22 кастрычніка, чацвер

Вы тут

Дзень адчыненых дзвярэй у пяты раз прайшоў у Вялікім тэатры


Упершыню прыадкрыць для наведвальнікаў закуліссе ў Нацыянальным дзяржаўным тэатры оперы і балета Беларусі вырашылі ў 2015 годзе. Спачатку дзень нараджэння ў фармаце адчыненых дзвярэй быў эксперыментальным праектам, а цяпер — добрай і прыгожай традыцыяй, якая збірае штогод некалькі тысяч гасцей.


Не выключэннем стаў і 2019-ы. Святочны настрой прысутным загадзя стварыў калектыў "А.M.А.D.І.S. Brаss", які выступаў на плошчы ля фантана. (Дарэчы, вы ведалі, што Вялікі тэатр Беларусі — адзіны будынак, размешчаны на Плошчы Парыжскай камуны ў Мінску?) Апоўдні прагучалі фанфары, і дзверы тэатра адчыніліся — у прамым сэнсе — для ўсіх ахвотных.

Як адзначыў у прамове-віншаванні генеральны дырэктар Вялікага тэатра Беларусі Уладзімір Грыдзюшка, сёння тэатр — адзін з культурных сімвалаў Беларусі, які не толькі беражліва захоўвае ўнікальныя традыцыі, але і нястомна ўзбагачае творчую палітру новым зместам, жывымі пачуццямі, невычарпальнай энергіяй. А таму, нягледзячы на шаноўны ўзрост — Вялікі адзначае 86-ы дзень нараджэння, — тэатр па-ранейшаму малады, цікавы і любімы мноствам гледачоў. "Дзякуй нашым гледачам за тое, што вы заўжды побач: прыходзіце на спектаклі і канцэрты, дорыце артыстам сваю ўвагу і не скупіцеся на апладысменты. Менавіта для вас мы працуем, ствараем і рухаемся наперад", — падкрэсліў Уладзімір Грыдзюшка.

...Наведвальнікі, якія не паленаваліся папярэдне запісацца на экскурсіі, змаглі даведацца больш пра гісторыю тэатра і распытаць пра бліжэйшыя планы, паласавацца адмысловым шакаладам "Вялікі тэатр", прадэманстраваць эрудыцыю ў музычнай і тэатральнай віктарынах і, канешне, пачуць шэдэўры класікі і сучаснасці, рамансы, музыку з любімых кінафільмаў у выкананні інструментальных калектываў і салістаў. Майстры па грыме і бутафоры расказалі пра тонкасці сваіх прафесій, а таксама паказалі, з чаго зроблены тэатральны рэквізіт і як за некалькі хвілін ператварыць маладога чалавека ў старога альбо ў казачнага персанажа.

Тыя ж, хто марыў паказаць уласныя таленты і атрымаць парады ад прафесіяналаў, не толькі пабывалі на балетнай рэпетыцыі, але і ўзялі ўдзел у майстар-класах па балеце, акцёрскім майстэрстве, ігры на ўдарных інструментах і вакале. Дырыжор Іван Касцяхін правёў у глядзельнай зале адкрытую рэпетыцыю з камерным аркестрам гімназіі-каледжа мастацтваў імя І. Ахрэмчыка і адказаў на "10 неразумных пытанняў дырыжору". У камернай зале прафесар Віктар Скарабагатаў прачытаў лекцыю па гісторыі нацыянальнай оперы, а супрацоўнікі архіва паказалі старыя фотаздымкі і афішы, звязаныя з жыццём і творчасцю Станіслава Манюшкі, чый 200-гадовы юбілей шырока адзначаецца сёлета. Прычым творчую тэорыю падмацавалі практыкай — цягам некалькіх гадзін тут адбыліся канцэрты "Манюшка. Партрэт кампазітара ў пісьмах і музыцы", "Беларуская музыка ХХ—ХХІ стагоддзяў" і выступленне стажораў опернай трупы Вялікага тэатра.

З 12 да 16 гадзін на ўсіх паверхах фае тэатра працавалі спецыяльныя фотазоны, дзе былі прадстаўлены рэквізіт, макеты сцэны і эскізы касцюмаў да прэм'ер бягучага, 86-га сезона — "Лятучай мышы" Іагана Штрауса і балета Вячаслава Кузняцова "Анастасія". Маленькіх гасцей запрашалі наведаць фотазону з ласункамі і дэгустацыяй марожанага, а інтэлектуалаў — на эфектную пляцоўку ад сталічнай федэрацыі шахмат.

Упершыню ў святкаванні "Дня адчыненых дзвярэй" узялі ўдзел чэмпіёны свету па спартыўных бальных танцах на інвалідных калясках, якія прадставілі сваю праграму "Мастацтва без абмежаванняў". А таленавітыя выхаванцы сталічнага дзіцячага дома № 5 падрыхтавалі адмысловую выстаўку сваіх твораў, якую назвалі проста і натуральна — "Тэатр".

Наўзамен і ў знак падзякі ўсе госці маглі пакінуць у спецыяльным "чароўным цыліндры", які на адзін дзень замяніў паштовую скрыню, свае віншаванні і найлепшыя пажаданні да дня нараджэння Вялікага тэатра.

Вікторыя ЦЕЛЯШУК

Фота Ганны ЗАНКАВІЧ

Загаловак у газеце: Оперы Манюшкі, балетны майстар-клас і імянны шакалад

Выбар рэдакцыі

Культура

​Як вывозілі каштоўнасці з музеяў БССР у канцы 1920-х — пачатку 1930-х гг.

​Як вывозілі каштоўнасці з музеяў БССР у канцы 1920-х — пачатку 1930-х гг.

Даследчыкі савецкай індустрыялізацыі традыцыйна бралі пад увагу дзве галоўныя крыніцы яе фінансавання — экспарт сыравіны і сельскагаспадарчай прадукцыі. 

Культура

Леў Клейнбарт. Чалавек, якi адкрыў для чытацкай публiкi Янку Купалу i Сяргея Ясенiна, нарадзiўся ў Капылi — у доме, якi захаваўся да нашых дзён

Леў Клейнбарт. Чалавек, якi адкрыў для чытацкай публiкi Янку Купалу i Сяргея Ясенiна, нарадзiўся ў Капылi — у доме, якi захаваўся да нашых дзён

У пачатку XX стагоддзя публiцыст, крытык i журналiст Леў Клейнбарт быў уплывовай асобай сярод творчай iнтэлiгенцыi Пецярбурга.

Эканоміка

Студэнцкі попыт на кошт арэнды жылля амаль не паўплываў

Студэнцкі попыт на кошт арэнды жылля амаль не паўплываў

Спецыялісты адзначаюць: добра яшчэ, што рынак выжыў.

Грамадства

Як правільна суперажываць блізкім? Чаму не працуе звычайнае «Вазьмі сябе ў рукі!»?

Як правільна суперажываць блізкім? Чаму не працуе звычайнае «Вазьмі сябе ў рукі!»?

У падтрымцы звычайна маюць патрэбу ўсе жывыя людзі ў складаныя перыяды жыцця.