Вы тут

Песні ў люстэрках, маланкі і рэтра: якім будзе другі паўфінал «Еўрабачання»


Сёння а 22 гадзіне ў Тэль-Авіве пачнецца другі паўфінал «Еўрабачання-2019». У ім на музычны рынг выйдуць прадстаўнікі 18 краін, а гледачы пераканаюцца, што бачылі і чулі яшчэ не ўсіх фрыкаў сёлетняга шоу.


Хто, як і пра што будзе спяваць, чытайце ў аглядзе «Звязды».

Арменія, Србук — Walking Out

Србук Саргасян 25 гадоў, яна поп- і соўл-спявачка, якая займаецца вакалам з дзіцячага садка, і на сёння — адна з самых папулярных артыстак у сваёй краіне.
Яе конкурсная песня пра каханне і здраду, а нумар — экспрэсіўнае спалучэнне чорнай вопраткі і вогненнай піратэхнікі, а таксама эфектаў разбітага шкла на экране і падлозе.

Ірландыя, Сара Мактэрнан — 22

Маладая мама Сара Матрэрнан выхоўвае 2,5-гадовую дачку і выступае ў родным графстве Клэр на вяселлях, не толькі спяваючы, а таксама граючы на скрыпцы, гавайскай гітары, фартэпіяна і вістле (ірландскай жалейцы).

Нумар імітуе пасядзелкі за барнай стойкай: Сара прыгожа сядзіць і ляжыць, танцоркі паказваюць страсці. Пры чым тут 22? Гэта проста нумар дома маладога чалавека, пра якога ідзе гаворка ў песні.

Малдова, Ганна Адабеску — Stay

Джазавую спявачку Ганну некаторыя могуць памятаць па «Славянскім базары ў Віцебску-2016», дзе артыстка ўзяла 2-ю прэмію. Зрэшты, у яе ёсць яшчэ мноства нацыянальных і міжнародных прэмій.

Конкурсная песня Ганны — пра пачуцці, а на сцэне артыстка выступіць разам з мастачкай пясчаных карцін, сюжэты якой будуць транслявацца на вялікі экран.

Швейцарыя, Лука Хені — She Got Me

У 5 гадоў ён сеў за барабаны, у 9 — за фартэпіяна і гітару, а пасля школы нечакана пайшоў вучыцца на каменшчыка. І толькі ў 17 год, калі нечакана выйграў нямецкую версію шоу Pop Idol і атрымаў прыз у 500 тысяч еўра, Лука сур’ёзна заняўся музычнай кар’ерай. 

Два гады таму ён выйграў яшчэ і нямецкае танцавальнае шоу, і, мабыць, таму ў конкурсным нумары для «Еўрабачання» спалучыў энергічныя «брудныя танцы» і спевы з усходнімі элементамі.

Латвія, Carousel — That Night

Індзі-поп-гурт, у якім гучыць дзявочы голас, гітара, кантрабас і бубны, быў утвораны ў 2015 годзе і спачатку меў іншую назву. 
Са сцэны «Еўрабачання» калектыў будзе заклікаць «каханне на ўсю ноч», а само выступленне зроблена ў рэтра-стылі з эфектам старой пацёртай кінастужкі, месцамі засвечанай.

Румынія, Эстэр Пеоні — On a Sunday

Румына-канадскую спявачку насамрэч завуць Аляксандра Крэту, але папулярнасць яна здабыла менавіта пад сцэнічным псеўданімам. Вучылася ў кансерваторыі па кампазіцыі і джазавай секцыі, праз YouTube была заўважана і запрошана на тэлебачанне, а потым выйграла нацыянальны адбор. 
Конкурсны нумар Румыніі даволі змрочны, як і настрой песні: «Каханне можа стаць вельмі небяспечным, калі аддаеш яго не таму чалавеку».

Данія, Леанора — Love is Forever

Леаноры Колмар Джэпсен 20 гадоў, а ў яе скарбонцы ўжо мноства ўзнагарод спаборніцтваў... па фігурным катанні. Праўда, сёння яна ўжо не катаецца сама, а выступае трэнерам і харэографам, а паралельна займаецца другой любімай справай — музыкай.

Песня артысткі прагучыць на дацкай мове (упершыню больш чым за 20 гадоў!), а таксама французскай і нямецкай, і раскажа пра каханне — прынамсі такое, якім уяўляе яго юная дзяўчына. На сцэне будуць вялізнае сіняе крэсла, а яшчэ аблокі, сонейка, мульцяшкі і дзіцячыя малюнкі. 

