Пасёлак Глуша Бабруйскага раёна хутка стане яшчэ больш адамовіцкім. Акрамя таго што тут ужо ёсць прыпынак Адамовіча, у рабоце — помнік класіку, які плануецца ўсталяваць каля мясцовага Дома культуры ўвосень. А нядаўна фінансаванне атрымаў яшчэ адзін праект, звязаны з імем беларускага пісьменніка. Ён прадугледжвае стварэнне турыстычнай інфраструктуры — інфармацыйных стэндаў і паказальнікаў, а таксама інтэрактыўнага маршруту па творах Адамовіча. Праект быў прадстаўлены бабруйскай ініцыятыўнай групай «Прыпынак Адамовіча» на конкурсе сацыяльных праектаў Sосіаl Wееkеnd.
— Усяго на трынаццаты сезон конкурсу паступіла 383 заяўкі з розных куткоў краіны. Удзельнікі прайшлі розныя этапы адбору, у тым ліку «народнае галасаванне». Яно працягвалася пяць дзён, — расказвае падрабязнасці ідэйны натхняльнік і кіраўнік ініцыятыўнай групы ў Бабруйску «Прыпынак Адамовіча» Андрусь Архіпенка. — Увесь гэты час мы знаходзіліся ў топ-20. За пяць дзён набралі 513 галасоў. Апошні дзень быў самым хвалюючым. Мы ўпэўнена ўваходзілі ў дваццатку наймацнейшых, а тут нечакана апынуліся за яе межамі. Нават засумавалі, бо ўжо выкарысталі ўсё магчымае, каб прыцягнуць увагу да праекта. Але вечарам сітуацыя кардынальна змянілася, мы былі ўжо на 16-м месцы — за шэсць гадзін набралі больш за 100 галасоў. Гэта быў сапраўдны цуд.
Фінал конкурсу праходзіў у гатэлі «Пекін», што ў Мінску. Падчас прэзентацыі свайго праекта бабруйчане прадэманстравалі эскіз бюста пісьменніка, які з'явіцца на яго малой радзіме, і дыплом фіналістаў конкурсу Рэспубліканскага грамадскага аб'яднання «Беларускі камітэт Міжнароднага савета па захаванні помнікаў і славутых месцаў» (ІКАМОС) «Спадчына ў дзеянні». Гэта яшчэ адзін конкурс, праз які прайшлі бабруйчане. На ім было прадстаўлена каля 40 праектаў, і «адамовіцкі» трапіў у васьмёрку наймацнейшых. На жаль, перамагчы не атрымалася. Затое гэтым разам фартуна ўсміхнулася і дала шанц.
— Нас падтрымаў «Беларусбанк», ён гатовы выдзеліць для рэалізацыі праекта 10 тысяч рублёў. Плюс тысячу рублёў перадалі ад імя беларускага бізнесмена Віталя Князева, — паведаміў Андрусь.
— Чаму падтрымалі? — здзівіўся нашаму пытанню начальнік упраўлення інфармацыі і сацразвіцця ААТ «Беларусбанк» Дзмітрый Бакіноўскі. — Тут усё проста і відавочна. «Беларусбанк» — гэта вельмі сацыяльна адказная кампанія, якая рэалізуе вялікую колькасць розных сацыяльных праектаў па такіх асноўных кірунках, як спорт, культура, адукацыя, ахова здароўя і гэтак далей. У нас дзейнічае свая палітыка ў галіне сацыяльнай карпаратыўнай адказнасці. А Sосіаl Wееkеnd — гэта буйная пляцоўка, якая збірае яскравых таленавітых людзей з вельмі цікавымі праектамі, накіраванымі на вырашэнне сацыяльных пытанняў. І банк не мог у гэтым не паўдзельнічаць. Улічваючы, што зараз у нас Год малой радзімы, мы вырашылі заявіць сваю намінацыю з аднайменнай назвай. У фінале быў шэраг годных праектаў, але найлепшым, на наш погляд, аказаўся праект, які цалкам адпавядаў нашай намінацыі. Глуша — гэта маленькі населены пункт са сваёй цікавай гісторыяй. Тым больш што Алесь Адамовіч — адзін з самых буйных, але крыху ў апошні час забытых пісьменнікаў. Таму мы і вырашылі падтрымаць ініцыятыву, каб і далей развіваць гэты праект, зрабіць з пасёлка цікавы брэнд і папулярызаваць нашу культуру, літаратуру.
З перамогай бабруйчан павіншавала старшыня Глушанскага сельсавета Марыя Сушчанка. Яна лічыць, што з такой ініцыятыўнай моладдзю музей Адамовіча ў Глушы будзе абавязкова. А Наталля Адамовіч — дачка класіка — наогул была на фінале Sосіаl Wееkеnd і асабіста падтрымлівала бабруйскіх актывістаў у гэты вырашальны момант.
На працягу паўгода праект павінен быць рэалізаваны.
— Будзем рабіць эскізы інфармацыйных стэндаў, узгадняць з мясцовымі ўладамі і пакрысе рэалізоўваць гэты праект, — кажа Андрусь. — Паступова дойдзем і да будынка аптэкі, дзе плануецца адкрыць музей. Шукаем магчымасць стварыць грамадскую арганізацыю.
Адамовіцкія праекты гэтым не завяршаюцца. Нагадаем, што працягваецца конкурс буктрэйлераў пад назвай «Ідзі і чытай», удзельнікам якога прапануецца зняць невялікі ролік працягласцю не болей за чатыры хвіліны на адзін з твораў Алеся Адамовіча. Пераможцы будуць вызначаны ў трох намінацыях: «Лепшы сцэнарый, ідэя буктрэйлера» , «Лепшая відэааператарская работа і мантаж» і Гран-пры за лепшы сцэнарый і тэхнічнае выкананне. Работы прымаюцца да 15 ліпеня. Інфармацыя на сайце — adamovich.by. Узнагароджанні пераможцаў і адкрыты прагляд буктрэйлераў адбудуцца ў верасні.
Нэлі ЗІГУЛЯ
Збор сродкаў на музей працягваецца. Далучыцца да добрай справы можаце і вы. Разліковы рахунак існуе пры аддзеле ідэалагічнай работы, культуры і па справах моладзі Бабруйскага райвыканкама р/р BY84АKBB36421292723267100000 у філіяле 703 ААТ «ААБ Беларусбанк», БІК АKBBBY21703, УНП 701226324.
Прызначэнне плацяжу — «Для вырабу праектна-каштарыснай дакументацыі і рэканструкцыі будынка ў пасёлку Глуша пад музей А. Адамовіча». Гэты доўгі сказ павінен быць пазначаны ў банкаўскім дакуменце абавязкова.
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.