Вы тут

Аюрведа з водарам хвоі


Ці магчымая наогул гэтая старажытная сістэма аздараўлення ў Беларусі? А чаму б і не, падумалі мы. Бо тройчы пабывалі ў Індыі, у паўднёвым штаце Керала, і на сабе выпрабавалі дабратворны ўплыў методык, аздараўленчых і ачышчальных працэдур, якія прапануе Аюрведа.


Гокул Крышнан, Рэшма Сабу і Адарш Мохандас — у Беларусі ўпершыню

Каб паглядзець, як жыве Центр Аюрведы — першы ў Беларусі, які адкрыўся ў ліпені 2018 года — паехалі ў сасновы бор на бераг Мінскага вадасховішча. Якраз там тэрыторыя санаторыя «Пралеска». Безумоўна, гэта не бераг Ціхага акіяну з яго Аравійскім морам, не тое вільготнае цяпло, якое ахутае ўсяго цябе, калі на пачатку чэрвеня, у сезон дажджоў, выйдзеш з самалёта ў аэрапорце Кочын і ступіш на зямлю паўднёвага штату Індыі — Керала.

Затое ў нас, перамовіліся мы па дарозе, ёсць хвойны водар у сасновым бары, насычаным кіслародам. Тым водарам не проста дыхаеш, а здаецца — п’еш. Такі ён моцны, ацаляльны. Той водар мы адразу адчулі, калі на ўезде на тэрыторыю санаторыя адкрылі шкло аўтамабіля і запыталі ў дзяжурнага, дзе ж Центр месціцца…

Індыя ў нашых сэрцах

Пра Аюрведу, навуку жыцця, якой больш за пяць тысяч гадоў, чулі мы даўно. І захапляліся ёю яшчэ ў маладым узросце. У хатняй бібліятэцы зберагаюцца і кнігі, у якіх — веды пра ўсталяванне гармоніі і раўнавагі ў целе, розуме і свядомасці, шмат рэкамендацый для тых, хто спавядае здаровы лад жыцця.

Але перш чым пазнаёміць чытача з Цэнтрам, з дапамогай нашых мінулых уражанняў ажыццявім невялічкае віртуальнае падарожжа ў Індыю, якую мы для сябе адкрылі і палюбілі, крыху раскажам пра сваё першае з ёй знаёмства. Больш падрабязна пра тое чытайце на старонках часопіса (№ 12–2016 і № 7–2018).

Гэтая краіна і дагэтуль жыве ў нашых сэрцах. Яе забыць немагчыма: ёсць нешта няўлоўнае, містычнае, калі думаеш пра штат Керала, тую невялікую геаграфічную частку Індыі, дзе мы пабывалі. Пра нашае апошняе аздараўленне ў Мейеведзе нагадвае невялічкае дрэўца кары. Мы яго адтуль прывезлі разам з адным лістком другой расліны, назвы якой не ведаем. Яна таксама, як і кары, прыжылася ў нас на падваконні. Вось такая прыемная сувязь з Індыяй атрымалася. А лісцікі кары можна ўжываць у ежу. Пра гэта нам сказаў наш добры знаёмы, кіраўнік адной мінскай турыстычнай фірмы, якая ладзіць туды вандроўкі. Дарэчы, Уладзімір Клюйкоў сам з жонкай Наталляй адпачываў у Мейеведзе тады, калі і мы там былі з нашым сябрам. Адна наша знаёмая, якая яшчэ раней нас захварэла Індыяй і Аюрведай, сказала аднойчы: Індыя — гэта дыягназ. Таксама ж індыйцаў розных веравызнанняў, з якімі давялося пасябраваць, забыць немагчыма. Тыя нітачкі праз тысячы кіламетраў імгненна нас з імі ў свядомасці звязваюць: варта толькі прыгадаць твары, імёны, прыветныя словы нашых індыйскіх сяброў. Гэта дактары Шрыкала Санташ і Шахіна, Ніша й Мэлдзі, шэф-кухары Джошы Себасцьян і Айнуп, терапісты Маліка, Ахіла, Шыджа, Шайнэ, Рагунат і Мэрдак, менеджары Джон і Рамэш, вадзіцель Прадзіп, настаўнікі ёгі Прасад і Санташ…

