Рэзідэнт ПВТ — кампанія Apalon — выпусціў новую бясплатную мабільную праграму з беларускімі фальклорнымі аўдыёказкамі. Kazkі — некамерцыйны праект, мэта якога — прыцягнуць увагу да беларускай гісторыі, аўтэнтычнай культуры і вуснай творчасці.
Матэрыял для праекта быў сабраны ў розных кутках Беларусі. У казках адлюстраванае жыццё нашых продкаў, якое дзіўным чынам пераклікаецца з сённяшняй рэчаіснасцю. Мабільная праграма дае магчымасць праслухаць 53 творы, якія на працягу 20 гадоў збіраў беларускі музыка Алег Хаменка. Фолк-мадэрн-гурт «Палац», лідарам якога ён з'яўляецца, прыняў удзел у агучванні казак. Усе яны аб'яднаныя ў тэматычныя катэгорыі: «Чароўныя казкі», «Казкі пра жывёл», «Дзіўныя казкі», «Казкі пра жыццё», «Павучальныя казкі» і «Казка пра салдата-доктара».
Кампанія Apalon зрабіла праграму абсалютна бясплатнай і даступнай адразу на дзвюх платформах: для карыстальнікаў іOS і Androіd. У далейшым яна плануе падтрымліваць праект і папаўняць існуючую бібліятэку.
«Новы час патрабуе новых фарматаў, і мабільная праграма — гэта менавіта тое рашэнне, якое дазволіць беларусам па ўсім свеце дакрануцца да сваёй гісторыі, культуры і да сваіх каранёў», — кажа прадзюсар праекта Андрэй Залатар.
«Самасвядомасць і светаўспрыманне кожнай нацыі заснаваныя на гісторыях, якія людзі здаўна расказваюць адно аднаму. Беларускія казкі — найбагацейшая крыніца натхнення і гонару. Я рады ўнесці свой сціплы ўклад у працу выдатнай каманды, якая выпусціла Kazkі. Разам мы стварылі праграму, якая аб'яднала тэхналогіі, культуру і гісторыю, якая зможа стаць часткай беларускай спадчыны», — падкрэслівае генеральны менеджар Apalon Закары Розман.
Спампаваць праграму KAZKІ можна на AppStore і ў Google Play.
Надзея НІКАЛАЕВА
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
