Вы тут

Нататкі шматдзетнага таткі


Размова двайнятак.

Вера:

— Напэўна, вельмі страшна працаваць сцюардэсай...

Поля:

— А што там страшнага? Два разы прайшоў па самалёце, а астатні час сядзіш прышпілены.

Вера абурана:

— Поля, якая розніца, калі самалёт упадзе?!

Думаў, спрэчка скончана на карысць Веры, але дзе там.

Поля:

— Тады навошта, па-твойму, у самалёце прышпільваюцца?

Вера не знайшла, што адказаць, і прыйшлося ўжо мне тлумачыць, што падаць прыемней прышпіленым.

Р.S. Хоць, безумоўна, я магу памыляцца.


А вось зараз я злёгку афігеў.

Сын:

— Тата, напішы мне заяву ў школу.

— Якую яшчэ заяву?

— Што я заўтра не пайду на апошні ўрок.

— А чаму гэта ты заўтра не пойдзеш на апошні ўрок?

— Таму што заўтра апошні дзень вучобы перад канікуламі.

— А проста не пайсці на апошні ўрок ты не можаш?

— Магу. Але лепей, калі будзе заява.

Нахабнасць — другое шчасце (а ў гэтым выпадку нават першае). Але я напісаў, канешне. Усё-такі з заявай сачкаваць урок больш прыемна, тут яго праўда.

Р.S. І як гэта я ў дзяцінстве да гэтага не дадумаўся?


Паказаў сыну артыкул, у якім гаворыцца, што на 97,5 % людзей смартфон аказвае згубнае ўздзеянне. Ён прачытаў, паглядзеў на мяне і сказаў:

— Не турбуйся, тата, на шчасце я належу да тых іншых 2,5 %.

Ну што ты будзеш з ім рабіць?

* * *

Сын:

— Калі ўявіць, што кожны з нас гэта якая-небудзь краіна, то Марта — гэта Расія.

— Чаму?

— Таму што яна пастаянна да ўсіх чапляецца.

— А астатнія хто?

— Мама — гэта Амерыка: яна ўсіх вучыць жыць. Я — гэта Аўстралія: у мяне свой пакой і мне ўсё да лямпачкі. Двайняты — гэта Беларусь і Украіна: быццам бы сябруюць, але кожная сама сябе наўме.

— А я тады хто?

— А ты, тата, — гэта Швейцарыя.

— Чаму Швейцарыя?

— Ну, па-першае, ты кантралюеш нашы фінансы. Па-другое, ва ўсіх канфліктах ты захоўваеш нейтралітэт. А па-трэцяе, у цябе шмат гадзіннікаў.

Потым сталі разам думаць, якую краіну прадстаўляе Ксенія. Вырашылі, што Ксенія гэта... Паўночная Карэя: любіць гучна заяўляць аб сабе і ўвесь час патрабуе, каб яе кармілі.

Пасля гэтай незвычайнай размовы мне быццам бы стала многае зразумела, прычым не толькі ў жыцці нашай краіны, але і ў вялікай палітыцы наогул. Калі, напрыклад, Марта сварыцца з мамай — значыць, зноў Расія з Амерыкай нешта не падзялілі.

А калі па тэлевізары Паўночная Карэя пагражае ўсяму свету, значыць, гэта проста Ксенія спрабуе звярнуць на сябе ўвагу.

Р.S. І толькі пра Швейцарыю амаль нічога не чуваць — на тое яна і Швейцарыя.

Павел ХОЛАД

Выбар рэдакцыі

Спорт

Апублікаваны даведнік «Мінск» — карысны для турыстаў і падарожнікаў

Апублікаваны даведнік «Мінск» — карысны для турыстаў і падарожнікаў

Ён быў падрыхтаваны адмыслова напярэдадні II Еўрапейскіх гульняў.

Грамадства

У Полацку ўпершыню знойдзена пахаванне князя

У Полацку ўпершыню знойдзена пахаванне князя

Сярод знаходак — нямала сенсацый.

Грамадства

З баршчэўнікам змагаюцца нават з дапамогай квадракоптара

З баршчэўнікам змагаюцца нават з дапамогай квадракоптара

Вопыт Віцебшчыны ў знішчэнні баршчэўніку цікавы таму, што тут больш за 80 працэнтаў зараснікаў ад агульнага па краіне.

Грамадства

Прэтэндэнты на студэнцкі білет здалі тэст па матэматыцы

Прэтэндэнты на студэнцкі білет здалі тэст па матэматыцы

Пазнаць у гарадскім натоўпе абітурыентаў можна без праблем.