З некаторымі мы і цяпер падтрымліваем зносіны праз перапіску. Кожнай раніцай, напрыклад, прыходзіць па WatsApp прывітанне ад Джона з Трывандрума. Цяпер ён працуе ў Каваламе. Дарэчы, запрашаў прыехаць туды адпачыць і скарыстацца магчымасцю аздаравіцца. Гэты зусім побач са сталіцай Керала, дзе жыве ягоная сям’я. З Джонам мы пасябравалі ў 2017‑м, калі былі ў другі раз у Натыка-біч рэсорце, тады й Джон працаваў там. А калі летась аздараўліваліся ў Мейеведа-рэсорце і хацелі ў Натыку з’ездзіць, то Джон ужо з’ехаў у Трывандрум, каб быць, як потым нам напісаў, бліжэй да сям’і. Якраз у 2017‑м у яго нарадзілася дачушка. І Кавалам, казаў, таксама, славіцца сваімі аюрведычнымі традыцыямі. Туды едуць і тыя, хто спыняецца на адпачынак у Трывандруме. А прывітанні ў Джона заўсёды цёплыя, адухоўленыя глыбокім сэнсам. Вось і сёння прыйшло чарговае. Спадзяюся, Джону будзе прыемна, калі я перакладу яго для нашых чытачоў у Беларусі:

«Жыццё цудоўнае адзін дзень, адну гадзіну і адну хвіліну. І яны ніколі не паўторацца ў далейшым тваім жыцці. Таму пазбягай агрэсіі, злосці. З усімі, хто табе сустрэнецца, размаўляй з любоўю». Альбо ўчора: «Нечаканыя падзеі і праблемы — частка жыцця. Ні пры якіх умовах не губляй надзеі, таму што цемра ночы заўсёды заканчваецца святлом дня». Якраз пад ранішнюю каву з гэтага пазітыву ад Джона мы часта пачынаем наш дзень. Так было і перад невялічкай камандзіроўкай у Цэнтр SHANTER Wellness.

І вось мы ў санаторыі «Пралеска». Падымаемся на другі паверх аднаго з будынкаў. Нас там сустракае кіраўнік Цэнтра «Аюрведа» Таццяна Насачэўская. Паказвае пакоі, дзе наведнікі прымаюць працэдуры, расказвае пра тое, што на сайце Цэнтра ёсць цікавая інфармацыя пра яго. З намі яна тым і падзялілася.

«SHANTERWellness» створаны, каб прапанаваць сучасную камбінацыю лепшых складнікаў з вобласці навукі і тэхналогій з Аюрведай, ёгай, медытацыяй і сістэмай харчавання для правільнай арганізацыі клеткавага сілкавання. Наша мэта, гаворыць суразмоўніца, паспрыяць людзям пабудаваць устойлівае здароўе на клеткавым узроўні шляхам комплекснага падыходу.

Гучыць, безумоўна, уражліва. І далей Таццяна рассказала пра тое, што беларуская кампанія «ШАНТЭР» аб’яднала намаганні з Wellness Solutions Pvt, Ltd з Індыі, каб прыўнесці лепшае, што створана навукай і прыродай у жыццё беларусаў і гасцей нашай краіны.

На сайце Цэнтра можна даведацца пра кампанію Wellness Solutions:

