Вы тут

У Мінску падведзены вынікі конкурсу «Свет маімі вачыма»


У Мінску падведзены вынікі Рэспубліканскага конкурсу дзіцячага выяўленчага мастацтва «Свет маімі вачыма» для дзяцей-сірот і дзяцей з інваліднасцю.


Конкурс праходзіў у рамках праграмы Беларускага дзіцячага фонду «Юныя таленты».

— На наш погляд, самае каштоўнае ў работах, прадстаўленых на конкурс, — шчырасць, — лічыць дырэктар РГА «Беларускі дзіцячы фонд» Аляксандр ТРУХАН.— У гэтых работах і радасць, і дабрыня, і ўменне бачыць прыгожае, чэрпаць у ім натхненне і энергію. Такі конкурс — магчымасць для нас, дарослых, убачыць свет дзіцячымі вачыма.

У склад журы ўваходзілі вядомыя мастакі, мастацтвазнаўцы і блогеры. Партнёрамі конкурсу сталі ААТ «БПС-Ашчадбанк», кампанія «MasterCard» і прадпрыемства «Кока-кола Беўрыджыс Беларусь».

— Я ўражаны тым, што атрымаў трэцяе месца, — гаворыць Нікіта РАГАЎЦОЎ, удзельнік конкурсу. — Вучуся ў Магілёўскім дзяржаўным эканамічным прафесійна-тэхнічным каледжы, мая будучая прафесія не мае ніякага дачынення да выяўленчага мастацтва. Аднойчы зайшоў у кабінет да нашага выкладчыка падчас нейкага творчага хаосу, спытаў у дзяцей, што яны тут робяць, — аказалася, малююць. Застаўся паглядзець, паспрабаваў і сябе. Наша выкладчыца Данута Чэх-Астрашэўская заўважыла, што ў мяне ёсць здольнасці. Вось і прапанавала паўдзельнічаць у конкурсе. Цяпер вось хаджу маляваць у майстэрню кожны тыдзень. Сам у шоку!

У конкурсе бралі ўдзел дзеці і падлеткі ад 10 да 18 гадоў, якія засталіся без апекі бацькоў або маюць абмежаваныя магчымасці. Конкурс праходзіў са снежня 2018 года да сакавіка 2019-га ў дзвюх намінацыях — жывапіс і графіка. Усяго ў ім прыняло ўдзел каля 500 дзяцей з розных рэгіёнаў Беларусі. У выніку журы вызначыла 19 пераможцаў — яны атрымалі дыпломы і мастацкія прылады для творчасці. Яшчэ 21 удзельнік узнагароджаны памятнымі падарункамі ад членаў журы.

Але самым каштоўным падарункам стала выстаўка. Сорак работ пераможцаў і ўдзельнікаў конкурсу можна ўбачыць у Нацыянальным гістарычным музеі да 23 красавіка.

Наталля ТАЛІВІНСКАЯ

Загаловак у газеце: Шчыры погляд

Выбар рэдакцыі

Грамадства

Як у Беларусі трансплантуюць органы

Як у Беларусі трансплантуюць органы

І чаму да нас на аперацыі едуць замежнікі.

Грамадства

Карэспандэнты «Звязды» наведалі «Воўчыя норы»

Карэспандэнты «Звязды» наведалі «Воўчыя норы»

Там адбываюць пакаранне мужчыны, упершыню асуджаныя за незаконны абарот наркотыкаў.

Спорт

Аляксандра Герасіменя: У кожнага свой рэцэпт поспеху

Аляксандра Герасіменя: У кожнага свой рэцэпт поспеху

Аляксандра Герасіменя — сапраўдны баец, а яшчэ — клапатлівая маці і жонка. І проста працавіты чалавек, які не ведае перашкод.