Вы тут

Штотыднёвы спартыўны агляд «Звязды»


У штотыднёвым спартыўным аглядзе «Звязды» расказваем пра няўдалы дамашні матч гандбольнай зборнай і іншыя актуальныя падзеі выхадных.


1. Беларускія гандбалісты прайгралі чэхам у адборачным матчы чэмпіянату Еўропы — 24:26. Нагадаем, на старце адборачнага турніру наша зборная саступіла ў Мінску камандзе Босніі і Герцагавіны — 29:30, а затым у гасцях абыграла фінскую зборную з лікам 27:20 і чэхаў — 31:30.

— Вельмі засмучаны такім вынікам. Гэта была складаная гульня, — адзначыў галоўны трэнер беларускай зборнай Юрый Шаўцоў. — З сярэдзіны другога тайма пачалі дрэнна дзейнічаць у абароне. І ў нападзенні не ўсё ўдалося. Варатар сапернікаў адбіў некалькі важных мячоў. Магчыма, дзесьці хлопцы трохі спяшаліся. Не хапала і кідкоў Улада Кулеша з далёкай дыстанцыі. Зборная Чэхіі — вельмі добрая каманда, роўны з намі па сілах сапернік. Два матчы з імі паказалі, што каманда можа выйграць на выездзе, а затым саступіць дома. Думаю, у нас па-ранейшаму вельмі добрыя шанцы на выхад з групы. Паражэнне ёсць паражэнне. Але задачу выхаду на чэмпіянат Еўропы ніхто не адмяняў.

У другім нядзельным матчы каманда Босніі і Герцагавіны на сваёй арэне разграміла фінаў — 31:19. Турнірнае становішча ў пятай адборачнай групе пасля чатырох гульнявых дзён: Чэхія — 6 ачкоў, Боснія і Герцагавіна — 6, Беларусь — 4, Фінляндыя — 0.

Нагадаем, у фінальную стадыю кантынентальнага першынства выйдуць па дзве найлепшыя дружыны з васьмі кваліфікацыйных квартэтаў, а таксама чатыры найлепшыя каманды, якія занялі трэція месцы.


2. Беларуская каманда ў групавых практыкаваннях па мастацкай гімнастыцы заваявала залатую ўзнагароду на этапе Кубка свету ў Сафіі. Выступленне з пяццю мячамі Ганны Гайдукевіч, Анастасіі Рыбаковай, Ганны Швайбы, Арыны Сушчынскай і Карыны Ярмоленкі арбітры ацанілі ў 23,600 бала. Другое месца занялі гімнасткі з Японіі (23,250 бала), замкнулі тройку прызёраў расіянкі (23,150).

У індывідуальных спаборніцтвах за крок ад п'едэстала (чацвёртае месца) у практыкаванні з булавамі спынілася беларуска Аліна Гарнасько, у кампазіцыі з мячом яна заняла пятае месца.


3. Арына Сабаленка засталася на 10-й пазіцыі ў абноўленым рэйтынгу Жаночай тэніснай асацыяцыі. Аляксандра Сасновіч знаходзіцца на 35-м месцы, Вікторыя Азаранка займае 61-ю пазіцыю, у Веры Лапко 70-е месца.

Нагадаем, у канцы гэтага тыдня, 20—21 красавіка, беларускія тэнісісткі ў складзе нацыянальнай зборнай згуляюць у Брысбене супраць каманды Аўстраліі ў паўфінальным матчы Кубка Федэрацый.


4. Валейбалісты «Шахцёра» сталі ўладальнікамі залатых узнагарод чэмпіянату Беларусі. У чацвёртым матчы фіналу плэй-оф з лікам 3:1 яны абыгралі сталічны «Будаўнік».

Валейбалісты «Шахцёра» трэці раз запар сталі чэмпіёнамі Беларусі. Падапечныя Віктара Бекшы перамагалі ў 2017 і 2018 гадах. Аднак мінскі «Будаўнік» застаецца самай тытулаванай валейбольнай камандай, выйграўшы раней чэмпіёнскі тытул сем разоў.


5. Завяршыліся паядынкі 3-га тура чэмпіянату краіны па футболе. Мінскае «Дынама» выйграла ў футбалістаў «Гарадзеі», брэсцкае «Дынама» адолела ў гасцях дзеючага чэмпіёна краіны барысаўскі БАТЭ з мінімальнай перавагай — 1:0. «Іслач» перайграла «Нёман» — 1:0, «Віцебск» згуляў унічыю з «Тарпеда» — 1:1, «Гомель» з буйным лікам перайграў «Энергетык-БДУ» — 3:0, «Дняпро» саступіў «Славіі» — 1:2, «Тарпеда-БелАЗ» і «Мінск» не змаглі выявіць пераможцу — 1:1. У заключным паядынку 3-га тура салігорскі «Шахцёр» сустрэўся на сваім полі са «Слуцкам».

Становішча ў групе лідараў: «Дынама» (Брэст) — 9 ачкоў (3 матчы), «Дынама» (Мінск) — 7 (3), «Гомель» — 6 (3), «Шахцёр» — 6 (2), БАТЭ — 6 (3), «Іслач» — 6 (3).

Дар'я Лабажэвіч

Загаловак у газеце: Паражэнне ёсць паражэнне

Выбар рэдакцыі

Грамадства

Беларусь і Расія зблізілі пазіцыі па праграме рэалізацыі дагавора аб Саюзнай дзяржаве

Беларусь і Расія зблізілі пазіцыі па праграме рэалізацыі дагавора аб Саюзнай дзяржаве

Аб гэтым заявіў старшыня Савета Рэспублікі Міхаіл Мясніковіч на сустрэчы са старшынёй Савета Федэрацыі Валянцінай Мацвіенка.

Грамадства

Як Брэст рыхтуецца да святкавання свайго 1000-годдзя

Як Брэст рыхтуецца да святкавання свайго 1000-годдзя

Афіцыйныя святкаванні і асноўныя мерапрыемствы гарадскога Міленіума пройдуць 6—8 верасня.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Пра ляльку з секс-шопа, галубоў на ігрушы і дзяўчынку, якая схавала пашпарты.