Вы тут

Дзяўчаты з вёсламі


Аляксандра Абраменка, Валерыя Шэндзель, Паліна Залатарова, Лізавета Каспяровіч — полацкія школьніцы. А яшчэ — удзельніцы і чэмпіёнкі юніёрскіх Міжнародных спаборніцтваў, першынстваў Беларусі, магчыма, і будучыя ўдзельніцы Еўрапейскіх і Алімпійскіх гульняў. Смелыя, загартаваныя, вынослівыя выхаванкі спецыялізаванай Дзяржаўнай вучэбна-спартыўнай установы «Віцебскі абласны цэнтр алімпійскага рэзерву па вяслярных відах спорту», якая знаходзіцца ў Полацку, кожны дзень наведваюць прыгожы сучасны, падобны на ветразь, будынак на беразе Дзвіны — вучэбна-трэніровачны комплекс Цэнтра алімпійскага рэзерву. Трэніруюцца ў спартыўных залах, аснашчаных сучаснымі трэнажорамі, «плаваюць» у штучным закрытым вяслярным басейне, а ў вясенне-летні сезон вяслуюць па шырокай ды імклівай Дзвіне — назапашваюць спартыўныя спрыт і досвед.


Цэнтр алімпійскага рэзерву ў Полацку выхоўвае будучых спартсменаў па акадэмічным веславанні, весляроў на каноэ і на байдарках. Тым самым працягвае летапіс Полацкай школы веславання, які пачаўся з 1973 года. У 2011 на базе старой школы ўзведзены шыкоўны комплекс, які ўключае ў сябе вучэбна-трэніровачныя залы, гасцініцу, кафэ. Цяпер у Цэнтры займаюцца 312 падлеткаў і юнакоў. Сярод іх — 77 дзяўчат. Апякуюцца над будучымі зоркамі трэнеры вышэйшай і першай трэнерскай катэгорыі, майстры спорту СССР і міжнароднага класа, заслужаныя трэнеры, пераможцы першынстваў Еўропы і свету.

Адным з такіх тытулаваных трэнераў Цэнтра з'яўляецца Міхаіл Камінскі, на занятках якога мне пашчасціла пабыць. У секцыі акадэмічнага веславання, якую вядзе Міхаіл Іванавіч, займаюцца 6 юнакоў і 10 дзяўчат. Штодня зранку, перад заняткамі ў агульнаадукацыйнай школе, яго выхаванцы «разаграюцца» на сілавых адмысловых трэнажорах, асвойваюць штучнае веславанне. Пасля школы — зноў трэніроўкі, але гэтым разам на адкрытым паветры і сапраўдных лодках.

Весляры настройваюць металічныя канструкцыі пад вёслы, зносяць свае персанальныя «адзіночкі», «двойкі» і «чацвёркі» да вады, каб працаваць да стомы, да мазалёў. Сёлета трэніровачны сезон на Дзвіне пачаўся ў першых чыслах сакавіка.

Анатоль КЛЯШЧУК

Фота аўтара

Выбар рэдакцыі

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.

Калейдаскоп

Вясёлыя гісторыі чытачоў

Вясёлыя гісторыі чытачоў

Класiкаў трэба ведаць…, Быў бы араты, будзе й прыганяты, Па малiну…

Эканоміка

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

У бiзнес-колах Гродзеншчыны лiчаць, што меры па падтрымцы эканомiкi з'явiлiся своечасова.