Вы тут

26 прэтэндэнтаў паспаборнічаюць за хрустальны мікрафон «Еўрабачання»


Сёння ў выставачным комплексе Тэль Авів Экспа пройдзе фінальны канцэрт «Еўрабачання-2019». Удзел у ім бяруць 26 краін: па 10 найлепшых з кожнага паўфіналу, краіна-гаспадар конкурсу Ізраіль і «вялікая пяцёрка» — Вялікабрытанія, Германія, Іспанія, Італія і Францыя. Паводле жараб’ёўкі і расстаноўкі прадзюсараў конкурсу, якія пастараліся пазбегчы аднастайнасці і зрабіць шоу як мага больш відовішчным, пад нумарам 1 на сцэну выйдзе спявачка з Мальты, а апошнім выступіць прадстаўнік Іспаніі. Нумар 13 дастаўся Грэцыі. Беларуска ЗЕНА — пад нумарам 19.


На адкрыццё шоу запрошаны былыя ўдзельнікі «Еўрабачання» Верка Сярдзючка, Монс Зелмерлёў і Элені Фурэйра, актрыса Галь Гадот, вядомая па ролі Цуда-жанчыны ў аднайменным коміксе. Ну і, безумоўна, публіка з нецярпеннем чакае Мадонну — але гэта спявачка спецыяльны і дарагі (коштам больш чым 1 мільён еўра) госць шоу, таму за яе, нагадаем, галасаваць нельга, нават калі вельмі хочацца.

Калі дваццатку паўфіналістаў гледачы ўжо бачылі раней і зрабілі высновы, хто чаго варты, то 6 удзельнікаў, якія, што называецца, атрымалі залік «аўтаматам» і прайшлі адразу на фінішную прамую, могуць — ды што там, збіраюцца — здзівіць і ўразіць. І «Звязда» раскажа, чым менавіта.

Германія, S!sters — Sister (№ 4)

Насамрэч, канешне, Карлота Трумэн і Лаўра Кестэль зусім не сёстры, а самастойныя артысткі, якія аб’ядналіся ў дуэт спецыяльна для конкурсу. Карлота выступае... трымайцеся, з узросту ў 1,5 гады, а ў 10 запісала свой першы сінгл. Лаўра, напалову філіпінка, пачынала са спеваў кулінарных рэцэптаў у тэлешоу, потым працавала бэк-вакалісткай з вялікімі зоркамі, а цяпер піша першы сольны альбом.

Што да песні, яна пра яднанне жанчын і супраць дэвальвацыі ўласнай самаацэнкі. «Свяці, як гарадскія агні, і не спрабуй гэта схаваць, сястра, ведай, што я з табой», — звяртаюцца дзяўчаты да ўсіх прыхільніц эманспіпацыі.

Ізраіль, Кобі Мерымі — Home (№ 14)

27-гадовы Кобі скончыў курс вакала і тэатральнага майстэрства, але, каб забяспечваць сябе, працаваў то касірам у кінатэатры, то хостам у бары. Падчас слжбы ў арміі, спрабуючы трапіць у Тэатр узброеных сіл, ён скінуў 50 лішніх кіло. І толькі сёлета зімой выйграў рэаліці-шоу «Узыходзячая зорка» і імгненна стаў папулярным.

Песня артыста — «душэўная балада пра пошук месца, дзе тваё сэрца будзе спакойным — пра пошук дома». І гэта будзе ўжо трэці нумар з люстэркамі на сёлетнім «Еўрабачанні».

Вялікабрытанія, Майкл Райс — Bigger Than Us (№ 16)

У дзяцінстве з-за захапленняў спевамі аднагодкі дражнілі Майкла. Таму, выйграўшы летась у музычным шоу ВВС, ён скарыстаў сваю папулярнасць для барацьбы з булінгам у школах. А на прызавыя грошы звазіў сям’ю ў Дыснейленд і адкрыў уласную вытворчасць вафель і малочных кактэйляў — вось такі з усіх бакоў станоўчы хлопец.

На конкурсе ён прадставіць чарговы нумар з «касмічнай» графікай і песню з добрым пасылам пра тое, што любоў змяняе свет да лепшага.

Францыя, Білял Хасані — Roi (№ 21)

Сёлетні прадстаўнік Францыі — спявак мараканскага паходжання, які любіць Р’нБ’ і дыснееўскіх прынцэс, вядзе відэаблог для амаль 800 тысяч падпісчыкаў, выпусціў сёлета дэбютны альбом і ўжо некалькі гадоў актыўна падкрэслівае сваю нетрадыцыйную арыентацыю і паслядоўна судзіцца з усімі, хто абражае яго з гэтай нагоды.

