Вы тут

Як становяцца вясельным рэгістратарам


У 22 гады Валерыя Крапасная не толькі шчаслівая сама, але і дорыць гэта пачуццё шматлікім парам нашай краіны. Яна — вясельны рэгістратар. Аб тым, як зрабіць уступленне ў шлюб яркім і запамінальным, наша суразмоўніца расказала ў інтэрв'ю.


— Здзіўлюся, калі скажаце, што стаць вясельным рэгістратарам было марай...

— Такое жаданне з'явілася толькі ў 20 гадоў. У гэтым узросце я выходзіла замуж, і падчас планавання і арганізацыі ўрачыстасці мне былі цікавыя ўсе тонкасці справы: як упрыгожваць залу, якія вобразы будуць выглядаць больш удала, якая музыка спадабаецца гасцям. У галаве ўзнікла думка аб тым, што хачу вывучыцца на вясельнага рэгістратара. Трэба сказаць, што гэтая сфера дзейнасці толькі набірае папулярнасць у нашай краіне, і людзей, якія прафесійна навучаюць майстэрству правядзення цырымоніі, няшмат. Тады я запісалася на курсы да дзяўчыны, якая праводзіла маё ўласнае вяселле. За кароткі прамежак часу мы паспелі многае: пісалі сцэнарыі, рабілі пастаноўкі, разыгрывалі розныя сітуацыі, якія могуць узнікнуць падчас цырымоніі. Нават былі гледачы, якія нас ацэньвалі!

— Вы скончылі факультэт міжнародных адносін БДУ па спецыяльнасці «Сусветная эканоміка». Чаму такі выбар? Ён не вельмі стасуецца з творчым заняткам, які ёсць у вас цяпер.

— Заўсёды была ўпэўнена: мая работа будзе падобнай на тую, якой займаюцца бацькі. Збольшага гэта апраўдалася: тата працуе ў сферы грузаперавозак, а я — транспартны экспедытар. Нечакана, праўда? Рада, што магу сумяшчаць дзве работы. Са студэнцкіх гадоў прывыкла: шмат руху і працавітасці — шмат перамог.

— Чым выязныя вясельныя цырымоніі адрозніваюцца ад рэгістрацый шлюбаў, якія праводзяцца ў загсе?

— Перш, чым праводзіць выязную рэгістрацыю, трэба ўзаконіць свае стасункі ў апошнім. Вясельныя цырымоніі ладзяцца для таго, каб зрабіць свята арыгінальным, а важныя моманты — запамінальнымі. На маю думку, рэгістрацыя шлюбу — самая важная частка вяселля, бо ад таго, які тон задасць рэгістратар, як сябе будуць адчуваць маладыя, залежыць агульны «настрой» свята. Пары, якія звяртаюцца да мяне, загадзя тлумачаць, што яны хацелі б бачыць у маёй прамове, дзеляцца сваёй гісторыяй кахання. Некаторыя хочуць, каб было максімальна кранальна, каб усе плакалі, а хтосьці, каб былі жарты і смех. Я заўсёды адпраўляю загадзя напісаны мною сцэнарый маладым. Аднак некаторыя пары, наадварот, просяць гэтага не рабіць, каб у дзень цырымоніі захоўвалася інтрыга.

— Ці ёсць партрэт ідэальнага вясельнага рэгістратара?

— Гэта прафесія прадугледжвае пастаяннае ўзаемадзеянне з дэкаратарамі, арганізатарамі, стылістамі або гасцямі. Таму важна быць адкрытым і ўпэўненым у сабе. Вядома, без любові да сваёй справы працаваць немагчыма. Бывае, прыязджаеш на месца правядзення цырымоніі, а там мэбля не так расстаўлена або элементы дэкору не таго колеру. Трэба ўмець хутка арыентавацца і выпраўляць хібы. Таксама важнае пачуццё стылю — гэта тое, што вызначае добрага вясельнага рэгістратара. Пад кожную цырымонію заўсёды падбіраю індывідуальны вобраз, які загадзя паказваю маладым. У асноўным яны давяраюць мне на сто працэнтаў, бо бачаць у маім профілі Іnstаgrаm, як я выглядаю і што апранаю. Некаторыя нявесты дрэнна ставяцца да таго, калі я хачу надзець белую сукенку — просяць гэтага не рабіць.

