«Праблемныя пытанні ў падрыхтоўцы да Еўрагульняў адсутнічаюць»

Аб гэтым заявіў прэм'ер-міністр Сяргей Румас па выніках пасяджэння Выканкама НАК.

Ён адзначыў, што кіраўнік дзяржавы падчас пасяджэння падрабязна спыніўся на гатоўнасці кожнага з 15 спартыўных аб'ектаў, якія прымуць Еўрапейскія гульні. Абмеркавалі пытанні харчавання, удзелу валанцёраў, размяшчэння афіцыйных асоб, спартсменаў - гэта значыць, усе аспекты, выкананне якія дазволіць правесці маштабнае мерапрыемства на высокім узроўні.

Якія рашэнні былі прынятыя? Паводле слоў прэм'ер-міністра, усе пытанні і праблемы абмяркоўваюцца на сустрэчах арганізацыйнага камітэта, які збіраецца практычна штотыдзень. «На ўзроўні кіраўніка дзяржавы ніякіх рашэнняў прымаць не трэба, усё вырашаецца на аргкамітэце», - падкрэсліў Сяргей Румас.

Ён таксама звярнуў увагу, што ёсць яшчэ літаральна тры аб'екты, дзе трэба завяршыць апошнія рамонтныя моманты. «95 % абсталявання ўжо ўстаноўлена, вось гэтыя 5 % пастаўляюцца па графіку, але на 15 мая поўная гатоўнасць усіх аб'ектаў будзе забяспечана», - сказаў прэм'ер-міністр.

Ці ёсць нейкія праблемныя пытанні ў падрыхтоўцы? «Праблемныя пытанні ў падрыхтоўцы да Еўрагульняў адсутнічаюць», - падкрэсліў ён.

У ходзе буйных спартыўных мерапрыемстваў часта рэзка падскоквае кошт пражывання ў гасцініцах, таксама цэны падымаюць і людзі, якія здаюць кватэры ў арэнду. Як з гэтым змагаюцца? Сяргей Румас пацвердзіў, што такая сітуацыя існуе і ў прыклад прывёў фінал Лігі Чэмпіёнаў па футболе ў Кіеве - тады, нягледзячы на ​​якасную падрыхтоўку самога мерапрыемства, высокія цэны на жыллё сталі лыжкай дзёгцю.

«У Мінску нічога падобнага адбывацца не будзе. Сёння Дырэкцыя па правядзенні Еўрагульняў падпісала пагадненне з усімі буйнымі гатэлямі, якія будуць прымаць гасцей. І ў гэтых пагадненнях выразна зафіксавана, што цэны на перыяд гэтага маштабнага спартыўнага спаборніцтва падымацца не будуць. Натуральна, улада будзе адсочваць выкананне гэтага пагаднення ўсімі яго падпісантамі», - падкрэсліў прэм'ер-міністр.

З гасцініцамі зразумела, а як паўплываць на цэнаўтварэнне на арэнднае жыллё? «На людзей мы не зможам паўплываць, але сёння гасцініцы, аграсядзібы прапануюць дастатковую колькасць месцаў. Але калі людзі абяруць арэнду кватэр, яны змогуць гэта зрабіць, але рынак склаўся сёння - мы маніторам - такім чынам, што на гэтым сегменце, там, дзе кватэры, кошты не могуць адрознівацца ад сярэднерынкавых у Мінску», - дадаў ён.

Сур'ёзнае пытанне - ці ўдаецца ўкласціся ў плануемы бюджэт? «Мы знаходзімся ў рамках першапачаткова зацверджанага каштарысу. Больш за тое, мы адчуваем, што па прыцягненні спонсараў унутры краіны гэты артыкул даходаў перавыканаем», - адзначыў прэм'ер-міністр.

Так, актыўна ўключаюцца прыватныя арганізацыі, якія зацікаўлены ў рэкламе сваей прадукцыі на Еўрагульнях. Што па знешніх спонсарах, то ці ёсць зрухі ў пазытыўны бок? «Не, па знешніх, на жаль, ЕАК [Еўрапейскі алімпійскі камітэт – “Звязда”] падвёў нас і не змог прыцягнуць ні аднаго знешняга спонсара. Але мы кампенсуем гэта знешнімі спонсарамі ў тым ліку, якіх прыцягвае сёння Дырэкцыя. Вядома, на першапачатковыя лічбы мы не выйдзем. Калі б нам ЕАК даверыў гэтую працу за два гады, то, вядома, мы б змаглі прыцягнуць знешніх спонсараў на такое глабальнае спартовае спаборніцтва», - дадаў Сяргей Румас.

Міністр спорту і турызму Беларусі Сяргей Кавальчук распавёў журналістам, што падрыхтоўка да Еўрапейскіх гульняў знаходзіцца на завяршальнай стадыі.

Што тычыцца крытыкі Прэзідэнтам асобных відаў спорту - біятлона, хакея - і шэрагу іншых, Сяргей Кавальчук адзначыў, што праца федэрацый павінна будавацца сістэмна. Паводле яго слоў, многія віды спорту падобныя ў адборы і падрыхтоўцы, у навукова-метадычным і фармакалагічным забеспячэнні. «Федэрацыі паміж сабой павінны больш цесна працаваць, абменьвацца, скажам так, тымі вынікамі, якія ёсць», - сказаў міністр.

Ён таксама пагадзіўся з Прэзідэнтам у тым, што ў Нацыянальным алімпійскім камітэце павінны пастаянна праводзіцца мерапрыемствы, «дзверы не павінны зачыняцца».

Акрамя таго, па выніках пасяджэння стала вядома, што абавязкі першага віцэ-прэзідэнта НАК будзе выконваць памочнік Прэзідэнта па нацыянальнай бяспецы Віктар Лукашэнка. Пытанні, якія замацаваны за ім: міжнароднае супрацоўніцтва, падрыхтоўка да ІІ Еўрапейскіх гульняў, матч Еўропа – Амерыка.

Уладзіслаў ЛУКАШЭВІЧ