На «Еўрабачанні» артыст выступіць у суправаджэнні дзвюх балерын, вельмі поўнай і вельмі худой, каб паказаць, што кожны чалавек у нечым «самы», і каб адчуваць сябе каралём, не трэба адпявадаць ніякім стандартам. І, дарэчы, доўгія белыя валасы, якімі Білял эпаціруе публіку — гэта парык.

Італія, Махмуд — Soldi (№ 22)

Калі хлопчык, сын егіпцяніна і італьянкі, быў яшчэ маленькім, бацька сышоў з сям’і. І вось цяпер сын вырашыў падзяліцца блем ад даўнішняй здрады блізкага чалавека — у песні ёсць радкі «ён п’е шампанскае ў Рамадан і пытаецца, як у мяне ідуць справы... у адзін дзень ты сыйдзеш з дома — скажы мне, калі ты проста думаў пра грошы».

Уявіце сабе, менавіта гэта песня перамагла на фестывалю Сан-Рэма-2019 — і сабрала 8 мільёнаў (!) праслухоўванняў за тыдзень. Нумар жа абяцае запомніцца адмысловымі танцамі, рытмічным плясканнем у ладкі і выявамі палаючых грошай.

Іспанія, Мікі Нуньес — La Venda (№ 26)

Хлопец вывучаў педагогіку ў Барселоне і бізнес-адміністраванне ў Лос-Анжэлесе, а вось музыку доўгі час успрымаў як пабочнае захапленне, хоць і стварыў са школьнымі сябрамі кавер-бэнд. А яшчэ ў адзін цудоўны момант ён здолеў узяць сябе ў рукі і скінуць 20 кіло, таму конкурсная песня — пра пераадоленне сябе самога, каб стаць тым, кім насамрэч хочаш — яму вельмі блізкая.

Нумар вылучаецца адмысловымі дэкарацыямі (на сцэне ўсталяваны схематычны дом), танцуючым пудзілам і тым, што, пакуль аператары будуць здымаць спевака, Мікі будзе здымаць гледачоў.


На дадзены момант прагнозы букмекераў выглядаюць наступным чынам: стаўкі на перамогу Дункана Лоўрэнса з Нідэрландаў прымаюцца з каэфіцыентам 1,6-1,8, то бок, ён лічыцца самым верагодным трыумфатарам. На другое месца ставяць Кейт Мілер-Хайдке з Аўстраліі, на трэцяе — Луку Хені са Швейцарыі, мяркуецца, што ў пяцёрку лідараў трапяць таксама швед Ён Лундвік і італьянец Махмуд, расіянін Сяргей Лазараў акажацца прыкладна на 6-м месцы, а беларуска ЗЕНА — на 21-м. Зрэшты, з прагнозамі на паўфіналы букмекеры сёлета ўжо не раз памыліліся, так што дакладнасць гэтых прадказанняў прыкладна такая, як у астралагічнага гараскопа. Так што прапануем глядзець шоу і проста атрымліваць задавальненне — а калі вас наогул не цікавіць «Еўрабачанне», то як след адаспацца пасля чарговага працоўнага тыдня і прачытаць, хто перамог, на сайце «Звязды» ў нядзелю.

Вікторыя ЦЕЛЯШУК

Фота eurovision.tv

Выбар рэдакцыі

Грамадства

З баршчэўнікам змагаюцца нават з дапамогай квадракоптара

З баршчэўнікам змагаюцца нават з дапамогай квадракоптара

Вопыт Віцебшчыны ў знішчэнні баршчэўніку цікавы таму, што тут больш за 80 працэнтаў зараснікаў ад агульнага па краіне.

Грамадства

Прэтэндэнты на студэнцкі білет здалі тэст па матэматыцы

Прэтэндэнты на студэнцкі білет здалі тэст па матэматыцы

Пазнаць у гарадскім натоўпе абітурыентаў можна без праблем.

Грамадства

Як жывуць апошнія жыхары вёскі Вясневічы

Як жывуць апошнія жыхары вёскі Вясневічы

Галоўная славутасць Вясневічаў, яе жывая гісторыя — 96-гадовы Аляксей Юркевіч.

Культура

Наталля Батракова: Чытачы пішуць, што мае героі нібыта працуюць у суседнім офісе

Наталля Батракова: Чытачы пішуць, што мае героі нібыта працуюць у суседнім офісе

З Наталляй Батраковай мы сустрэліся на адкрыцці абноўленай кнігарні «Светач», што на сталічным праспекце Пераможцаў, 11.