— Вы самі плануеце графік правядзення вясельных рэгістрацый?

— Занятак добры тым, што яму можна прысвячаць колькі заўгодна часу. Радуе, што папулярнасць выязных вясельных цырымоній у Беларусі з кожным годам павялічваецца. Дарэчы, акрамя дзённых рэгістрацый ёсць вячэрнія. Многія не ведаюць, у чым розніца. Растлумачу: днём я гавару прамову, маладыя даюць клятву, а пасля адбываецца абмен пярсцёнкамі. Увечары ж з'яўляецца больш свабоды: можна праводзіць традыцыйныя абрады, пускаць феерверкі, рабіць атмасферныя фатаграфіі.

— Ваша праца заключаецца толькі ў тым, каб напісаць класны сцэнарый?

— Не зусім так. Пасля знаёмства мы разам з маладымі сустракаемся некалькі разоў, каб абмеркаваць важныя дэталі ўрачыстасці. Па жаданні пары робім папярэднюю рэпетыцыю цырымоніі. Я з задавальненнем праводжу выязныя рэгістрацыі на некалькіх мовах: рускай або беларускай і англійскай. Калі ж папросяць «ненадоўга» загаварыць на турэцкай ці іспанскай — адмоўлюся. Не люблю быць няўпэўненай у сваім прафесіяналізме. Я заўсёды за тое, каб рэгістрацыі праводзіліся ў незвычайных месцах. Напрыклад, нядаўна такім стала футбольнае поле «Барысаў-Арэна».

— Ці часта падчас цырымоній з'яўляюцца непрадбачаныя праблемы? Як іх вырашаеце?

— Часам дыджэй уключае не тую музыку ці не ў той момант. Калі на ўрачыстасці прысутнічаюць маленькія дзеці, іх паводзіны непрадказальныя. Можна колькі заўгодна рэпеціраваць з імі вынас пярсцёнкаў маладым — у іх свае думкі і дзеянні на гэты конт: могуць пайсці ў іншы бок або стаць побач з парай, пазіраваць і ўсміхацца. Таксама галоўны вораг ці добры саюзнік на выязной цырымоніі — гэта надвор'е. З маладымі мы заўсёды плануем «запасное» месца, куды можна хутка перамясціцца. Быў выпадак, калі праводзіла цырымонію пад ліўнем. Для людзей, якія працуюць з тэхнікай, гэта цяжка. Але ўсё прайшло добра.

Некалькі разоў я была на вясельных цырымоніях з высокай тэмпературай, але зрабіла ўсё, каб ніхто гэтага не заўважыў. Адзіная ўмова, па якой усё можа не скласціся, — калі садзіцца голас.

Цікава, што самыя адказныя пары пачынаюць браніраваць дату за год. За ўвесь час, колькі я працую, у мяне ні разу не адмянялі бронь.

Дарэчы, сярод знаёмых і родных яшчэ ніхто не прасіў мяне правесці ім вясельную цырымонію, і, шчыра кажучы, я доўга сумнявалася б, ці пагаджацца. Справа ў тым, што я вельмі эмацыянальная і без слёз вымавіць прамову наўрад ці змагла б.

— Ад вас зыходзіць магутная прыемная энергетыка! У гэтым дапамагае любімая работа?

— Калі ў тваім асяроддзі шчаслівыя людзі, сам становішся такі. Ніколі не пакутавала ад дакучлівых думак аб прызначэнні ў жыцці або чымсьці іншым — проста рухалася да сваіх мэт. Працавала на цікавых работах, шмат падарожнічала, будавала гарманічныя адносіны. Кожны так можа, было б жаданне!

Дар'я ШЛАПАКОВА, студэнтка ІV курса факультэта журналістыкі БДУ

Загаловак у газеце: Распарадчык... шчасця

Выбар рэдакцыі

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.

Калейдаскоп

Вясёлыя гісторыі чытачоў

Вясёлыя гісторыі чытачоў

Класiкаў трэба ведаць…, Быў бы араты, будзе й прыганяты, Па малiну…

Эканоміка

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

У бiзнес-колах Гродзеншчыны лiчаць, што меры па падтрымцы эканомiкi з'явiлiся своечасова.