — падзяліўся пасля здымак аўтар ідэі і рэжысёр гульні «На вылет!» Яўген Папковіч. — Выйшла на сто працэнтаў тое, што я і задумваў, калі распрацоўваў правілы праекта. Больш за тое, у працэсе мантажу мы і самі захапіліся, уцягнуліся ў праграму, нібы наноў перанесліся на пляцоўку — спадзяюся, што гледачоў гульня таксама прыцягне».

Аляксандра Найдзёнава, у якога вялікі вопыт работы на радыё, але для тэлебачання гэта чалавек новы, абралі на ролю вядучага праз кастынг — стваральнікаў праекта падкупіў не толькі інтэлект вядучага, але і яго асаблівая харызма. «Ведаеце, ён умее прымяніць дзве грані: як выклікаць сімпатыю з першага позірку, так і ўключаць адмоўнае абаянне, халодную стрыманасць. Нам падалося, гэта менавіта тое, што патрэбна для праграмы, — расказаў «Звяздзе» рэжысёр. — Да таго ж, Саша малайчына, раней ніколі не здымаючыся, ён вытрымаў вялізную нагрузку — у адзін дзень мы запісвалі чатыры праграмы, так што можна толькі ўхваліць яго за гэтую вытрымку і самаадданасць у працы».

Вікторыя ЦЕЛЯШУК

Фота Ганны ЗАНКАВІЧ

Выбар рэдакцыі

Грамадства

Як сучасныя палешукі рыхтуюцца да свята Уваскрэсення Хрыстовага

Як сучасныя палешукі рыхтуюцца да свята Уваскрэсення Хрыстовага

Аўтар «Звязды» расказвае на прыкладзе сваёй сям'і.

Культура

ЗЕНА: Ад сцэны не стамляюся!

ЗЕНА: Ад сцэны не стамляюся!

Графік у артысткі вельмі насычаны.

Грамадства

Звыклыя выключнасці. Ці можна зразумець «лічбавае племя»?

Звыклыя выключнасці. Ці можна зразумець «лічбавае племя»?

Даследаванне «Пакаленне «Z» у пытаннях і адказах» было прадстаўлена падчас навуковага стэндапа, арганізаванага для навучэнцаў профільных педагагічных класаў у БДПУ.

Грамадства

Ежа ці сімвал? Самы час зацікавіцца роспісам яек

Ежа ці сімвал? Самы час зацікавіцца роспісам яек

Карэспандэнт «Звязды» схадзіла на майстар-клас па стварэнні «пісанак».