Вы тут

Заказнікі «Спораўскі», «Званец» і «Налібоцкі» атрымалі спецыяльную тэхніку


Беларускія заказнікі «Спораўскі», «Званец» і «Налібоцкі» атрымалі спецыяльную тэхніку, якая дапаможа аднавіць месцы пражывання відаў, што знаходзяцца пад пагрозай знікнення.


Зак Тэйлар, намеснік Пастаяннага прадстаўніка ПРААН у Беларусі (справа), уручае сертыфікат на тэхніку дырэктару заказніка «Налібоцкі» Васілю Гуркову. Фота ПРААН

Сучасная тэхніка коштам у 600 тысяч долараў ЗША закуплена ў рамках праекта «Устойлівае кіраванне ляснымі і водна-балотнымі экасістэмамі для дасягнення мнагамэтавых пераваг» («Ветландс»), які фінансуецца Глабальным экалагічным фондам і рэалізуецца Праграмай развіцця ААН у партнёрстве з Міністэрствам прыродных рэсурсаў і аховы навакольнага асяроддзя.

Яе выкарыстанне дапаможа спыніць зарастанне адкрытых балот і пойменных лугоў дрэвамі і хмызнякамі і такім чынам аднавіць месцы гнездавання вяртлявай чаротаўкі ў заказніках «Спораўскі» і «Званец», а таксама стварыць мазаічныя лугавыя кармавыя ўгоддзі для еўрапейскага зубра ў заказніку «Налібоцкі».

Энерганасычаныя трактары, лесагаспадарчыя мульчары, касілкі і тэхналагічныя аўтамабілі дазваляюць арганізаваць поўны тэхналагічны ланцужок па кашэнні і выкарыстанні расліннай біямасы балот і пойменных лугоў. Як толькі скончыцца сезон гнездавання, тэхніка выйдзе на балоты, каб скасіць, сабраць і здрабніць маладыя дрэўцы, хмызнякі і трыснёг. Дзякуючы гэтаму на наступны год у птушак з'явіцца больш прыдатных месцаў для гнездавання.

У рамках праекта ў рэспубліканскім ландшафтным заказніку «Званец» ад балотнай расліннасці расчысцяць каля 4500 га. Атрыманая біямаса знойдзе прымяненне ў выглядзе паліўнай дранкі, сена, подсцілу і пры вытворчасці ўгнаення. У выніку папуляцыі відаў, якія знаходзяцца пад пагрозай знікнення, павялічацца: вяртлявай чаротаўкі — з 2100—4400 да 5000 самцоў, вялікага арляца — з 0—2 да 4 пар, дубальта — з 20—30 да 50 самцоў, кулёна — з 0—4 да 15 пар.

Каб балота стала чыстым ад трыснягу і хмызнякоў, патрэбна спецыялізаваная тэхніка.

Па словах дырэктара рэспубліканскага біялагічнага заказніка «Спораўскі» Вадзіма Пратасевіча, выкарыстанне новай тэхнікі разам з ужо дзеючай створыць бесперапынны ланцужок, што дапаможа, захоўваючы прыродны біятоп, атрымліваць прадукцыю. А яе рэалізацыя, у сваю чаргу, дасць магчымасць далей праводзіць прыродаахоўную работу. Толькі за мінулы год прададзеная ў розных формах біямаса прынесла заказніку больш за 84 тысячы рублёў. Таксама дзякуючы праекту ў заказніку будзе створана сем працоўных месцаў (чатыры сталыя і тры сезонныя). Добрую тэндэнцыю назіраюць і адносна самой папуляцыі вяртлявай чаротаўкі — яе колькасць расце, птушка селіцца і на новых, ачышчаных тэрыторыях.

Для аднаўлення натуральных кармавых угоддзяў еўрапейскага зубра ў поймах рэк і на дэградаванай меліярацыйнай сістэме ва ўрочышчы Цякава ў заказніку «Налібоцкі» новая тэхніка дапаможа выдаліць хмызнякі і аптымізаваць гідралагічны рэжым. Тут плануецца аднавіць 490 гектараў лугавых угоддзяў, каб палепшыць умовы пражывання мікрапапуляцыі еўрапейскага зубра і зрабіць яе больш устойлівай.

— Каб зубры падчас пошуку корму не наносілі шкоды ўгоддзям сельгасарганізацый і мясцовых жыхароў, спрадвечныя для жывёл пашы аднаўляюцца як мага далей ад населеных пунктаў, у цэнтры пушчы, — расказаў дырэктар рэспубліканскага ландшафтнага заказніка «Налібоцкі» Васіль Гуркоў. — Работы, якія праводзяцца на тэрыторыі заказніка, ужо дазволілі аднавіць і падрыхтаваць да пасеву траў (кармавой базы для зубра) тэрыторыю ў 106 га, ачысціць ад драўнінна-хмызняковай расліннасці 46 га. А раслінная маса, нарыхтаваная падчас работ, стала кормам для беларускіх волатаў на зімовы перыяд.

— Будучыня Беларусі завязана на прыродзе, акрамя таго, тут ёсць добрыя тэхналогіі і цудоўны чалавечы патэнцыял, — адзначыў намеснік Пастаяннага прадстаўніка ПРААН у Беларусі Зак Тэйлар. — І калі складнікі злучаюцца, гэта робіцца вялікім рэсурсам для развіцця краіны.

Па яго словах, сёння і ў нас, і ў краінах ЕС усё больш прыходзяць да разумення, што прыродаахоўная работа павінна мець вельмі моцны эканамічны кампанент. Так, захоўваючы прыроду, можна забяспечыць развіццё мясцовых згуртаванняў у сельскіх раёнах, каб людзі мелі магчымасць працаваць на сваёй зямлі.

Вераніка КОЛАСАВА

Фота аўтара

Загаловак у газеце: Навошта зубру... трактар?

Выбар рэдакцыі

Грамадства

З баршчэўнікам змагаюцца нават з дапамогай квадракоптара

З баршчэўнікам змагаюцца нават з дапамогай квадракоптара

Вопыт Віцебшчыны ў знішчэнні баршчэўніку цікавы таму, што тут больш за 80 працэнтаў зараснікаў ад агульнага па краіне.

Грамадства

Прэтэндэнты на студэнцкі білет здалі тэст па матэматыцы

Прэтэндэнты на студэнцкі білет здалі тэст па матэматыцы

Пазнаць у гарадскім натоўпе абітурыентаў можна без праблем.

Грамадства

Як жывуць апошнія жыхары вёскі Вясневічы

Як жывуць апошнія жыхары вёскі Вясневічы

Галоўная славутасць Вясневічаў, яе жывая гісторыя — 96-гадовы Аляксей Юркевіч.

Культура

Наталля Батракова: Чытачы пішуць, што мае героі нібыта працуюць у суседнім офісе

Наталля Батракова: Чытачы пішуць, што мае героі нібыта працуюць у суседнім офісе

З Наталляй Батраковай мы сустрэліся на адкрыцці абноўленай кнігарні «Светач», што на сталічным праспекце Пераможцаў, 11.