Кіраўнік Цэнтра Аюрведы Таццяна Насачэўская

Яна створана ў Індыі ў 2002 годзе і ўключае ў сябе Wellness медыцынскія паслугі, Wellness адукацыю, Wellness прадукцыю для здароўя, Wellness кафэ і рэстараны, Wellness праграмы для навучэнцаў і для работнікаў, Wellness курорты, а таксама прымае ўдзел у сістэме аховы здароўя ў цэлым. Кампанія мае шэраг філіялаў у Індыі і за мяжой, кліенцкая база налічвае больш за 250 тысяч чалавек. Генеральны дырэктар Welness Solutions Pvt, Ltd — доктар Шры Кумар Аппукуттан Наір: Прэзідэнт Індыйскай Асацыяцыі дыетолагаў, старэйшы лекар-кансультант у галіне ЛОР хірургіі, а таксама хірургіі галавы і шыйных аддзелаў з больш чым 36‑гадовым стажам клінічнай практыкі. Доктар апошнія 15 гадоў актыўна практыкуе нутрытыўную і клеткавую медыцыну, ён пажыццёвы член Індыйскай Медыцынскай Асацыяцыі, Асацыяцыі оталарынголагаў Індыі, Індыйскага Таварыства Чырвонага Крыжа і многіх іншых, валодае міжнароднымі ўзнагародамі і прэміямі ў галіне медыцыны.

Першапарходцы

У Цэнтры працуюць сертыфікаваныя спецыялісты па Аюрведзе з індыйскага рэгіёна Керала, які, мы ўжо казалі, лічыцца сэрцам Аюрведы. Цяпер пад Мінскам іх называ­юць касмецікамі, а ў Керала — тэрапістамі. З імі заключаны гадавыя кантракты. Таццяна запрашае трох касмецікаў, якія выконваюць усе аздараўленчыя рытуалы ды працэдуры. А чацвёртая, гаворыць, паехала ў Мінск, каб упершыню самастойна пазнаёміцца з горадам. І хоць Цэнтр адкрыўся яшчэ летам, аднак касмецікі і сам доктар Джувін Кенэдзі яшчэ па сталічных вуліцах самастойна не гулялі.

Знаёмімся. Індыйцы стрымана ўсміхаюцца, а калі даведваюцца пра тое, што мы ў Керала бывалі не аднойчы, чулі там мову малаялам, на якой і яны гавораць, пачына­юць глядзець на нас як на добрых знаёмых. І зусім радуюцца, калі з нашых вуснаў зрываецца слова «нанні» (з націскам на апошні склад). На дравідскай мове малаялам яно азначае — дзякуй. Мы прывезлі яго з іх радзімы. У штаце Керала многія гавораць на малаялам. У мовы вельмі мяккае гучанне. А Таццяна таксама радуецца: жывуць індыйцы тут адасоблена, рускай і беларускай мовы не ведаюць, зносяцца толькі адзін з адным на малаялам, а з іншымі на англійскай, таму ім надзвычай прыемна сустрэць тых, хто бываў у Керала.

— Яны цудоўныя! — гаворыць Таццяна. — Такія ўс­меш­лівыя, адкрытыя, а Рэшма наогул — цуд.

Прадставім і вам, шаноўныя чытачы гэтых абаяльных касмецікаў.

Рэшма Сабу — спецыяліст тэрапіі Аюрведы. Яна — прафесіянал. Мае пяць гадоў клінічнага досведу ў галіне Панчакармы. Гэта комплекс ачышчальных працэдур, які мы на сабе выпрабавалі, калі былі ў Індыі. Рэшма вывучылася пры шпіталі Sreedhariyam Ayurveda Hospital, Kerala. Тут яна праводзіць рытуал Нетратарпанам, гэта значыць — амалажэнне вачэй.

У Шрыкалы Шрыкумары, якая да таго ж яшчэ і добра валодае ёгай, пяцігадовы стаж працы ў Індыі і па-за яе межамі ў галіне Аюрведы і Панчакармы. Яна таксама, як і яе калегі, выйграла конкурс, каб прыехаць у Беларусь і мець магчымасць тут працаваць.

Адарш Мохандас — з сям’і, якая прытрымліваецца Аюрведы, таму з дзяцінства добра ведае, што гэта такое. Адукацыю атрымаў на прафесійных курсах пры Міністэрстве развіцця кадравага патэнцыялу Індыіі. Працаваў у кампаніі Wellness Solutions. Цяпер ён у камандзе SHANTER Wellness, дзеліцца сваім васьмігадовым клінічным досведам.

