Вы тут

40 гадоў таму адбылася прэм'ера фільма «Месца сустрэчы змяніць нельга»


Лета 1945-га. Малады камандзір разведроты Шарапаў трапляе пасля фронту па размеркаванні ў Маскоўскі крымінальны вышук, у аддзел па барацьбе з бандытызмам. Якраз у гэты час у горадзе лютуе няўлоўная банда «Чорная кошка», пакідаючы за сабой след з нябожчыкаў і нераскрытых спраў... 40 гадоў таму адбылася прэм'ера шматсерыйнага фільма «Месца сустрэчы змяніць нельга», а праз 30 гадоў, у красавіку 2009-га, у Кіеве каля будынка МУС адкрылі помнік Жаглову і Шарапаву. У 2016-м помнік героям фільма паставілі таксама каля будынка ГУУС Масквы на Пятроўцы, 38.


Дэтэктыў паводле рамана братоў Вайнераў «Эра Міласэрнасці» стаў адной з найлепшых работ не толькі рэжысёра Станіслава Гаварухіна, але і ўсіх занятых акцёраў. Перагледзець фільм можна на наступным тыдні ў эфіры «Беларусь 3», а да таго — прыгадаць тое-сёе з гісторыі стварэння карціны.

На ролю капітана Жаглова прэтэндавалі Юрый Кузьмянкоў, Леанід Яноўскі, Яўген Сцяжко, але выбралі Высоцкага — практычна без проб. Хадзілі чуткі, што рэжысёр спецыяльна запрашаў на мастацкую раду заведама непрыдатных для вобраза акцёраў, каб падрыхтаваць глебу для прыняцця Высоцкага. І гэта быў стрэл у яблычак: Высоцкі не толькі бліскуча сыграў неадназначнага капітана міліцыі, але і прывёў у карціну многіх іншых акцёраў: Аляксандра Бяляўскага — Фокса, Віктара Паўлава — Леўчанку, Івана Бортніка — «Прамакашку». Гэта ён прыдумаў картавы каларыт дробнаму зладзюжку «Кірпічу» — Садальскаму, фатаграфію Вары як падказку для Шарапава, ён зняў сцэну допыту Фокса, сцэны з Груздзевым і нават пэўны час падмяняў Гаварухіна ў якасці рэжысёра, калі той вымушаны быў паехаць на фестываль з папярэднім сваім фільмам... А вось спяваць Высоцкаму ў гэтай карціне не далі. Але менавіта яго за ролю Жаглова адзначылі дзвюма ўзнагародамі: прызам журы Усесаюзнага кінафестывалю ў 1981-м і Дзяржпрэміяй СССР у 1987-м (пасмяротна).

Доўга шукалі і акцёра, які ўвасобіць палкага ідэаліста Шарапава, — перабралі амаль паўтара дзясятка кандыдатур, у тым ліку вельмі вядомых — Аляксандра Абдулава, Станіслава Садальскага, Сяргея Ніканенкі, — але тэлевізійнае кіраўніцтва настойвала: толькі Уладзімір Конкін. І хоць самі сцэнарысты не атаясамлівалі маладога інтэлігентнага акцёра з разведчыкам, які 42 разы хадзіў праз лінію фронту, зацвердзілі менавіта яго — вельмі ўжо быў падобны да «камсамольца, партрэт якога ў газетах друкуюць».

Насуперак дамоўленасці паміж Дзяржтэлерадыё СССР і Адэскай кінастудыяй фільм атрымаўся не сямі-, а пяцісерыйным — дзве серыі скарацілі ў працэсе цэнзуравання і перамантажу. Усе выразаныя кадры, каля дзвюх гадзін, рэжысёр аддаў на Адэскую кінастудыю, дзе яны і згубіліся.

  • А вы ведалі, што?..
  • У сцэне ў більярднай шары ў лузу за Высоцкага і Кураўлёва заганяў майстар — адзін з найлепшых більярдыстаў Адэсы Уладзімір Іваноў, паколькі абодва акцёры зусім не ўмелі «катаць шары».
  • Падчас здымак у Адэсе Высоцкі працягваў іграць у тэатры ў Маскве — яго везлі на міліцэйскай «Волзе» з аэрапорта, а грымёр па дарозе пераўтварала Жаглова ў Гамлета.
  • Падчас здымак пагоні за Фоксам ледзь не загінулі каскадзёры: машына перакулілася і ўпала не проста ў раку Яўзу, а пагрузілася ў метровы глей...
  • Фінальную сцэну, дзе Вара застаецца жывой і бярэ з дзетдома падкідыша, даздымалі ў апошні момант, каб «перапісаць» трагічны фінал.

Выбар рэдакцыі

Грамадства

Беларусь і Расія зблізілі пазіцыі па праграме рэалізацыі дагавора аб Саюзнай дзяржаве

Беларусь і Расія зблізілі пазіцыі па праграме рэалізацыі дагавора аб Саюзнай дзяржаве

Аб гэтым заявіў старшыня Савета Рэспублікі Міхаіл Мясніковіч на сустрэчы са старшынёй Савета Федэрацыі Валянцінай Мацвіенка.

Грамадства

Як Брэст рыхтуецца да святкавання свайго 1000-годдзя

Як Брэст рыхтуецца да святкавання свайго 1000-годдзя

Афіцыйныя святкаванні і асноўныя мерапрыемствы гарадскога Міленіума пройдуць 6—8 верасня.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Пра ляльку з секс-шопа, галубоў на ігрушы і дзяўчынку, якая схавала пашпарты.