Швецыя, Джон Лундвік — Too Late for Love 

Джон Хасім Лундвік нарадзіўся ў Лондане, але ва ўзросце аднаго тыдня быў усыноўлены шведскай парай і ніколі не бачыў сваіх біялагічных бацькоў. Ён доўгі час займаўся лёгкай атлетыкай і выйграў некалькі медалёў у бегу на 100 метраў. А яшчэ ён піша музыку — для сябе, для кіно і нават для каралеўскага вяселля! Песня, зробленая ў якасці падарунка шведскай прынцэсе Вікторыі, прагучала ў 2010 годзе і зрабіла свайго аўтара знакамітым.

Усмешлівы цёмнаскуры спявак і каларытныя бэк-вакалісткі ў бліскучых касцюмах — традыцыйны рэцэпт поспеху ад Швецыі, які чамусьці спрацоўвае толькі з гэтай краінай. Прынамсі, Джон — адзін з фаварытаў у букмекераў.

Аўстрыя, PAENDA — Limits

Пра спявачку Габрыелу Хорн, больш вядомую пад псеўданімам PAENDA, гавораць, што яе песні такія ж яркія і смелыя, як яе прычоскі. Прынамсі, песня для «Еўрабачання-2019» — пра тое, што толькі мы самі мусім задаваць сабе абмежаванні і рамкі і выходзіць за іх, не паддаючыся ціску грамадства.
Конкурснае выступленне Габрыелы цікавае светладыёднымі слупамі і эфектам левітацыі, а яшчэ тым, што паступова ператворыцца з чорна-белага ў каляровае.

Харватыя, Рока — The Dream

Рока Блажэвіч — чэмпіён краіны па хіп-хопу, акцёр мюзіклаў, а яшчэ ён умее граць на фартэпіяна і аргане. 

Конкурсную песню для маладога артыста напісаў харвацкі ўдзельнік «Еўрабачання-2017» Жак Хоўдэк, яна пра мары і чыстае каханне. На сцэне выканаўцы гэта пакажуць з дапамогай маляўнічых краявідаў і танцораў-анёлаў, якія прынясуць спеваку крылы.

Мальта, Мікела Пач — Chameleon

Дзяўчыне 18, яна вучыцца ў жаночай школе епіскапскай кансерваторыі, вывучае сацыялогію і біялогію і яшчэ летась марыла стаць зусім не эстраднай зоркай, а паліцэйскім дэтэктывам. Але тут выйграла мясцовае шоу «Х Фактар» і атрымала права прадставіць краіну на «Еўрабачанні».

У нумары спявачка ўваходзіць у вялікі белы пакой, дзе мільгаюць розныя фоны і праекцыі — то акіян, то пустыня, то сад. Гэты прыдуманы свет выходзіць з устаноўленых межаў і распаўсюджваецца на ўсю сцэну.

Літва, Юрый Вякленка — Run with the Lions

Юрый вырас у музычнай сям’і, але талент удасканальвае самастойна паводле «правіла 10 тысяч гадзінаў» — каб дасягнуць чагосьці сапраўды вартага, трэба патраціць на навучанне столькі часу.

На «Еўрабачанні» спявае пра перамогу над сваімі страхамі і пачуццё свабоды, калі ты выпускаеш пачуцці на волю і гатовы бегчы з ільвамі. Але львоў на сцэне не будзе, затое будзе шмат святла і жэстыкуляцыі на камеру.

Расія, Сяргей Лазараў — Scream

Спартсмен, акцёр, спявак, тэлевядучы, а яшчэ ўладальнік другога месца на «Еўрабачанні-2016», Сяргей зноў паспытае шчасця на конкурсе — нягледзячы на тое, што ягоную баладу Scream многія называюць нефарматнай.

У нумары артыста будзе дождж, навальніца, каметы і столькі Сяргеяў Лазаравых у люстэрках, што важна не заблытацца, дзе тут сапраўдны.

Албанія, Ёніда Малічы — Ktheju tokёs

За плячыма ў спявачкі — клас скрыпкі і гітары, ролі ў мюзіклах, выступленні на буйных фэстаў і 435 падпісчыкаў у Інстаграм.

