Навіны сталіцы

Гарадскі кірмаш вакансій «Знойдзем работу разам» пройдзе ў культурна-спартыўным цэнтры Мінскага аддзялення Беларускай чыгункі 25 красавіка, паведамілі БелТА ў камітэце па працы, занятасці і сацыяльнай абароне Мінгарвыканкама.

На працягу трох гадзін — з 10.00 да 13.00 — грамадзяне, якія знаходзяцца ў пошуку работы, змогуць даведацца аб наяўнасці вакансій, умовах працы і аплаце, пракансультавацца па пытаннях занятасці, перанавучання, атрымання субсідый на арганізацыю ўласнай справы. У мерапрыемстве прымуць удзел больш за 100 арганізацый горада розных сфер дзейнасці (прамысловасць, будаўніцтва, транспарт, гандаль і грамадскае харчаванне, ахова здароўя і іншыя). Наведвальнікам прапануюць інфармацыйныя матэрыялы аб паслугах, якія аказваюцца органамі дзяржаўнай службы занятасці насельніцтва, буклеты з рэкамендацыямі па пошуку работы і складанні рэзюмэ, спецыялізаваныя друкаваныя выданні з актуальнымі вакансіямі. Прадугледжана работа сямі секцый: «Пачнем бізнес разам», «Стратэгія выбару прафесіі», «Старт у працоўнае жыццё», «Занятасць без межаў», «Навучанне з гарантаваным працаўладкаваннем», «Формула паспяховай кар'еры», «Вакансіі сёння і цяпер». Па выніках кірмашу пройдзе круглы стол, прысвечаны тэндэнцыям на рынку працы сталіцы, арганізацыі часовай працоўнай занятасці моладзі, якая навучаецца, пытаннях выканання наймальнікамі патрабаванняў заканадаўства аб занятасці.

Тры гасцініцы плануецца ўвесці ў эксплуатацыю сёлета ў Мінску. Іх меркавалася здаць яшчэ ў мінулым годзе, паведаміла агенцтва «Мінск-Навіны». Гэта гатэль у складзе шматфункцыянальнага комплексу каля кінатэатра «Перамога», гасцініцы на вуліцы Зыбіцкай і на скрыжаванні праспекта Пераможцаў і МКАД. У Мінску зараз створана адпаведная сучасная інфраструктура, якая дазваляе забяспечыць правядзенне буйных мерапрыемстваў міжнароднага ўзроўню: налічваецца 72 калектыўныя сродкі размяшчэння, якія ўключаюць 51 гасцініцу і гасцінічныя комплексы, 15 аналагічных сродкаў размяшчэння (хостэлы, інтэрнаты і пакоі для прыезджых, гатэльныя нумары, гасціны дом), шэсць спецыялізаваных сродкаў размяшчэння (студэнцкія санаторыі, прафілакторыі, турыстычныя базы).