Навіны сталіцы

04.04.2019 00:25
Грамадства

Каля 1 мільёна кв. метраў пакрыццяў на вулічна-дарожнай сетцы плануецца адрамантаваць сёлета ў Мінску, паведаміў галоўны інжынер прадпрыемства «Гаррамаўтадар Мінгарвыканкама» Яраслаў Паўлоўскі ў прэс-цэнтры БелТА. Усяго на абслугоўванні прадпрыемства знаходзіцца каля 24 млн кв. метраў пакрыццяў вуліц. «Па выніках 2018 года, выкананы бягучы рамонт больш чым на 1 мільёне квадратных метраў. Такія ж планы захоўваюцца на гэты год. Ямачны рамонт ужо завершаны прыкладна на 50 тысячах квадратных метраў. Работы вядуцца ў кругласутачным рэжыме, задзейнічана больш за 20 брыгад», — адзначыў Яраслаў Паўлоўскі. Ліквідаваць ямачнасць дарожнікі павінны да 1 мая. Па словах Яраслава Паўлоўскага, гарантыйны тэрмін на асфальтабетоннае пакрыццё складае 5—7 гадоў. У апошнія гады ў горадзе сталі актыўна ўжываць пакрыцці падвышанай дэфармацыйнай устойлівасці, ахоўныя пласты. Галоўны інжынер «Гаррамаўтадара» адзначыў, што інтэнсіўнасць руху ў сталіцы вырасла ў разы. Напрыклад, праектная нагрузка на Мінскую кальцавую аўтадарогу складае 20 тысяч аўтамабіляў у суткі, а па факце сёння па ёй штодня праязджаюць 70—80 тысяч машын.

Сельгаспрадпрыемствы і арганізацыі Мінска актыўна праводзяць сяўбу ранніх яравых збожжавых і зернебабовых культур. Пра гэта агенцтву «Мінск-Навіны» паведамілі ў галоўным упраўленні спажывецкага рынку Мінгарвыканкама. Работы пачаліся ўжо ў 19 з 27 гаспадарак. У гэтым годзе сталічныя аграрыі плануюць засеяць яравымі культурамі 32,9 тысячы гектараў, у тым ліку 17,4 тысячы гектараў зоймуць збожжавыя і зернебабовыя, 14,3 тысячы гектараў — кукуруза, 524 га — бульба і агародніна, больш 680 га — тэхнічныя, кармавыя і іншыя культуры.