Вы тут

Юбілей запомніцца музыкай


Магілёўская гімназія­ каледж мастацтваў асаблівым чынам адзначыла 100‑годдзе: зладзіла першы міжнародны конкурс музыкантаў “Магілёўскія найгрышы”


Ульяна Астаньковіч са сваёй выкладчыцай і членамі журы

Можна, святкуючы юбілей, запрасіць гасцей на вялікі банкет. Аднак ці ж гэта крэатыўна? У нашай гімназіі-каледжы мастацтваў вырашылі ўпершыню арганізаваць конкурс юных музыкантаў. Так 23 і 24 лютага вядомая ў рэгіёне навучальна-культурная ўстанова стала домам для ўдзельнікаў, а таксама іх педагогаў, бацькоў, гледачоў — усіх гасцей адкрытага конкурсу выканаўцаў на баяне й акардэоне “Магілёўскія найгрышы”. Падзея адкрывала шэраг імпрэзаў, прысвечаных юбілею.

Такім чынам, конкурс — першы! Мы не імкнуліся неяк спецыяльна завабіць удзельнікаў, зрабіць яго маштабным. Аднак ажно 100 юных выканаўцаў з 26 музычных навучальных устаноў Беларусі, Літвы, Латвіі з’ехаліся ў Магілёў. Паказалі здольнасці свае, іншых паглядзелі-паслухалі ды зрабілі пэўныя высновы. Былі на конкурсе намінацыі “Баян” і “Акардэон” у шасці ўзроставых катэгорыях: ад 7–9 гадовых пачаткоўцаў да тых, хто ўжо на ІІІ-ІV курсах каледжа.

У калідорах і класах — шматлюдна. І шматгучна: удзельнікі паўтараюць конкурсныя творы. Бацькі нервуюцца, педагогі хвалююцца — зразумелая рэч. У журы, якое ўзначаліў старшыня Асацыяцыі беларускіх баяністаў і акардэаністаў, заслужаны артыст Беларусі, прафесар Беларускай дзяржакадэміі музыкі Мікалай Сеўрукоў, увайшлі вядомыя музыканты й педагогі. Былі ў журы віцэ-прэзідэнт Міжнароднай асацыяцыі музычных школ “Сon Anіma”, сябар Міжнароднай канфедэрацыі акардэаністаў (CІA) Сподрыс Качанс (Латвія), загадчык кафедры баяна й акардэона БДАМ, дацэнт Аляксандр Шувалаў, загадчыца аддзела акардэона Новавільнюскай музычнай школы Алена Бярэзіна (Літва), мастацкі кіраўнік і галоўны дырыжор Смаленскага рускага народнага аркестра імя В. П. Дуброўскага Ігар Каждан (Расія), загадчык кафедры музыкі ды эстэтычнай адукацыі Магілёўскага дзяржуніверсітэта імя А. Куляшова, дацэнт Пётр Забелаў. Потым яны адзначалі: узровень падрыхтоўкі многіх выканаўцаў быў высокі. Канкурэнцыя! Выбраць лепшых аказалася няпроста.

Два Гран-пры конкурсу засталіся ў Магілёве. У намінацыі “Акардэон” перамагла Ульяна Астаньковіч, навучэнка Магілёўскай гімназіі-каледжа мастацтваў (выкладчыца Раіса Сінялобава), у намінацыі “Баян” — Канстанцін Масяёнак, навучэнец дзіцячай школы мастацтваў № 3 імя М. М. Салдатава (выкладчык Канстанцін Забелаў). Іншыя ўдзельнікі ўдастоены ганаровых званняў лаўрэатаў і дыпламантаў, усім уручаны памятныя пернікі з сімволікай конкурсу. Члены журы адзначылі высокі ўзровень як арганізацыі конкурсу, так і выканальніцкага майстэрства ўдзельнікаў. Усіх кранула цёплая атмасфера, якая панавала на конкурсе, хоць і не без духу суперніцтва сярод канкурсантаў, не без дэбатаў у шэрагах журы. “Узровень арганізацыі першага для гімназіі-каледжа конкурсу вельмі высокі, — лічыць Сподрыс Качанс. — І гэта — сведчанне прафесійнасці ўсяго педкалектыву”. Ганаровы госць з Латвіі ўпэўнены, што ў конкурса ёсць вельмі добрая будучыня, што ён адкрые новыя таленты, а геаграфія ўдзельнікаў будзе пашырацца.

Два дні наша гімназія-каледж мастацтваў жыла ў напружаным рытме конкурсу, які стаў не проста спарборніцтвам яркіх талентаў, але й вялікім святам музыкі, якое, спадзяюся, будзе мець працяг.

Наталля Курыла, намесніца дырэктара Магілёўскай гімназіі-каледжа па выхаваўчай рабоце

Выбар рэдакцыі

Грамадства

​Моладзь пры ўладкаванні на працу жадае заробак у тысячу рублёў

​Моладзь пры ўладкаванні на працу жадае заробак у тысячу рублёў

Хоць толькі збіраюцца выйсці на рынак працы.

Калейдаскоп

Чым Адэса прываблівае турыстаў

Чым Адэса прываблівае турыстаў

Гэта — недарагі адносна іншых курортаў адпачынак.

Грамадства

Як апынуцца ў раннім Сярэднявеччы?

Як апынуцца ў раннім Сярэднявеччы?

Ці сапраўды ў акваторыі сучаснага горада можна ўбачыць і нават праплыць на парусніку вікінгаў?

Грамадства

На Пастаўшчыне адбыўся інклюзіўны фестываль

На Пастаўшчыне адбыўся інклюзіўны фестываль

Для дзяцей з абмежаванымі магчымасцямі «Асаблівыя, як усе».