У Вялікабрытаніі ў 44 гады памерла самая старая залатая рыбка

У Вялікабрытаніі памерла самая старая рыбка краіны. Джорджу было 44 гады, паведамляе Daily Mail.

75-гадовы Кіт Эліс з Вустэра выйграў двух рыбак на кірмашы ў 1974 годзе. Ён падарыў іх сваёй на той момант дзяўчыне, а цяпер жонцы - Мэры. З тых часоў рыбкі, якіх назвалі Фрэдам і Джорджам, жылі ў сям'і Эліса. Яны сталі сведкамі вяселля сваіх гаспадароў, двух пераездаў і нараджэння дачкі - Эмы.

Звычайна залатыя рыбкі жывуць не даўжэй за дзесяць гадоў, але Фрэд і Джордж сталі сапраўднымі рэкардсменамі: яны пражылі 42 і 44 гады. Першым загінуў Фрэд - гэта здарылася два гады таму. Фрэда і Джорджа пахавалі побач у садзе на заднім двары дома Эліса.