Яе конкурсная песня прысвечаная эміграцыі — тэма, знаёмая і балючая для албанскай дыяспары. «Практычна ў кожнай сям’і ёсць хтосьці, хто пакінуў краіну, гэта вельмі складана для ўсіх нас, і мая песня — у тым ліку і асабістыя эмоцыі», — гаворыць спявачка. Сімвалам-заклікам вярнуцца да сваіх каранёў у яе нумары будзе вялізны арол.

Нарвегія, KEiiNO — Spirit in the Sky

Нарвежска-саамска-фінскі праект існуе толькі з мінулага лета, смела змешваючы поп- і фолк-музыку з электроннымі аранжыроўкамі.

«Фішка» песні, якая з павагай ставіцца да кожнага чалавека незалежна ад яго рэлігіі, нацыянальнасці ці полу, — ёйк. Гэта традыцыйны фальклорны спеў саамаў, у якім закладзены асаблівы рытм, пры гэтым словы, якія паўтараюцца ў спеве, часта могуць быць наогул пазбаўленыя сэнсу. 

Нідэрланды, Дункан Лоурэнс — Arcade

Другую частку свайго сцэнічнага імя артыст Дункан дэ Мор узяў у гонар сваёй маці Лаўрэнсіі. Толькі яна ды музыка выратоўвалі хлопца ў школьныя гады, калі з яго шмат здзекваліся. А вось песню артыст напісаў пад уражаннем гісторыі пра чалавека, які быў вельмі любімым, але памёр у маладым узросце, гэта гісторыя пра тугу, прагу чагосьці недасягальнага і надзею.

На сцэне не будзе адбывацца нічога надзвычайнага: артыст проста сядзе за міні-раяль на фоне начнога неба і яркіх лазераў.

Паўночная Македонія, Тамара Тадэўска — Proud

Тамара — дзіця з музычнай сям’і, яе тата прафесар Акадэміі музыкі, а мама — оперная спявачка. Выступаць разам з сёстрамі Марыянай і Разанай дзяўчына пачала яшчэ ў 6-гадовым узросце, а ў «Еўрабачанні» ўдзельнічала ажной тройчы — у 2008 годзе ў складзе гурта, у 2004 і 2014 — у якасці бэк-вакалісткі.

У нумары Македоніі, як і ў Расіі, будуць люстэркі — праўда, меншай колькасці, а яшчэ чорна-белыя фота на экранах. Песня Тамары прысвечаная моцным жанчынам, якія не баяцца заяўляць аб сабе на ўвесь голас і спраўджваць мары. «Давай, гучна скажы ім, што значыць стаяць з гонарам», — заклікае спявачка.

Азербайджан, Чынгіз — Truth

Чынгіз Мустафаеў вядомы па выступленняў на «Новай хвалі» і ўкраінскім шоу «Голас краіны», захапляецца іспанскай гітарай (нават стварыў уласны гурт, які грае ў стылі фламенка) і кунг-фу.

Але конкурсная песня ў яго далёкая ад іспанскіх страсцей, яна глыбока асабістая — пра таксічныя стасункі і здрадніцтва. А ўвасабленне вельмі тэхналагічнае: у выканаўцы будзе дзве «штучныя» рукі робатаў, замена жывога сэрца на біянічнае і ператварэнне чалавека ў прамень... Гэта насамрэч эфектна.

Вікторыя ЦЕЛЯШУК

Фота eurovision.tv

Выбар рэдакцыі

Грамадства

З баршчэўнікам змагаюцца нават з дапамогай квадракоптара

З баршчэўнікам змагаюцца нават з дапамогай квадракоптара

Вопыт Віцебшчыны ў знішчэнні баршчэўніку цікавы таму, што тут больш за 80 працэнтаў зараснікаў ад агульнага па краіне.

Грамадства

Прэтэндэнты на студэнцкі білет здалі тэст па матэматыцы

Прэтэндэнты на студэнцкі білет здалі тэст па матэматыцы

Пазнаць у гарадскім натоўпе абітурыентаў можна без праблем.

Грамадства

Як жывуць апошнія жыхары вёскі Вясневічы

Як жывуць апошнія жыхары вёскі Вясневічы

Галоўная славутасць Вясневічаў, яе жывая гісторыя — 96-гадовы Аляксей Юркевіч.

Культура

Наталля Батракова: Чытачы пішуць, што мае героі нібыта працуюць у суседнім офісе

Наталля Батракова: Чытачы пішуць, што мае героі нібыта працуюць у суседнім офісе

З Наталляй Батраковай мы сустрэліся на адкрыцці абноўленай кнігарні «Светач», што на сталічным праспекце Пераможцаў, 11.