Гокул Крышнан таксама нара­дзіў­ся ў Керала, атрымаў дыплом у галіне Аюрведы і Панчакармы ў каледжы Ashramam Training College Idukki.

Пра галоўнае ў сэрвісе

— Таццяна, як пра ваш Цэнтр пачынаюць ве­даць людзі?

— Сюды ў асноўным тыя прыходзяць, хто ведае Аюрведу, хто яе шукае. А знаходзяць, як і вы, праз наш сайт. Яшчэ мы размяшчаем інфармацыю ў інстаграм і фэйсбуку. Працуе і так званае «сарафаннае» радыё. Сёння з’явілася жанчына, якая пачула добры водгук пра аздараўляльны эфект ад працэдур ад сваёй знаёмай, таму вырашала і сама прыйсці.

— Ці многа людзей у вас пабывала?

— Пакуль не так многа. Мы ж адкрыліся зусім нядаўна. Але імкнемся сябе папулярызаваць. Наш доктар нават удзельнічай у перадачы на тэлеканале АНТ, ёсць ужо і артыкулы пра нас.

— А вы самі ведалі пра Аюрведу да таго, як узначалілі Цэнтр?

— Да таго, як пачала тут працаваць — не ведала. Цяпер я ў захапленні ад гэтай навукі, як быць здаровым. І ў гэтых людзей, індыйцаў, проста ўлюбілася. Яны такія добразычлівыя, шчырыя. Аднойчы да нас прыйшла бабуля. І я ўбачыла, як Рэшма ўзяла яе пад ручку і кажа: «hello, mam!», а потым асцярожна павяла ў пакой для працэдур. Мяне так узрушыла сардэчнасць і добразычлівасць Рэшмы. Вось гэта, падумала я тады, і ёсць сэрца, сутнасць сапраўднага сэрвісу без выбудаваных алгарытмаў. Гэта, на мой погляд, галоўнае ў ім. У мяне сярэдняя медыцынская адукацыя, ёсць і значны досвед працы ў медыцыне. А яшчэ маю вышэйшую адукацыю ў галіне маркетынга. Вось цяпер набытыя веды спрабую прымяніць і тут. Дарэчы і сама планую займацца ёгай, таксама выпрабаваць на сабе працэдуры, якія мы прапануем нашым гасцям.

— Наколькі тое, што вы прапануеце, адпавядае аутэнтычнай Аюрведзе?

— Мы імкнемся. Нездарма ж тут працуюць сапраўдныя спецыялісты па Аюрведзе. Яны праводзяць усе тыя працэдуры ды рытуалы, што ёсць у Керальскіх аюрведычных центрах. Напрыклад, нашы касмецікі працуюць на тых жа маслах. Перад пачаткам рытуалу здзяйсняюць малітву. Нашы касмецікі — індусы, пакланяюцца богу Шыве. Наогул усе працэдуры ў Цэнтры аўтэнтычныя. Ёсць у нас і паравая лазня. Ну вы ж, пэўна, яе таксама наведвалі. І меню адпавядае тым патрабаванням Аюрведы, якія вызначыць доктар Джувін. Ён праводзіць персанальныя кансультацыі з пульсавай дыягностыкай, па якой вызначае тып канстытуцыі, рэкамендуе, як лепш харчавацца і аздараўлівацца.

Доктар Аюрведы Джувін упершыню сустрэўся з зімой

Пасля знаёмства і размовы з касмецікамі ды Таццянай накіроўваемся ў кабінет доктара Джувіна Кенэдзі. Зносімся з ім з дапамогай перакладчыцы Дар’і.

