Вы тут

«Мы вам самі ўсё пакажам!»


Сатырычная трагікамедыя Эльдара Разанава нарадзілася наўпрост з жыцця — пасля таго, як рэжысёр сам пабываў на сходзе гаражнага кааператыва супрацоўнікаў студыі «Масфільм». Замест паўгадзіны рэжысёр правёў на сходзе практычна суткі і вярнуўся дадому ў шоку ад убачанага і пачутага. І хоць, безумоўна, НДІ па абароне жывёл ад навакольнага асяроддзя — зусім не тое самае, што творчае кола кінематаграфістаў, але ператварэнне быццам бы інтэлігентных, выхаваных, даўно знаёмых паміж сабой людзей у баязлівую і бессаромную «зграю таварышаў», гатовых зрабіць подласць дзеля машына-месца, — відовішча не для слабых нерваў. А ў Разанава яно атрымалася да таго ж настолькі вострым і пазнавальным, што фільм мог наогул не выйсці на экраны.


Так, яшчэ на стадыі ўзгаднення сцэнарыя пільныя цэнзары павыкрэслівалі мноства рэмарак Эміля Брагінскага і Эльдара Разанава — у прыватнасці, загадалі прыбраць пасаж пра намесніка старшыні кааператыва — «шэрага кардынала, які насамрэч галоўнейшы за кіраўніка» (бо менавіта «шэрым кардыналам» у той час у партыйных колах называлі Міхаіла Суслава). У гатовым фільме высокае кіраўніцтва раззлаваў дыялог пра вучоных, якіх адправілі перабіраць бульбу ў калгас, і візітоўку, якую пакінуў у кожным мяху іхні кіраўнік... Выратаваў карціну толькі збег абставін: якраз напярэдадні здачы на пленуме ЦК КПСС Брэжнеў патрабаваў бязлітасна крытыкаваць хібы грамадства. І атрымалася, што «Гараж» гэтым заклікам якраз адпавядае. Але ўсё адно рэжысёру адпомсцілі — прэм'еру не пусцілі ў цэнтральныя кінатэатры, каб афішы не мазолілі вочы ўздоўж урадавай трасы. Тым не менш «Гараж» толькі ў першы год паглядзела больш за 28,5 мільёна чалавек, а цытаты з фільма пайшлі ў народ — пэўная прыкмета поспеху.

У якасці дэкарацый быў выбраны заалагічны музей, што дазволіла разнастаіць дзею, якая цягам 1,5 гадзіны адбываецца ў замкнутай прасторы з удзелам адных і тых жа персанажаў.

Здымкі доўжыліся менш як месяц (толькі на гэты тэрмін рэжысёр, уключыўшы ўсе сувязі і асабістае абаянне, адпрасіў з тэатраў на здымкі найлепшых акцёраў). А каб яшчэ паскорыць працэс, кожную сцэну фіксавалі адначасова тры камеры з розных ракурсаў, а падчас мантажу пакідалі самыя ўдалыя фрагменты.

Не ўдалося ўключыць у акцёрскі ансамбль толькі Аляксандра Шырвінта. І зноў жа спрацаваў збег абставін: у суседнім павільёне ў гэты час здымаўся Валянцін Гафт, яму прапанавалі ролю — і ён не толькі бліскуча сыграў, але і сустрэў на здымачнай пляцоўцы свой лёс, будучую жонку Вольгу Астраумаву.

Як і ў іншых сваіх фільмах, Разанаў сыграў тут у эпізодзе — начальніка аддзела насякомых, які праспаў увесь сход, а таму выцягнуў нешчаслівае жэрабя выключэння з кааператыва.

«Мне б вельмі хацелася, каб «Гараж» састарэў як мага хутчэй, — прызнаваўся рэжысёр, — але, на жаль, ён дагэтуль застаецца люстэркам нашага непрывабнага жыцця...» Паглядзецца наноў у гэта люстэрка можна на канале «МІР» 17 і 18 мая — і, дай бог, не пабачыць сябе...

Сказана!

  • «У час здрадзіць — гэта не здрадзіць, гэта прадбачыць».
  • «Залаты мой, што, што, а права вы маеце».
  • «Таварышы, у мяне ўжо курыца пацякла!»
  • «Законным шляхам ісці можна — дайсці цяжка».
  • «Ён ляжыць у знак пратэсту!»
  • «Як ветэрынар, я абяцаю вам, пражэрлівы мой, заварот кішак».
  • «Чалавек — гэта таксама жывёла, яго таксама трэба ахоўваць. — Ад каго? — Чалавека трэба ахоўваць ад чалавека».
  • «Не чапайце макаку суматранскага! Гэта ж адзіны экзэмпляр у нас у краіне!»
  • «Спаць на стале прэзідыума маюць права толькі члены кааператыва».
  • «Серабрысты журавель — птушка цёмная, яна газет не чытае і таму не мае ўяўлення, наша яна ці капіталістычная».

Выбар рэдакцыі

Калейдаскоп

Вясёлыя гісторыі чытачоў

Вясёлыя гісторыі чытачоў

Языку дай волю..., Хвалі дзень вечарам, Людзі — добрыя.

Эканоміка

Саветы па развіцці прадпрымальніцтва сталі працаваць больш эфектыўна і вынікова

Саветы па развіцці прадпрымальніцтва сталі працаваць больш эфектыўна і вынікова

Значную ўвагу на развіццё малога і сярэдняга прадпрымальніцтва пачалі звяртаць даўно, прычым на самым высокім дзяржаўным узроўні.

Эканоміка

Ці патаннее жыллё ў наступным годзе?

Ці патаннее жыллё ў наступным годзе?

А што ў сталіцы — тое і ў рэгіёнах.

Спорт

Спартыўны псіхолаг Кацярына Буча распавядае, ці лёгка вырасціць чэмпіёна

Спартыўны псіхолаг Кацярына Буча распавядае, ці лёгка вырасціць чэмпіёна

Як правільна вызначыць від спорту, які падыходзіць для вашага дзіцяці, ці варта ўвогуле прымушаць яго хадзіць на трэніроўкі?