Доктар Аюрведы Джувін Кенэдзі ў момант пульсавай дыягностыкі

Доктар Аюрведы Джувін Кенэдзі, дарэчы ён і ёгу праводзіць у Цэнтры, паведамляе Таццяна, скончыў медыцынскі ўніверсітэт The Tamil Nadu Dr. M. G. R. Medical University, мае доктарскую ступень у галіне інтэгратыўнасці медыцыны. Ён, па словах Таццяны, актыўна практыкуе нутрытыўную ды экалагічную медыцыну ў Індыі, таксама за мяжой на працягу многіх гадоў. Спецыялізуецца на вывучэнні хранічных захворванняў, прызнаючы біяхімічную ўнікальнасць кожнага чалавека для складання індывідуальных планаў аздараўлення з выкарыстаннем дыеты і натуральных біялагічна актыўных дабавак разам з аптымізацыяй гарманальнага фону. За аснову аздараўлення доктар Джувін бярэ інтэгратыўны падыход да здароўя, збалансаванае рацыянальнае харчаванне, прафілактыку захворванняў і пераасэнсаванне прынцыпаў падыходу да здароўя ў цэлым. Ён улічвае ўсе фактары, якія ўплываюць на здароўе, самаадчуванне і хваробы. Сярод такіх фактараў вылучае розум, дух, цела, а таксама нашае асяроддзе. Доктару Джувіну падабаецца натхняць і навучаць іншых мастацтву і навуцы інтэграванага падыходу да здароўя, і ён лічыць, што лячэнне прычын і сімптомаў захворванняў можа дапамагчы людзям зноў здабыць радасць і сэнс у іх жыцці.

Доктар Джувін родам з поўначы Керала, з горада Канор, з сям’і католікаў. Бацька ягоны працуе ў банку, а мама — на пошце. Ёсць яшчэ і малодшы брат, яму 12 гадоў. Доктар таксама вельмі ажыўляецца, калі чуе, што мы аздараўліваліся ў Індыі. І нават бываў у тых месцах. Пра Беларусь раней ведаў, як пра краіну ў цэнтры Еўропы. А калі прыехаў у ліпені сюды, то быў уражаны тым, што Беларусь вельмі падобная на штат Керала, асабліва на тое месца, дзе ён нарадзіўся: шмат лясоў, азёраў, свежае паветра, наогул вельмі багатая прырода.

Нам чуць тое вельмі прыемна. Жартуем: толькі ў Керала крыху цяплей… І дружна смяёмся. Доктар кажа, што першы раз у жыцці пабачыў снег. І на сабе адчуў, што такое зіма. Гэтая пара года яму спадабалася. І ён лёгка перанёс нашу мяккую зіму. І беларусы спадабаліся. Яны, удакладняе, больш дружалюбныя. У Керала людзі надта сацыялізаваныя, аб’яднаныя рознымі веравызнаннямі. Ці сябруюць паміж сабой керальцы? З талерантнасцю, па словах доктара, ёсць праблемы, асабліва калі пытанне тычыцца рэлігіі ці палітыкі. Гаворыць, што хрысціяне ў Індыі больш міласэрныя, чым іншыя яе жыхары. Рознагалоссі, як правіла, адбываюцца ў мусульманаў з індусамі. І ён па-добраму радуецца, калі мы гаворым пра тое, што ў Беларусі цяпер жывуць прадстаўнікі больш чым 140 розных нацыянальнасцяў, прычым здаўна — у згодзе і міры.

Ёгай доктар займаецца больш дзесяці гадоў. Навучаўся ў майстра па ёзе, які ў сваю чаргу вучыўся ў першай школе ёгі ў Індыі — Кайвелетам. Гэта цяпер адзіны Інстытут ёгі, дзе выкладаюць ёгу аўтэнтычную. Ён — першы і адзіны, дзе пачаліся таксама навуковыя даследаванні ўплыву ёгі на чалавека. Ёсць яшчэ і другая школа ёгі — Біхар. Яна моцная філасофіяй ёгі. І там выкладае — Swami Kuvalyanandha. А імя настаўніка Джувіна — Prahlad Singh. Ёга, лічыць док­тар, вучыць кантраляваць свядомасць. Наш розум пастаянна зменьваецца. І ёга вучыць трымаць баланс, раўнавагу паміж гэтымі змяненнямі. На санскрыце ёга — юдж, што значыць аб’ядноўваць. Ёга пераследуе мэту: аб’яднаць цела і свядомасць. Філасофія ёгі дапамагае зразумець, хто мы такія. Іншыя філасофіі вучаць глядзець навокал, а ёга — унутр самога сябе.

Наша гутарка доўжыцца. Мы расказваем доктару пра тое, што ў беларускай мове і санскрыце ёсць многа падобных словаў. Гэта выклікае цікавасць у субяседніка. У працяг тэмы ён выказвае меркаванне: Аюрведа — гэта не толькі пра Індыю. Аюрведа была ўсюды. І на тэрыторыі Беларусі таксама. Гэта тыя веды, якія перадаваліся ад бацькі да сына і далей. Распытваем у доктара пра яго захапленні, пра што ў Беларусі хацеў бы даведацца. Беларусь, дарэчы, першая еўрапейская краіна, у якую ён прыехаў. Доктар Джувін цікавіцца гісторыяй. І таму хацеў бы больш ведаць пра перыяд Вялікай Айчыннай вайны ў Беларусі. Мы раім Таццяне дапамагчы доктару наведаць Дзяржаўны музей гісторыі Вялікай Айчыннай вайны, Дом-музей І з’езду РСДРП. Абяцаем цікавыя ўражанні. Яшчэ доктару блізкія ідэі камунізму. У іх, кажа, многа пазітыўнага. І наогул, ён бы хацеў пазнаёміцца з тым перыядам гісторыі, калі яны ўваходзілі ў жыццё беларусаў. Яшчэ хацеў бы пабы­ваць ва ўсіх замках Беларусі, у Нацыянальнай бібліятэцы, у Троіцкім прадмесці…

Потым доктор Джувін прапануе зрабіць нам пульсавую дыягностыку. Але гэта тэма настолькі цікавая, вартая асобнай увагі, таму мы не будзем пра тое пісаць. Пытаем у док­тара, ці заўважыў ён нейкія асаблівыя адхіленні ў здароўі, характэрныя для беларусаў. Ці ёсць заканамернасці ў дысбалансе дошаў? Доша — гэта тыпы энергій, якія ўласцівыя нам, людзям. У кагосьці больш агню — гэта піта. Паветра — гэта вата. А капха — вада і зямля. Для беларусаў, тлумачыць доктар, характэрная піта. Гэта значыць, у нас больш агню, эмоцый. Тое і імгненныя іх успышкі, якія хутка праходзяць. І гэта самы распаўсюджаны тып беларусаў. Але ёсць і людзі-капха.

Меркаванні доктара Джувіна зноў даюць падставу пажартаваць нам пра тое, што, так бы мовіць, у Беларусі холадна, не так горача як у Індыі, вось мы гэтым агнём і грэеемся. А ў Індыю, у цеплыню едзем па рэлакс, там свой агонь крыху прытушваем у сезон дажджоў. І абяцаем доктару, што яго агонь пасля вандровак па нашым цудоўным краі — павысіцца. Смяемся, гаворачы: гэта ж будуць эмоцыі! Доктар Джувін згодны.

Ну а тыя, каму цяжкавата ў Індыю дабрацца, могуць завітаць у Цэнтр «Аюрведа», які гасцінна прыме кожнага, хто хоча паправіць свае здароўе.

Валянціна і Іван Ждановічы

Выбар рэдакцыі

Грамадства

Беларусь і Расія зблізілі пазіцыі па праграме рэалізацыі дагавора аб Саюзнай дзяржаве

Беларусь і Расія зблізілі пазіцыі па праграме рэалізацыі дагавора аб Саюзнай дзяржаве

Аб гэтым заявіў старшыня Савета Рэспублікі Міхаіл Мясніковіч на сустрэчы са старшынёй Савета Федэрацыі Валянцінай Мацвіенка.

Грамадства

Як Брэст рыхтуецца да святкавання свайго 1000-годдзя

Як Брэст рыхтуецца да святкавання свайго 1000-годдзя

Афіцыйныя святкаванні і асноўныя мерапрыемствы гарадскога Міленіума пройдуць 6—8 верасня.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Пра ляльку з секс-шопа, галубоў на ігрушы і дзяўчынку, якая схавала пашпарты.